Rusiya Federasiyası Xarici İşlər Nazirliyinin "Nasizmin qəhrəmanlıq səviyyəsinə qaldırılması, nasizmin, neonasizmin və irqçiliyin, irqçi ayrıseçkiliyin, ksenofobiya və əlaqəli dözümsüzlüklərin artımına kömək edən digər praktikaların yayılması ilə bağlı vəziyyət haqqında" hesabatında Ermənistan və Azərbaycan haqda qeydlər var.
Hesabatda bildirilir ki, Ermənistanın keçmiş hakim Respublika Partiyası “ifrat millətçi” kimi tanınan və barəsində Üçüncü Reyxlə əməkdaşlıq haqda informasiya olan Qaregin Njde kimi ziddiyyətli siyasətçinin xatirəsini əbədiləşdirmək üçün addımlar atıb.
Məruzədə dəqiqləşdirilir ki, Ermənistanın millətçi oriyentasiyalı siyasi təşkilatları arasında keçən ilin payızında siyasi partiya kimi qeydiyyatdan keçmiş “Sasna Tsrer" də var. Onun ideologiyasının əsasında "cinayətkar rus-türk sövdələşməsindən törənmiş" (Moskva müqaviləsi, 1921-ci il) Ermənistan Respublikasının tanınmasından imtina və "yeni dövlətin yaradılması" uğrunda mübarizə durur: “Partiyanın elan etdiyi məqsədlər ölkənin mövcud ərazisi və Dağlıq Qarabağ da daxil olmaqla, "yeni bir Ermənistan yaradılması" və milli referendum yolu ilə vətəndən kənarda yaşayan ermənilərin birləşdirilməsidir. Partiyanın proqram sənədlərində "rus müstəmləkəçiliyi tərəfindən pozulduğu" iddia edilən hüquqların bərpası, “Naxçıvanın və Axuryan çayının qərbinin" erməni idarəçiliyinə qaytarılması məsələsi vurğulanır”.
Nazirlik xatırladır ki, bu partiyanın tərəfdarları 2016-cı ilin iyulunda PPX polisinin İrəvan şəhərindəki binasına silahlı hücum edib, onu ələ keçirib və nəticədə iki polis öldürülüb. Ötən ilin dekabr ayında keçirilmiş parlament seçkilərində bu partiya 1,82% səs qazanıb.
Hesabatın Azərbaycana həsr olunmuş bölməsində isə deyilir ki, Azərbaycan Respublikasında neonasizmin, irqçiliyin, irqçi ayrıseçkiliyin və ksenofobiyanın təzahürləri praktik olaraq yoxdur. Azərbaycan rəhbərliyi ölkəni "müxtəlif millətlərin və dinlərin nümayəndələrinin tolerant dövləti" kimi tanıdıb.
Rusiya Federasiyasının Xarici İşlər Nazirliyində vurğulayırlar ki, nasizm üzərində qələbədə sovet xalqının rolu haqqında tarixi yaddaşın saxlanması, eləcə də İkinci Dünya Müharibəsinin tarixinin saxtalaşdırılması və nasizmin qəhrəmanlaşdırılması cəhdlərinə qarşı mübarizə məsələlərində Azərbaycan Rusiyanın yanaşmalarını bölüşür. Ötən il Azərbaycan BMT Baş Assambleyasının "Nasizmin qəhrəmanlıq səviyyəsinə qaldırılmasına, müasir dövrün irqçilik, irqi ayrıseçkilik, ksenofobiya və əlaqəli dözümsüzlüklərin artmasına kömək edən digər praktikalara qarşı mübarizə" adlı qətnaməsini bəyənib.
Rusiya Xarici İşlər Nazirliyi belə bir məqama da diqqət çəkir ki, Azərbaycan Respublikasının Cinayət Məcəlləsinə uyğun olaraq, milli, irqi və dini nifrət səbəbləri ilə cinayət törətmək cəza seçilərkən ağırlaşdırıcı hal hesab olunur.
