Dünyanın hansı yerində yaşamasından asılı olmayaraq, hər bir azərbaycanlının üzərinə düşən əsas vəzifə Azərbaycanın dövlət maraqlarını müdafiə etmək, xalqımızın və dövlətimizin müsbət imicini formalaşdırmaqdır. Ancaq təəssüf ki, xaricdə yaşayan bəzi “azərbaycanlıyam” deyənlərin davranışlarında bunun əksini görürük. Onlar öz fəaliyyətləri, davranışları ilə Azərbaycan dövlətinin və xalqının imicinə zərbə vururlar.
Belə əxlaqsız davranışları biz Orduxan Temirxanın simasında da görürük. Azərbaycan Prezidenti İlham Əliyev Brüsseldə rəsmi səfərdə olarkən orada Orduxanın etdiyi tərbiyəsiz hərəkətlər həqiqətən də narazılıqlar doğurur. Orduxan Brüsseldə olduqca tərbiyəsiz hərəkətlər edib. Onun bu hərəkətinə ad qoymaq, əlbəttə, çox çətindir. Bu adamın sərgilədiyi hərəkətlər, işlətdiyi söyüşlər, Azərbaycan dövlətinə qarşı səsləndirdiyi təxribatçı fikirlər onun əxlaqının hansı səviyyədə olduğunu açıq şəkildə göstərdi. O burada özünü nə bir reportaj hazırlayan jurnalist kimi, nə də normal etiraz aksiyası keçirən birisi kimi təqdim edə bildi. Onun azərbaycanlıya yaraşmayan hərəkətləri, ən nalayiq formada işlətdiyi ifadələr hadisə yerinin yaxınlığında olan Brüssel sakinlərinə də qəribə təsir bağışladı ki, bu adam niyə tərbiyəsizcəsinə qışqırır? Orduxanın söyüş videosunda diqqətçəkən məqamlardan biri odur ki, onun qışqırığına gələn Brüssel polisinə o yalan satır. Orduxan söyüş söyərkən polis ona yaxınlaşdıqda o, Azərbaycan Prezidentinin kortecində olan adamları göstərərək ingilis dilində “mən burada kino çəkirəm, bunlar mənə mane olur” deməsi onun öz tərbiyəsizliyini həyata keçirmək üçün hər cür varianta əl atdığının əyani sübutudur.
- Bəhruz Quliyev: “Onun istəyi odur ki, təki Azərbaycan dövlətinin, xalqının imici korlansın”
Orduxanın Brüssel küçəsində söyüş söyməsi, qışqırması, hər cür əxlaqsız sözlər danışmasının Azərbaycan dövləti və xalqı haqqında yanlış təsəvvür yaratmağa xidmət etdiyini deyən ekspertlər hesab edirlər ki, o, xarici ağalarından aldığı pulları tam mənimsəmək üçün Azərbaycan dövlətinin, xalqının “qara obrazı”nın yaradılması üçün əlindən gələni edir. Onun bu addımının birbaşa missionerlik fəaliyyəti ilə bağlı olduğunu deyən “Səs” qəzetinin və eyni adlı informasiya agentliyinin rəhbəri, siyasi icmalçı Bəhruz Quliyev “Bakı-Xəbər”ə bildirdi ki, Orduxan və onun kimi insanların nə vətəndaşlıq mövqeyi var, nə də milli təəssübkeşlik hissi. “Bilirsiniz, məni həmişə bir maraqlı sual düşündürür: insan öz vətənini sevməlidirmi? Bu suala hamı birmənalı şəkildə “bəli, sevməlidir” cavabını verir. Hər bir vətəndaş öz dövlətinin və xalqının qarşısında cavabdehlik daşıyır. Kimliyindən asılı olmayaraq, hər bir insan dərk etməlidir ki, hansı dövlətin vətəndaşıdır, hansı xalqın nümayəndəsidir. Heç olmasa insanda bir vətənpərvərlik hissi, vətəndaşlıq mövqeyi olmalıdır. Sən nə qədər aşağılıq biri olasan ki, öz dövlətinin atributları, dövlətin, dövlətçiliyin, xalqın haqqında kənar bir ölkədə olmazın hərəkətlər edəsən, ağıla sığmayan söyüşlər işlədəsən, heç kimin qəbul edə bilmədiyi davranışlar sərgiləyəsən. Orduxanın bu tərbiyəsiz davranışı adamda iki sual yaradır: birincisi, ya bu adamın içində Azərbaycan xalqına və Azərbaycan dövlətinə qarşı iyrənc hisslər, antipatiya var və bu iyrəncliyi çıxarmaq üçün belə söyüşlərdən, əxlaqsız davranışlardan istifadə edir, ikincisi isə o adamın kənardan idarə olunması məsələsidir. Yəni o, müxtəlif qrupların maraqlarına xidmət etmək məqsədilə bu addımı atıb. O, müəyyən qüvvələrin onun üzərinə qoyduğu iyrənc missiyanı yerinə yetirir. Bu adam Azərbaycan dövlətinə, xalqına qarşı belə ehtirasla antipatiya nümayiş etdirir. Bu da onunla bağlıdır ki, o, kiminsə, hansısa qüvvələrinsə sifarişini yerinə yetirir, ona verilən maliyyəni silmək üçün bu addımı atır. Normal təfəkkürlü, davranışlı vətəndaş, azərbaycanlı öz dövlətinə, dövlət atributlarına, xalqına qarşı bu addımları atmaz, əxlaqsız davranışlar sərgiləməz. Ola bilsin ki, kimsə müxalif fikirlidir, amma bu ona əsas vermir ki, o, kənar bir ölkədə durub dövləti söysün, ittiham etsin, dövlət atributlarını təhqir etsin. Orduxan və Orduxan kimi bir neçə ünsür var ki, onlarda heç bir məhdudiyyət yoxdur. Yəni Orduxan kimilərinin daxilində nə vicdan, nə milli təəssübkeşlik, nə də vətənpərvərlik hissləri var. Yəni onlar o qədər iyrənc bir yol gedirlər ki, şeytanla da əməkdaşlıq etməyə hazırdırlar. Onun istəyi odur ki, təki Azərbaycan dövlətinin, xalqının imici korlansın, onlar haqqında yanlış təsəvvürlər formalaşdırılsın, bu iyrənc missiyanı da Orduxan kimiləri yerinə yetirsin”.
