Son vaxtlar Avropada maraqlı proseslərin baş verdiyinin şahidi oluruq. Azərbaycan hakimiyyətinə qarşı çox radikal mövqeyi ilə tanınan və xaricdə mühacir kimi yaşayan şəxslərin İlham Əliyevə açıq dəstək ifadə etdiyini görürük. Bu günlərdə “Meydan TV” kimi radikal bir layihənin qurucusu Emin Milli sosial şəbəkələr vasitəsilə İlham Əliyevdən açıq üzr istədi. Bunu da belə əsaslandırdı ki, indiyə qədər qərəzli, kinli olub. Buna bənzər mövqeyi digər mühacir jurnalist Elnur Məcidli də sərgilədi.
Hiss olunur ki, artıq Avropa ölkələrinə sığınan mühacirlər bəzi oyunlardan tam xəbərdar olublar. Buna görə də nicatı öz dövlətlərində axtarmağa başlayıblar. Qeyd edək ki, mühacirlərin bu cür hərəkətlərini alqışlayanlarla yanaşı, onlara istehza ilə yanaşan, hətta söyənlər də var. Ən maraqlısı isə budur ki, mühacirlərə ironik yanaşanlardan biri də AXCP sədri Əli Kərimli olub. O, ironik tərzdə onları aşağılayıb və adlarını “islah olunmuş mühacirlər” kimi hallandırıb. Məhz bu cür yanaşmadan sonra konstruktivlik ortaya qoyan mühacirlərə qarşı virtual məkanda AXCP-nin troll dəstələri tərəfindən hücumlar təşkil edilib.
Gəlin, Emin Millinin yazdığı fikirlərə diqqət edək: “Bu günlərdə mənə yüzlərlə insan zəng etdi, publik yazdı, şəxsi mesaj göndərdi, mənim yeni mövqeyimi və strategiyamı dəstəklədi. Bu insanlar mənə şəxsən kosmik bir enerji verdilər, çətin bir məqamda yenidən etibar etdilər.
Bu insanların arasında çoxdan tanıdığım insanlar oldu, amma daha çox tanımadığım insanlar var. Sadəcə, müzakirələri izləyib mənə dəstək verən insanlar.
Onlar həm dünyada ən uğurlu, həm də Azərbaycanda çox uğurlu, amma mən dediyim ilk növbədə iqtisadi islahatları görmək istəyən və vətənini sevənlərdir. Onlar həm də ən sadə azərbaycanlılardır.
Hamınıza təşəkkürümü bildirirəm! Nə qədər çətin olsa da, Azərbaycanın dünyada ən müasir, ən inkişaf etmiş bir ölkə olmağı üçün canımdan da, eqomdan da, "hörmətimdən də” (respecyability) keçməyə hazıram və bunu ömür boyu sübut etmişəm və bundan sonra da edəcəm”.
Əli Kərimli yumşalan mühacirlərə qarşı niyə belə radikal mövqe sərgiləyir və məqsədi nədən ibarətdir?
Samir Adıgözəlli: “Bunun da başında Əli Kərimli durur”
Beynəlxalq Diaspor Mərkəznin (BDM) aparat rəhbəri Samir Adıgözəlli “Bakı-Xəbər”ə bildirdi ki, məqsəd həmin adamların AXCP-nin siyasi orbitindən uzaqlaşmasıdır: “Son günlər gedən prosesləri biz də yaxından izləyirik. Burada Ə.Kərimlinin əsas hədəf aldığı şəxs Emin Millidir. Çünki son vaxtlar ən prinsipial mövqeni o ortaya qoyur. E.Millinin əlində təsir imkanı olan bir KİV olub. Hazırda Emin onun rəhbərliyindən uzaqlaşdığını bəyan etsə də, təsir imkanları qalmamış deyil. Ə.Kərimlini bu cür adamın hakimiyyətə olan mövqeyini dəyişməsi qane etmir. Hətta E.Milli ondan da üzr istəyəndə bunu qəbul etmədilər. Emini lağa qoydular ki, İlham Əliyevdən istədiyi üzrə haqq qazandırmaq üçün Ə.Kərimlinin də adını ora yazıblar. Emin və digər mühacirlərin öz dövlətinə qarşı yumşalan mövqeyini normal qarşılayıram. Hesab edirəm ki, bu amil Azərbaycanın xaricdəki mövqeyini də möhkəmlədəcək, diasporumuzun inkişafına müsbət təsir göstərəcək. Ə.Kərimlinin prinsipi bolşeviksayağıdır. Kim bizimlə deyilsə, demək, düşməndir. Ona görə də uzun illərdir yerində sayır. Biz demirik ki, E.Milli və digərləri tənqidi jurnalistika ilə məşğul olmasınlar. Amma öz ölkəsinə qarşı qərəzlilik olmamalıdır. Belə halların olduğunu isə Eminin özü açıq etiraf etdi və bundan peşmançılığını söylədi. Eminin ən böyük xidmətləri müxalifətə olub, amma görürsünüz ki, bugünkü mövqeyinə görə onu təhqir edirlər. Bunun da başında Ə.Kərimli durur. Siyasət, diaspor işində insanları alət kimi istifadə etmək olmaz. Hesab edirəm ki, mühacirlərimiz düz yoldadır. Onların bu cür prinsipiallığı başqaları üçün də gözəl nümunə olacaq və biz tezliklə xaricdəki soydaşlarımızın ümumi Azərbaycan maraqlarından çıxış etdiyinin şahidi olacağıq”.
Məhəmmədəli QƏRİBLİ