Rusiyanın rəsmi dairələrinin Ermənistandakı vəziyyətlə bağlı belə həyəcan təbili çalması və bunun fonunda, Azərbaycanla bağlı müsbət münasibət aşılamasını necə dəyərləndirmək olar?
- Elşən Həsənov: “Məhz Paşinyanın hakimiyyəti dönəmində Njdedən də təhlükəli olan, türk diplomatlarını qətlə yetirən ASALA canısinin nəşi Ermənistana gətirildi”
Azərbaycan Sosialist Partiyasının sədri Elşən Həsənov qəzetimizə açıqlamasında bildirdi ki, hesabatla yaxından tanışdır: “Çox doğru məqamlar təsbit edilib. Ancaq ermənilərin faşistlərə rəğbəti ilə bağlı keçmiş siyasi rəhbərliyin mövqeyi xüsusilə qabardılır. Biz görürük ki, Paşinyan hakimiyyətə gələndən sonra həmin irsdən imtina etməyib. Əksinə, həmin təbliğatı daha da gücləndirib. Məhz Paşinyanın hakimiyyəti dönəmində Njdedən də təhlükəli olan, türk diplomatlarını qətlə yetirən ASALA canısinin nəşi Ermənistana gətirildi. Gələcəkdə ona da abidə ucaltmaq fikirləri var.
Ermənistan parlamentinin sabiq vitse-spikeri Eduard Şarmazanov Paşinyanda Hitlerin əlamətlərini gördüyünü açıqlayıb. Onun sözlərinə görə, bu şəxs Ermənistanı faşist Almaniyasına çevirmək istəyir. Bununla sübut olunur ki, Ermənistan dövlət ideologiyasında faşist xəttindən heç vaxt imtina etməyib. Njdenin heykəlini İrəvanda ucaltmaqla və abidənin ölkənin digər yerlərində də qoyulacağını bəyan etməklə, Ermənistan öz dövlət ideologiyasını simvolik formada olsa da, möhkəmləndirmək istəyir. Bununla həm də Rusiyaya göstərmək istəyirlər ki, Ermənistan ideoloji planda qətiyyən Rusiya Federasiyasının təbliğ etdiyi siyasi və mənəvi idealların təsiri altında deyil.
Müasir Ermənistan erməni millətçisi Qaregin Njdenin faşist ideologiyasını təcəssüm edir. Ermənistanın hakim rejimləri məhz bu ideologiyaya sadiqlik nümayiş etdirirlər. Bu insan Hitler Almaniyasının təbliğat nazirliyi ilə əməkdaşlıq edib. Hitler ideologiyasını erməni dilinə köçürən ideoloqlardan biri olub. Njdenin fikirləri ilə idarə olunan xeyli sayda etnik erməni Vermaxt mühafizə batalyonuna qoşulub. Unutmayaq ki, Krım yarımadasının yəhudi, ümumilikdə, yəhudi əhalisinə qarşı kütləvi repressiyaları məhz Vermaxt batalyonundan olan erməni hərbçilər həyata keçiriblər. Qaregin Njde türklərə qarşı da vuruşub. Buna görə də ermənilərin azərbaycanlı, türkiyəli, qazax, özbək və digər türkdilli xalqlara göstərdiyi mənfi münasibət təəccüb doğurmur. Ermənistanda faşizmin qəhrəmanlaşdırılmasını qınayacaq sosial qrup yoxdur. Yeni nəsil Njde və digər qəhrəman adlandırılan şəxslərin ideologiyasının təbliğatı altında böyüyür. Hesab edirəm ki, Rusiya rəsmiləri bu məsələnin üstünə bir az da ciddi getməlidirlər. Yalnız bir rəsmi bəyanatla hər şeyi bitmiş saymaq olmaz. Görün ermənilər nə qədər harınlayıblar ki, faktiki olaraq, ruslarla düşmən mövqedə olan Njdenin heykəlini Rusiya ərazisində də ucaltmağa çalışırlar. Hesabatda doğru olaraq vurğulanıb ki, Azərbaycanda belə meyllər yoxdur”.
Məhəmmədəli QƏRİBLİ
.jpg)
