İşğlaçı Ermənistanda hadisələrin inkişaf axarı bu ölkədə yaxın tezlikdə ciddi daxili qarşıdurmaların olacağını göstərir. Bunun isə həm siyasi, həm də sosial-iqtisadi səbəbləri mövcuddur. Əvvəla, mövcud hakimiyyətə qarşı olan qüvvələr, xüsusən də “Qarabağ klanı” Nikol Paşinyanı devirmək üçün indi bütün qüvvələrini səfərbər etməyə başlayıb. Digər tərəfdən, Ermənistanda pisləşən sosial-iqtisadi vəziyyət “Qarabağ klanı”nın hakimiyyətə qarşı daha aktiv fəadiyyətə keçməsinə və özünə dəstək qazanmasına imkan yaradır.
İndilikdə görünən budur ki, “Qarabağ klanı” yaxın tezlikdə Paşinyanı devirmək üçün daha mütəşəşkil qaydada hərəkət etməyə start verəcək. “Past” qəzeti bu xüsusda yazır ki, yaxın günlərdə Ermənistanın siyasi meydanında kifayət qədər ciddi və perspektivli yeni siyasi partiya ortaya çıxacaq. Məlumata görə, bu partiyada, əsasən, ictimaiyyətdə məşhur olan şəxslər toplanacaq. Qəzet partiyanın daha çox intellektual kəsim arasında fəaliyyətini genişləndirəcəyini və əyalətlərdə işə böyük əhəmiyyət verəcəyini bildirib. Qeyd edək ki, bundan öncə Ermənistanın eks-prezidenti Robert Köçəryan yeni partiyanın ortaya çıxacağını və onun Paşinyana böyük zərbə endirəcəyini bildirmişdi. Bundan öncə Köçəryan “Reuters” agentliyinə məktubla verdiyi müsahibədə qüvvətli müxalif güclərin Paşinyana qarşı birləşəcəyini deyib.
Özünün həbsini siyasi motivlərlə əlaqələndirən Köçəryan qeyd edib ki, indi Ermənistanda Paşinyana qarşı yeni siyasətçilər və siyasi partiyalar meydana çıxır. O bu siyasi qüvvələrlə birləşəcəyi ehtimalı ilə bağlı suala da müsbət cavab verib, lakin bunun hansı formada olacağına aydınlıq gətirməyib. “Məxməri inqilabın” heç də inqilab olmadığını və xalqın artan narazılığının nəticəsi olduğunu deyən Köçəryan vurğulayıb ki, Paşinyanın hakimiyyəti dövründə ölkədə müsbət istiqamətdə heç bir dəyişiklik baş verməyib: “Yalnız populizm, rəhbərlikdə diletantlıq və cəmiyyətdə aqressiya artıb”. Gözlənir ki, Paşinyana qarşı yaranacaq yeni partiyaya da məhz Köçəryan rəhbərlik edəcək. Bunu nəzərə alan Paşinyan isə onu həbsdə saxlamaqla neytrallaşdırmağa çalışır. Elə bunun nəticəsidir ki, Köçəryan, eləcə də sabiq müdafiə naziri Seyran Ohanyan, müdafiə nazirinin keçmiş müavini, Kollektiv Təhlükəsizlik Müqaviləsi Təşkilatının keçmiş katibi Yuri Xaçaturov və Ermənistanın baş nazirinin keçmiş müavini Armen Gevorkyanın artıq məhkəməsi keçirilir. Xatırladaq ki, Nikol Paşinyan Ermənistanın baş naziri olandan sonra 2008-ci ilin 1-2 mart hadisələrinə görə cinayət işi təzələnib. O vaxt prezident olmuş Robert Köçəryan məsələ ilə bağlı 2018-ci il iyulun 27-də həbs olunub. Adları yuxarıda qeyd edilənlər konstitusiya quruluşunu devirmək və külli miqdarda rüşvət almaq, qanunsuz yolla əldə edilən vəsaitləri leqallaşdırmağa görə mühakimə olunur. Bundan başqa, Köçəryan həm də iş adamı Silva Ambarçumyandan 2 milyon dollar rüşvət alma iddiası ilə mühakimə olunur. Köçəryanın vəkillər komandasının üzvü Artyom Orbelyan bildirib ki, Silva Ambarçumyanın verdiyi ifadələr şər-böhtan xarakteri daşıyır: “Onun şəxsən Köçəryanla heç bir əlaqəsi olmayıb və onlar heç vaxt görüşməyib. Paşinyan keçmiş rəqiblərindən qisas alırsa, o zaman nə üçün ölkənin digər rəhbər şəxslərinə qarşı ittihamlar irəli sürülmür”.
