25/05/2019 13:45
728 x 90

Jurnalistin peşə fəaliyyəti başında təhqir olunmasına Mətbuat Şurası da reaksiya verdisə...

Həbibə Abdulla: “Ümid edirəm ki, hər iki vəzifəli şəxs tərəfindən təhqirlərə, hədə-qorxulara məruz qalmağımla bağlı əlaqədar qurumlar lazımi addımlar atacaqlar”

img

“MŞ-yə ünvanladığım açıq məktuba MŞ rəhbərliyinin dərhal reaksiya verməsi onu göstərdi ki, bu qurum jurnalistlərin üzləşdikləri problemlərə həssas yanaşır və onun həllinə çalışır”

 

Jurnalistlərin işi problemləri obyektiv şəkildə ətraflı araşdırmaq, qarşı tərəfin də mövqeyini öyrənməklə işıqlandırmaqdır. Lakin bəzən jurnalist yazdığı yazıya görə müxtəlif vəzifəli şəxslərin hücumlarına məruz qalır. AFN saytının əməkdaşı, həmkarımız Həbibə Abdulla kimi. Məlum olduğu kimi, Həbibə Abdulla müəllimlər tərəfindən təhqir olunub.

Xanım jurnalist Gəncə Dövlət Universitetinin Etika komissiyasının və Tədrisə nəzarət komissiyasının sədri Əliqulu Quliyev, həmçinin, Bakı şəhərindəki 175 saylı orta məktəbin direktoru Tural Mirzəliyev tərəfindən təhqirə və hədə-qorxulara məruz qalıb. O bu barədə ölkəmizin Birinci vitse-prezidenti Mehriban Əliyevaya etdiyi müraciətdə geniş bəhs edib.

H.Abdullanın müəllimlər tərəfindən təhqirlərə, hədə-qorxulara məruz qalması faktına Azərbaycan Mətbuat Şurası da reaksiya verib. Qeyd edək ki, H.Abdulla qarşılaşdığı problemlə bağlı Azərbaycan Mətbuat Şurasına açıq məktubla müraciət edib.

Azərbaycan Mətbuat Şurası jurnalist H.Abdullanın müəllimlər tərəfindən təhqir olunması ilə bağlı bəyanat yayıb. Qurumun yaydığı bəyanatda bildirilir ki, söz və ifadə azadlığının təmin oluduğu, informasiya əldə edilməsi sahəsində təkmil qanunverilicik bazasının yarandığı Azərbaycanda bu ali dəyərlərə uyğun məsuliyyət kateqoriyaları və mexanizmləri müəyyənləşib. “Mövcud durumda hər kəsin, xüsusən məmurların, tutduğu mövqe və status ictimai əhəmiyyət daşıyan, cəmiyyətin diqqət mərkəzində olan vəzifəli şəxslərin üzərinə düşən konkret öhdəliklər var. Dövlətə, Vətənə sədaqət, dürüstlük və vicdanlılıq meyarları həmin öhdəliklərə yanaşma tərzinə əsasən ölçülür.

Cəmiyyətin informasiya ilə təminatında iki qütb iştirak edir ki, bunlardan biri jurnalistlərdirsə, digəri informasiya daşıyıcıları olan hüquqi və fiziki şəxslərdir. Bu iki qütbün bir-birilə münasibətlərinin düzgün qurulması, qarşılıqlı əməkdaşlığa əsaslanması yalnız etik dəyərlər baxımından prioritet göstərici deyil, eyni zamanda, qanunlarımızın tələbidir. Buna görə onların hər ikisinin fəaliyyətinə həssas yanaşması, daşıdıqları missiyanın məsuliyyətini dərindən dərk etməsi mütləq şərtdir. Təəssüf ki, cəmiyyətimizdə bunu nəzərə almayanlar da var. “Azerbaijan Favorite News” (www.afn.az) saytının əməkdaşı H.Abdulla ilə bağlı yaşanmış olay bunu deməyə əsas verir. H.Abdulla Azərbaycan Mətbuat Şurasına ünvanladığı açıq məktubunda Gəncə Dövlət Universitetinin Etika komissiyasının və Tədrisə nəzarət komissiyasının sədri Əliqulu Quliyev, həmçinin, Bakı şəhərindəki 175 saylı orta məktəbin direktoru Tural Mirzəliyev tərəfindən təhqir olunduğunu, hədə-qorxulara məruz qaldığını bildirib. Onun məsələ ilə bağlı izahatlarından gəlinən qənaət bundan ibarətdir ki, jurnalist peşə öhdəliklərinə uyğun işin icrasına məsuliyyətlə yanaşdığı halda, nalayiq münasibətlə üzləşib.

