Son proseslər göstərdi ki, Ermənistandakı “Qarabağ klanı” Paşinyandan ilk revanşını aldı və ona sarsıdıcı zərbə vurdu. Həmin klanın “xaç atası” sayılan Köçəryan həbsdən çıxarıldı, özü də Paşinyanın iradəsinə zidd olaraq.
Paşinyan gözəl anlayır ki, həmin klan əsas ilhamı Rusiyadan alır. Bu səbəbdən də hansısa vasitələrlə düçar olduğu Köçəryan məğlubiyyətini kompensasiya etmək üçün rusiyapərəstlərdən qisas almaq yollarını düşünür. Deyəsən, bu yöndə ilk hədəfini müəyyənləşdirib. Artıq Ermənistanın rəsmi dairələri bəyan edirlər ki, KTMT-nin Bişkekdəki toplantısında Ermənistanın sədrlik məsələsini yenidən gündəmə gətirəcəklər: “2020-ci il yanvarın 1-də Belarus nümayəndəsinin KTMT-nin baş katibi vəzifəsinə təyin ediləcəyinə dair qərar yoxdur. Biz iddia yox, yalnız ehtimal edə bilərik ki, KTMT-nin baş katibi 2020-ci il yanvarın 1-də Belarus nümayəndəsi təyin ediləcək. Ona görə ki, belə bir qərar hələ ki, yoxdur. Nə vaxt belə bir qərar olarsa, yalnız o zaman biz bununla bağlı hansı proseslərin baş verə biləcəyini iddia edə bilərik.
Baş katib bu ölkələrə xidmət göstərən katibliyin inzibati rəhbəri olmaqla, qurumun fəaliyyət axarını, orqanların işini təmin etməyə cavabdehdir. Biz baş katibliyə namizədi onun nə dərəcədə idarə edə bilməsi ilə qiymətləndiririk. Qərar yalnız konsensus əsasında qəbul olunur. Növbəti rotasiya qaydası əlifba sırası üzrə 2020-ci il yanvarın 1-dən başlayır”.
Göründüyü kimi, Ermənistan həm ölkədəki rusiyapərəstlərə, həm də onları müdafiə edən Rusiyaya mesaj verir ki, münasibətləri KTMT üzərindən yenidən gərginləşdirə bilər. Paşinyanın düşündüyü bu qisas üsulu ona hansısa faydanı verə bilərmi?
Daşdəmir Əliyev: “Paşinyan oradakılara və ölkəsindəki rusiyapərəstlərə bu üsulla təzyiq etmək kimi gücə və nüfuza sahib deyil”
Hərbi ekspert Daşdəmir Əliyev “Bakı-Xəbər”ə açıqlamasında bildirdi ki, Ermənistanın bu cəhdləri birbaşa ara qarışdırmağa yönəlib: “Məlum olduğu kimi, Paşinyan hakimiyyətə gələndə Kollektiv Təhlükəsizlik Müqaviləsi Təşkilatının baş katibi Yuri Xaçaturovu həbsə saldı. Bunun da nəticəsində o, tutduğu vəzifədən azad olundu. Belə qərarı KTMT Şurası qəbul etdi. İrəvanYuri Xaçaturovun “1 mart” işinə təqsirləndirilən şəxs qismində cəlb olunduğu üçün onun geri çağırılması haqda qərar qəbul etmişdi. Bu da belə əsaslandırılırdı ki, 2008-ci il martın 1-də nümayişin dağıdılması zamanı silahdan istifadə edilib, səkkizi mülki şəxs, ikisi isə polis əməkdaşı olmaqla on nəfər həlak olub. Yuri Xaçaturov kütləvi etiraz aksiyaları zamanı İrəvan Silahlı Qüvvələr qarnizonunun rəisi olub və istintaqın versiyasına görə, nümayişin dağıdılmasına rəhbərlik edib. Maraqlıdır ki, Rusiyanın təzyiqlərindən sonra Paşinyan Xaçaturovu da həbsdən zamin müqabilində buraxmalı oldu. Ermənistanın sabiq prezidenti Köçəryan da eyni cinayət işi üzrə məsuliyyətə cəlb edilmişdi. Göründüyü kimi, Paşinyan onu da uzun müddət həbsdə saxlaya bilmədi. Həmin vaxt KTMT üzvləri Ermənistanı Xaçaturovla bağlı qərarı verməkdən çəkindirmək istədilər. Onlar hesab edirdilər ki, baş katibin həbsi KTMT-nin də nüfuzunu zədələyir. Paşinyan bütün təklifləri geri çevirdi. Nəticədə o, KTMT üzvləri arasında olan etibarını da tam itirdi. Elə vəziyyət yarandı ki, üzv dövlətlər bu ölkənin daha bir nümayəndəsini təşkilatın idarəçiliyində görmək istəmədiklərini açıq bəyan etdilər. Ermənistan hakimiyyəti hər zaman KTMT-yə üzv ölkələrə Azərbaycanla əlaqələri inkişaf etdirməməsi üçün təsir etməyə çalışıb. Lakin rəsmi İrəvanın bu cəhdləri boşa çıxdı, çünki Azərbaycan iqtisadi və hərbi sahədə əməkdaşlıq üçün daha sərfəli ölkədir”.
Ekspertin sözlərinə görə, rəsmi Moskva Paşinyanı həmin əməlinə görə kəskin qınadı. Onlar hesab edirdilər ki, Ermənistan əvvəlcə Yuri Xaçaturovu qurumun baş katibi vəzifəsindən geri çağırmalı və yalnız bundan sonra ona qarşı cinayət təqibi başlatmalı idi: “Həmin vaxt Nazarbayev, Lukaşenko Paşinyanı açıq şəkildə tənqid etdilər. Ermənistan çarəsiz qalıb Rusiyanın müvəqqəti sədrliyini qəbul etdi. Bundan sonra rotasiya qaydasında sədrlik Belarusa keçməlidir. Amma Ermənistanda baş verən son proseslərdən sonra Paşinyan yenidən bu məsələni gündəmə gətirib və kimlərəsə mesaj vermək istəyir. Amma düzgün qisas yolunu seçməyib. Çünki belə olsa, KTMT-dən ikinci zərbəni alacaq. Çünki Paşinyan oradakılara və ölkəsindəki rusiyapərəstlərə bu üsulla təzyiq etmək kimi gücə və nüfuza sahib deyil”.
Məhəmmədəli QƏRİBLİ
