Bütün dünya tamaşaçılarının böyük maraqla izlədiyi “Avroviziya-2019” mahnı müsabiqəsi artıq başa çatıb. İsrailin paytaxtı Təl-Əviv şəhərində keçirilən müsabiqədə diqqətçəkən məqamlar izlənib. Müsabiqənin finalında 20-ci nömrə altında çıxış edən təmsilçimiz Çingiz Mustafayevin ifası zamanı Azərbaycanın xəritəsi təqdim edilsə də, bu xəritədə Qarabağ və Naxçıvan göstərilməyib. Tarixi Azərbaycan torpaqlarının xəritəyə salınmamasına İctimai Televiziyadan etiraz bildirilib. Lakin buna baxmayaraq, xəritədə heç bir düzəliş edilməyib.
Azərbaycan xəritəsinin belə bir mötəbər yarışda təhrif edilməsi həm siyasi, həm də mədəni baxımdan qəbuledilən deyil. Azərbaycan xəritəsinin Naxçıvansız və Qarabağsız təqdim edilməsi məsələsi geniş müzakirə edilir. Ərazi bütövlüyümüzə qarşı bu təxribat erməni təsiri ilə bağlı ola bilərmi?
Vaqif Abışov: “Ermənilər bütün vasitələrdən istifadə edərək Azərbaycana qarşı təxribatlar törədirlər, bu dəfə də əməllərindən qalmadılar”
Azərbaycan Milli Elmlər Akademiyasının (AMEA) A.Bakıxanov adına Tarix İnstitutunun aparıcı elmi işçisi, tarix üzrə fəlsəfə doktoru Vaqif Abışov “Bakı-Xəbər”ə bildirdi ki, prosesin baş verməsi təsadüfi deyil. V.Abışovun sözlərinə görə, dəfələrlə Azərbaycana qarşı müxtəlif təxribatlar baş verib. Müsahibimiz onu da bildirdi ki, hətta “Avrovizya” müsabiqəsində əvvəllər də ermənilər tərəfindən Azərbaycana qarşı təxribatçı hərəkətlərə yol verilib. Buna misal olaraq o, keçmiş müsabiqələrdən birində Ermənistan təmsilçisinin qondarma Dağlıq Qarabağ rejiminin “bayrağı” ilə çıxış etməsini, burada Azərbaycan musiqisinin elementlərindən istifadə etməsini və s. göstərən ekspert qeyd etdi ki, “Avroviziya-2019”da Azərbaycan təmsilçisinin çıxışı zamanı xəritəmizin təhrif edilməsi də növbəti erməni təxribatı sayıla bilər. “Bu gün Azərbaycanın bütün istiqamətlərdə inkişaf etməsi, eləcə də bir sıra beynəlxalq uğura imza atması bəzi xarici dövlətləri, o cümlədən də Ermənistanı ciddi narahat edir. Ermənilər bütün vasitələrdən istifadə edərək Azərbaycana qarşı təxribatlar törədirlər, bu dəfə də əməllərindən qalmadılar. Fikrimcə, Azərbaycan təmsilçisi Çingiz Mustafayev ifa edərkən Azərbaycan xəritəsinin təhrif edilmiş formada, Qarabağsız və Naxçıvansız təqdim edilməsində birmənalı olaraq ermənilərin əli var. Çünki onlar uzun illərdir Qarabağla yanaşı, Naxçıvana qarşı da müxtəlif iddialar irəli sürürlər. Ermənilərin əli ilə xaricdə çap olunan xəritələrdə Naxçıvan və Qarabağ göstərilmir, bu ərazilər əsassız olaraq erməni torpağı (?) kimi təqdim edilir. Erməni diasporunun fəaliyyəti, eləcə də Avropanın, Amerikanın ermənipərəst qüvvələrinin təsiri ilə Azərbaycana qarşı bir sıra çirkin işlər həyata keçirilir. Ermənistan heç vaxt Azərbaycan təmsilçisinin uğurla çıxış etməsini istəmir. Bu müsabiqədə Azərbaycan təmsilçisi Çingiz Mustafayev müsabiqənin əsas favoritlərindən biri oldu. O həm təqdim etdiyi mahnı, həm də göstərdiyi performansla diqqət mərkəzində idi. Bu da, sözüsüz ki, erməniləri ciddi narahat edirdi. Düşünürəm ki, Azərbaycan xəritəsi ilə bağlı təxribat ciddi araşdırılmalıdır. Çünki bu olduqca mənfi bir haldır”.
İsrailin Azərbaycanın ərazi bütövlüyünü tanıdığını qeyd edən V.Abışovun sözlərinə görə, Azərbaycan xəritəsinin o cür təqdim edilməsi müsabiqənin təşkilatçısı olan qurumun günahıdır. O hesab edir ki, ermənilər hər yerdə özlərinə əlaqə yaradır və belə ciddi yarışlardan öz çirkin niyyətlərini həyata keçirmək üçün geniş şəkildə istifadə edirlər.
İradə SARIYEVA
