18/06/2019 13:35
728 x 90

Ermənistan Rusiyanın təhlükəsizlik çətirini ABŞ-a dəyişir - MTŞ katibinin ABŞ-da məxfi görüşlərinin pərdəarxası...

“Paşinyan bu yeniliyi Rusiya ilə münasibətlərə kölgə salmamaq şərtinə uyğun olaraq, ehtiyatla həyata keçirir”

img

Ermənistanın Təhlükəsizlik Şurasının katibi Armen Qriqoryan ABŞ-a səfər edib. Onun Vaşinqtonda ABŞ Prezidenti Donald Trampın xüsusi işlər üzrə köməkçisi, Milli Təhlükəsizlik Şurasının baş direktoru, Rusiya məsələləri və Avrasiya Şurasının milli təhlükəsizlik üzrə direktoru ilə görüşdüyü bildirilir.

Məlumatı Ermənistanın Təhlükəsizlik Şurası yayıb. Bildirilir ki, Vaşinqtonda keçirilən görüşdə Dağlıq Qarabağ münaqişəsinin tənzimlənməsi məsələsi müzakirə olunub. Tərəflər münaqişənin dinc yolla həllinin vacibliyini vurğulayıblar. Görüşdə ABŞ-ın Ermənistana sərmayə və maliyyə dəstəyi göstərməsi məsələsi də müzakirə edilib.

Qeyd edək ki, ABŞ-ın İrəvandakı səfiri Linn Treysi Ermənistanın Baş naziri Nikol Paşinyanın anti-Amerika bəyanatlarından narazı qaldığını bildirmişdi. L.Treysi ABŞ-ın son 28 ildə Ermənistana 2 milyard dollara yaxın sərmayə qoyduğunu qeyd etmişdi. Bu mənada son aylar Rusiyaya yaxınlaşmaq yönündə böyük məsafə qət eləmiş Paşinyanın Rusiya əleyhdarı kimi tanınan Qriqoryanı Amerikaya səfərə göndərməsi və ona xüsusilə vacib məsələlər ətrafında müzakirələr aparmağa mandat verməsi maraqlı görünür. Sanki belə qənaət hasil olur ki, artıq Paşinyan KTMT çərçivəsində ona verilən təhlükəsizlik təminatından razı deyil. Bu səbəbdən də  Rusiyanın təhlükəsizlik çətirini ABŞ-a dəyişmək istiqamətində səylərə başlayıb. Bununla Paşinyan, eyni zamanda, ABŞ-a müstəqil olduğunu, Rusiya ilə hesablaşmadığını da nümayiş etdirmək istəyir. Ermənistan rəhbərliyinin dünyanın iki əsas gücü arasındakı bu reveransını necə dəyərləndirmək olar?

  • Hatəm Cabbarlı: “Hələlik ciddi bir qırılma nöqtəsi olmasa da, gələcək üçün belə niyyətin olduğu özünü göstərir”

Siyasi elmlər doktoru Hatəm Cabbarlı “Bakı-Xəbər”ə açıqlamasında bildirdi ki, Nikol Paşinyan hakimiyyətə gələndən sonra Ermənistanın xarici və daxili siyasətində müəyyən dəyişikliklərin baş verdiyini müşahidə etmək mümkündür: “Xüsusilə də Ermənistanın Avropa Birliyi ilə münasibətlərini inkişaf etdirməyə cəhdlər etdiyini görürük. Ancaq bunu da qəbul etməliyik ki, müstəqilliyini elan edəndən sonra Rusiya həmin ölkənin təhlükəsizliyinin təminatında əvəzedilməz rol oynayır. Nikol Paşinyan nə qədər də özünü qərbpərəst kimi göstərməyə çalışsa da, ölkənin son 30 il ərzində qəlibləşmiş xarici siyasətini və təhlükəsizlik anlayışını dəyişməyə gücü yetmir. Paşinyan gözəl bilir ki, proses olduqca çətindir. Hətta bu istiqamətdə edilə biləcək ciddi manevr onun hakimiyyətdən getməsi ilə nəticələnə bilər. Ona görə də Paşinyan bu yeniliyi Rusiya ilə münasibətlərə kölgə salmamaq şərtinə uyğun olaraq, ehtiyatla həyata keçirir. Bu xüsusda Ermənistanın təhlükəsizliyinə cavabdeh olan məmurun ABŞ-a səfərini, orada uyğun sahənin adamları ilə keçirdiyi görüşləri xüsusi qeyd edə bilərik. Bir neçə gün əvvəl ABŞ-ın Ermənistandakı səfiri maraqlı açıqlama verdi. O qeyd etdi ki, Ermənistan tarixi olaraq Rusiya ilə bağlı olsa da, gələcəyi Qərb və ABŞ-la əlaqəlidir”.

Siyasi şərhçinin sözlərinə görə, səfirin bu bəyanatını iki aspektdən dəyərləndirmək olar: “Belə çıxır ki, ABŞ Ermənistanın Rusiyaya daha çox bağlı olduğunu etiraf edir, amma bir sıra aspektlərdə, xüsusilə də təhlükəsizlik məsələlərində ABŞ-ın maraqları ilə üst-üstə düşən siyasət həyata keçirə biləcəyinin vacibliyinə işarə edir. Mənə elə gəlir ki, Ermənistanın uyğun sahəsi ilə bağlı məmurun ABŞ-a səfəri heç də Rusiya ilə münasibətlərə kökündən balta vurulacağı anlamına gəlmir. Amma meyllənmə işartıları özünü göstərir. Ermənistan hazırda Rusiyadan çox asılı olduğu üçün, prosesi yavaş-yavaş aparmağa çalışır. Çünki Rusiyanın bölgədəki mövcudluğu Ermənistanda özünü daha ciddi büruzə verir. Həmin ölkədə Rusiyanın hərbi bazaları mövcuddur. Bundan başqa, Ermənistan KTMT-nin üzvüdür. Düzdür, həmin qurumla aralarında ciddi problemlər olsa da, İrəvan yaxın illərdə həmin qurumu tərk etməyi planlamır. Bu baxımdan da Ermənistan Rusiyaya bağlı və ondan asılı olmasına rəğmən, Qərb dünyası və ABŞ-la təmaslarını davam etdirməyə çox maraqlıdır. Hələlik ciddi bir qırılma nöqtəsi olmasa da, gələcək üçün belə niyyətin olduğu özünü göstərir”.

Məhəmmədəli QƏRİBLİ

Son xəbərlər