Məlum olduğu kimi, demokratiya adı altında hakimiyyətə gələn Ermənistan Baş naziri Nikol Paşinyan antidemokratk tərzdə xalqı məhkəmələrə qarşı qaldırmaqla bağlı çağırış etdi. Ölkədəki bütün məhkəmələri blok etməklə bağlı çağırışlar səsləndirdi. Onun sözlərinə görə, vətəndaşların haqlarını pozan qərarlar verən bütün hakimlər qovulmalı və ya istefaya getməlidirlər.
Həmçinin, Paşinyan son hadisələrin Ermənistanda xalqın etibar etdiyi məhkəmə hakimiyyətinin olmadığını göstərdiyini bildirib. Paşinyan hazırkı məhkəmələrin əvvəlki korrupsiyalaşmış sistemin qalığı olduğunu deyib. Baş nazir məhkəmələrə bundan öncə öz dəyərlərinə qayıtmaq üçün bir il vaxt verildiyini, amma indi məhkəmələrə cərrahi müdaxilənin vaxtının gəlib çatdığını bildirib. O, Ermənistanda fəaliyyətdə olan bütün hakimlərin attestasiya olunması tələbi ilə çıxış edib. Baş nazir hesab edir ki, Avropa İnsan Haqları Məhkəməsinin qərarları ilə təsdiqlənmiş vətəndaşların hüquqlarının kobud pozulması hökmlərinin müəllifi olan bütün hakimlər istefa verməli, tutduqları vəzifələrdən azad olunmalıdır.
Paşinyan icraedici qurumun təmsilçisi olaraq, faktiki olaraq, kobud şəkildə və göz görə-görə məhkəmələrin fəaliyyətinə müdaxilə edir. Məhkəmələrə qarşı açıq tərzdə hədələyici məzmunda çağırışlar səsləndirdi və bir növ, bununla onlara meydan oxuyur. Qanunvericiliyə görə, məhkəmələr müstəqil olmalıdır və onların fəaliyyətinə icraedici strukturların müdaxiləsi qadağandır. Ancaq Paşinyan bütün bunları tapdalamasına rəğmən, başda Avropa İttifaqı olmaqla, digər Avropa təsisatları Ermənistanda yaşanan rəzalətə reaksiya vermədilər. Baxmayaraq ki, bir müddət əvvəl Ermənistanı klassik demokratiya ölkəsi sayırdılar. Demokratiyadan dəm vuran Avropa təsisatları buna görə Paşinyana etiraz etmədilər.
Maraqlıdır, Avropa institutları niyə susdular?
Məhəmməd Əsədullazadə: “Paşinyanın xalqı məhkəmə sisteminə qarşı inqilaba çağırması ölkədə hüquq sisteminin fiaskosudur”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bunu bir sıra amillərlə əlaqələndirdi: “Ermənistanda baş verən siyasi və hüquqi böhran Paşinyan iqtidarının son dərəcə nizamsız hakimiyyətinin təzahürüdür. Paşinyan bir il ərzində ölkəsində hüququn aliliyini təmin edə bilmədi, məhkəmələr keçmiş hakimiyyətin nəzarətində qalmaqdadır. Eks-prezident Robert Köçəryanın məhkəmənin qərarı ilə həbsdən azad olunmasına Paşinyanın təpkisi və xalqı məhkəmə sisteminə qarşı inqilaba çağırması ölkədə hüquq sisteminin fiaskosudur. Paşinyan bununla ölkəyə və dövlət qurumlarının ayrı-ayrı qollarına nəzarət etmədiyini göstərdi. Hesab edirəm ki, Paşinyanın bu siyasəti ölkədə məhkəmə hakimiyyətinin laxlamasına və gələcəkdə də onların icra hakimiyyətinə tabe olacağına zəmin yaradır. Paşinyan istəyir ki, bütün dövlət qurumları onun istəklərini şəksiz yerinə yetirsinlər. Ancaq bu, Ermənistanda avtoritar sistemin qurulması deməkdir. Paşinyanın məhkəmə sisteminə inqilab elan etməsi Avropanın da seyrçi qalmasına gətirdi. Görünür, Avropa təsisatları ikili standartlardan çıxış edib Ermənistanda yaşanan rəzaləti görmək istəmirlər. Bu səbəbdən hələ də bir reaksiya yoxdur. Fikrimcə, olmayacaq da. O da ola bilər ki, Avropa qurumları ölkədə Rusiyaya bağlı məhkəmələrin iflasında maraqlıdırlar. Ona görə də öz səssizliklərini qoruyurlar. Buna baxmayaraq, reallıq odur ki, Ermənistana yanaşmada mütləq seyrçi mövqe tuturlar. Çünki məhkəmə sisteminə qarşı xalqı etiraza çağırmaq birbaşa Paşinyanın məhkəmə sisteminə müdaxiləsidir. Ona görə də Avropa İttifaqı özünə hörmət edirdisə, mütləq buna reaksiya bildirməli idi. Ermənistan bu gün özünün siyasi və hüquqi deqradasiyasını yaşayır. Paşinyan bununla ölkəsini inkişafa deyil, fiaskoya aparır”.
Vidadi ORDAHALLI