- Niyaməddin Orduxanlı: “O bununla Azərbaycan xalqının və dövlətinin mənfi imicini yaratmağa nail olmaq istədi, lakin buna nail ola bilmədi”
BAXCP-nin sədr müavini Niyaməddin Orduxanlı da hesab edir ki, Orduxanın Brüsseldə sərgilədiyi hərəkətlər birbaşa Azərbaycan xalqının və dövlətinin xarici ölkələrdə “qara obrazı”nın cızılmasına xidmət edir. “Əslində, Orduxan Azərbaycan əleyhinə fəaliyyət göstərən bir sıra qrupların, güc mərkəzlərinin casus şəbəkəsinin üzvüdür. Yəni o qruplar məqsədli şəkildə hər zaman Azərbaycan dövlətinin nüfuzunun korlanmasında, mühüm beynəlxalq tədbirlərin keçirildiyi binaların qarşısında, Azərbaycan rəsmilərinin iştirak etdiyi tədbirlərdə bu tip adamlardan ölkəmizin əleyhinə istifadə edirlər. Bilirsiniz ki, Orduxan özü Hollandiyada yaşadığını və bu ölkənin vətəndaşı olduğunu bildirir. Amma Brüsseldə Azərbaycanın Avropa İttifaqı ilə Assosiativ saziş imzalaması ərəfəsində Orduxanın orada peyda olması, Azərbaycan dövlətinin əleyhinə bu cür mədəniyyətsiz, əxlaqdan kənar hərəkət etməsi nifrətlə qarşılanır. O burada bir küçə uşağı kimi hərəkət etdi. Orduxanın apardığı bu kampaniya tərbiyəsi olmayan Orduxana yaraşan hərəkətdir. Çünki Orduxanın tərbiyəsi buna imkan vermir ki, o özünü sivil qaydada aparsın. Məqsəd tamamilə başa müstəvidədir. Məqsəd Orduxanın timsalında bir sıra dövlətlərin rəhbərlərinin tədbirdə iştirak etdiyi bir məqamda “azərbaycanlı” adı Azərbaycan dövlətinin və xalqının əleyhinə istifadə olunan adamların görüntüsünü yaratmaqdır. Bu da Orduxan tipində öz təsdiqini tapdı”.
N.Orduxanlı qeyd etdi ki, xarici ölkələrdə keçirilən beynəlxalq tədbirlərdə olduğu zaman bir dəfə də olsun ermənilərin Ermənistan dövlətinin maraqları əleyhinə çıxışının şahidi olmayıb. “Siz görün ki, Orduxan nə qədər satılmış bir ünsürdür ki, yüzlərlə ölkənin başçısının təmsil olunduğu bir tədbirdə öz xalqının, dövlətinin, dövlət atributlarının əleyhinə danışır, onları təhqir edir. O, Azərbaycanın təəssübünü çəkən olsaydı, orada Paşinyandan uzun illərdir işğal altında saxladıqları torpaqlarımızın geri qaytarılmasını tələb etməliydi, amma erməni dəyirmanına su tökərək öz dövlətimizi hədəfə götürdü. Bu da təsadüfi deyil. O, aldığı təlimatlara əsasən, bu cür əxlaqdan kənar hərəkətlərə yol verdi. Orduxan erməni lobbisinin və Azərbaycanı istəməyən digər qüvvələrin tapşırığı və maliyyəsi hesabına ölkəmizə, xalqımıza qarşı belə nalayiq hərəkətlər etdi. O bununla Azərbaycan xalqının və dövlətinin mənfi imicini yaratmağa nail olmaq istədi, lakin buna nail ola bilmədi. Çünki onun bu hərəkətlərinin mahiyyətinin nə olduğunu hər kəs bilir və hamı da ona nifrət edir” - deyə N.Orduxanlı vurğuladı.
İradə SARIYEVA
.jpg)