Qeyd edək ki, ərəb ölkələrində biznesi olan Silva Ambarçumyan keçən ilin noyabrında Ermənistana dəvət olunaraq xüsusi istintaq komitəsində dindirilib. Sonra onun Robert Köçəryanla üzləşməsi prosesi təşkil edilib. Silva Ambarçumyan bir daha bildirib ki, Köçəryan sabiq xarici işlər naziri Vardan Oskanyının vasitəçiliyi ilə “1 mart” hadisələrindən əvvəl ondan 2 milyon dollar alıb. Köçəryanın cinayət materialına bu maddə də əlavə edilərsə, o zaman onu ömürlük həbs gözləyir. Bütün bunlar Köçəryanın Paşinyana qarşı daha effektiv siyasi mübarizə aparmasını əngəlləyir. Amma görünən budur ki, “Qarabağ klanı” ümumiyyətlə geri çəkilmək istəmir və onlar Paşinyanı devirməkdə israrlıdır. Bu səbəbdəndir ki, klanla Paşinyan arasında münasibətlər sürətlə pisləşir. Bunu sabiq iqtidar partiyası olan Respublika Partiyasının mətbuat katibi Eduard Şarmazanov da təsdiq edir. O, hətta Qarabağdakı separatçı rejimin də bu çəkişmənin əsas hədəflərindən biri olduğunu vurğulayır: “Nikol Paşinyan yenə də cəmiyyəti inqilabçılar və əksinqilabçılar olmaqla iki hissəyə ayırır və bu dəfə Qarabağı inqilabla təhdid edir”. O qeyd edib ki, tarix bu gün bizə müxtəlif hay-küylü xadimləri xatırladır: “Hansılar ki, hakimiyyətə gəldikdən sonra islahatlar aparmaq və ictimaiyyəti birləşdimək əvəzinə əks fəaliyyətə yol verərək, ölkə daxilində bölücü xətlər çəkib və iş görmək əvəzinə represiyalar aparıb”. Şarmazanov belə tarixi faktlara nümunə olaraq Rusiyada bolşevikləri və ya Almaniyada, İtaliyada milli sosialistləri, yaxud faşistləri göstərib:
“Çox təəssüf ki, eyni xətt üzrə Ermənistanın inqilab komitəsinin rəhbəri Paşinyan da hərəkət edir. 9 mayda bütün xalqı birləşdirməli olan may bayramı günləri idi. Lakin gəlin görün, işğal altında olan Qarabağda “milli qəhrəmanlar”ın yüksək dəyərləndirilməsi dövrümüzün diktatorunun xoşuna gəlməyib. Bu reallıqdan əsəbiləşən Nikol ictimaiyyəti növbəti dəfə inqilabçılar və əksinqilabçılar olmaqla ikiyə bölür və bu dəfə Qarabağı inqilabla təhdid edir. Sağa-sola təhdid etməyin, məqsədyönsüz mətbuat konfranslarında bağırmağın və uşaqlıq arzuları həyata keçməyən ləçər uşaq kimi özünü aparmağın artıq yetərlidir. Nəhayət, sənin fikrini bölüşməyən insanların olduğu və sənin hörmətsiz addımların nəticəsində artacağı ilə barışmalısan. Bu insanlar sənin keyfiyyətsiz və məzmundan kənar kabab yeməyin, asfalta sərilməyin, bağırmağın, velosiped sürməyin siyasəti ilə həmrəy deyillər. Hələ ki, prinsipial xadimlər və insanlar olduğunu dərk etməyin zamanıdır. Amma bizdə canavar üzərinə qoyun dərisi keçirib, quzuları qoruyan nəzarətçiyə çevrilib. Xoruz təbliğatçı geyimi əynində tribunaya çıxıb ağıl aşılayır”. Bütün bunlar bir daha Ermənistanda daxili qarşıdurmanın yenidən özünün pik həddinə çatmaqda olduğunu göstərir.
Nahid SALAYEV
