ATƏT-in Minsk Qrupunun həmsədrləri mayın sonunda regionda səfərdə olacaqlar. Onlar Ermənistan, Azərbaycan və Dağlıq Qarabağa səfər edəcəklər. Bu barədə Ermənistan XİN-in mətbuat katibi Anna Naqdalyan çərşənbə axşamı İrəvanda brifinqdə bildirib.
Bununla yanaşı, əsirlərin "Hamının hamıya" prinsipi üzrə dəyişdirilməsilə bağlı Bakının təklifinə toxunan Naqdalyan işarə edib ki, guya yeniyetmənin ölümündə ittiham olunan Dilqəm Əsgərovu və Şahbaz Quliyevi dəyişməyəcəklər. Bununla belə, Dilqəm Əsgərov və Şahbaz Quliyevin guya “ağır cinayət törətdiklərini və mülki insanları qətlə yetiridklərini” iddia edən Ermənistan XİN nümayəndəsi həmin şəxslərin “qəhrəmanlaşdırılması”nın əleyhinə olduqlarını da bildirib: “Ermənistan XİN hər zaman real humanitar addımların atılmasının tərəfdarı olub, lakin bu humanitar hərəkətlər ağır cinayətlərin cəzasız qalması ilə nəticələnməməlidir”.
Qeyd edək ki, iki ölkə XİN rəhbərinin apreldə Moskvada keçirilmiş son görüşündən sonra tərəflər humanist addımlar barədə bəyanatla çıxış ediblər. Əsasən bütün əsirlərin mübadiləsi, jurnalistlərin qarşılıqlı səfərləri nəzərdə tutulub. Bu təşəbbüs ATƏT-in Minsk Qrupu həmsədrləri tərəfindən dəstəklənib.
Görünən odur ki, Ermənistan tərəfi məqsədyönlü şəkildə əsir və girovların dəyişdirilməsini pozur. Ən başlıcası isə, Dilqəm Əsgərov və Şahbaz Quliyevə münasibətdə qisasçılıq mövqeyindən çıxış edir. Məsələni tamamilə başqa istiqamətə yönəltməyə və onların məsələsinə başqa don geydirməyə çalışırlar. Guya adıçəkilən şəxslər yeniyetməni öldürüblər. Halbuki, bütün bunlar tamamilə cəfəngiyyatdır.
O baxımdan ekspertlər Naqdalyanın adıçəkilən girovlarla bağlı səsləndirdiyi fikirləri necə dəyərləndirirlər?
Əhməd Şahidov: “Erməni mətbuatı Naqdalyanın Dilqəm Əsgərov və Şahbaz Quliyevlə bağlı səsləndirdiyi fikirləri bir qədər təhrif edir”
Məsələyə münasibət bildirən Azərbaycanlı Əsir və Girovlarla bağlı Məlumat Mərkəzinin koordinatoru Əhməd Şahidovun sözlərinə görə, rəsmi Bakının təklif etdiyi “Hamının hamıya” prinsipi üzrə əsir və girovların dəyişdirilməsi prosesi rəsmi İrəvanı narahat edir: “Vyana və Moskva görüşlərində əldə olunmuş humanitar addımların atılması barədə razılaşmaya əsasən, artıq rəsmi İrəvan müəyyən addımlar atmağa başlayıb. Bu ölkənin müdafiə naziri David Tonoyanın son açıqlaması, habelə Ermənistan XİN-in bəyanatı belə deməyə əsas verir. Ermənistan humanitar addımları atmağa hazır olduğunu desə də, azərbaycanlı girovların öz Vətənlərində qəhrəman kimi qarşılanacağından narahatdır və bunu açıq şəkildə ifadə edir. Düşünürəm ki, bu, Ermənistanın subyektiv fikridir. Azərbaycan dövləti və cəmiyyəti hansı məsələ ilə bağlı necə davranacağı barədə özü qərar verəcək. Fikrimcə, erməni mətbuatı Anna Naqdalyanın Dilqəm Əsgərov və Şahbaz Quliyevlə bağlı səsləndirdiyi fikirləri bir qədər təhrif edir. Məsələ ondadır ki, Ermənistan demir sözügedən şəxslər dəyişdirilməyəcək. Naqdalyan dedi ki, həmin şəxslərin sonradan qəhrəmanlaşdırılmasının əleyhinədirlər. Yəni dəyişdirilmə baş tutacaq. Sadəcə, Azərbaycana mesaj verir ki, həmin şəxsləri Ramil Səfərov kimi sonradan qəhrəmanlaşdırmayın. Hesab edirlər ki, bunun Ermənistan cəmiyyətinə mənfi təsiri var. Ona görə də indidən belə bir şərt irəli sürürlər. Erməni mətbuatı isə onun dediklərini təhrif edərək belə təqdim edir ki, guya Naqdalyan həmin girovların dəyişdirilməyəcəyinə eyham vurub. Əslində, qeyd etdiyim kimi, bu belə deyil”.
Vidadi ORDAHALLI