Mətbuat Şurası jurnalistlərin səlahiyyətlərindən irəli gələn fəaliyyəti yerinə yetirmələri zamanı hər hansı xoşagəlməz rəftarla, qanunsuzluqla üzləşmələri faktlarını qətiyyətlə pisləyir. Şuranın H.Abdulla ilə bağlı duruma yanaşması da eyni mövqedən qaynaqlanır. Heç bir halda cəmiyyətdə elə təəssürat yaranmamalıdır ki, hansısa media orqanının əməkdaşı peşə vəzifəsini icra edərkən təhqirə və hədə-qorxuya məruz qala bilər. Buna dair şübhənin olması belə demokratik cəmiyyət quruculuğu prinsiplərinə zidd təmayüldür. Tutduğu statusdan asılı olmayaraq, hər bir vəzifə sahibinin məsələni məhz bu kontekstdə dəyərləndirməsi mütləqdir” - deyə sənəddə vurğulanır.

Mətbuat Şurası müvafiq dövlət qurumlarını jurnalist H.Abdulla ilə bağlı məsələni diqqətdə saxlamağa, insidenti dərindən araşdırmağa çağırıb. Şura əmindir ki, günahkarların qanunlarımız çərçivəsində məsuliyyət daşımalarının təmin olunmasına həssas yanaşılacaq, bu istiqamətdə zəruri ölçü götürüləcək.

  • “Bütün bunlarla bağlı daxili işlər naziri Ramil Usubova və baş prokuror Zakir Qaralova da açıq məktub ünvanlamışam”

Həmkarımız H.Abdulla “Bakı-Xəbər”ə açıqlamasında bildirdi ki, Mətbuat Şurasının hadisəyə operativ reaksiya verməsi məsələnin həllinə müsbət təsir göstərəcək. “Mənim Mətbuat Şurasına (MŞ) ünvanladığım açıq məktuba MŞ rəhbərliyinin dərhal reaksiya verməsi onu göstərdi ki, bu qurum jurnalistlərin üzləşdikləri problemlərə həssas yanaşır və onun həllinə çalışır. Üzləşdiyim problemə həssas yanaşdıqlarına və operativ reaksiya verdiklərinə görə MŞ sədri Əflatun Amaşov başda olmaqla hər kəsə təşəkkür edirəm. Ümid edirəm ki, hər iki vəzifəli şəxs tərəfindən təhqirlərə, hədə-qorxulara məruz qalmağımla bağlı əlaqədar qurumlar lazımi addımlar atacaqlar. Mən bir jurnalist kimi konkret faktlar araşdırmışam, qarşı tərəfin də mövqeyini öyrənərək bunu yazıda əks etdirmişəm.

Çox təəssüf ki, son vaxtlar jurnalistlər bəzi vəzifəli şəxslər tərəfindən tez-tez təhqir və təhdid hədəfi olurlar. Bu durum əfsuslar olsun ki, məndən də yan keçməyib. Müəllim adı daşıyan insanlar haqlarında peşə etikasının əsası olan qarşı tərəfin mövqeyi prinsipini qorumaqla yazdığım yazıya görə mənə ağır təhqir ünvanladılar. Tural Mirzəliyevin məktəbində baş verdiyi bildirilən insident haqda özünün rəyini alaraq yazı yazmışdım, gedib şəxsimə qarşı əxlaq söhbəti edib. Bu haqda Təhsil Nazirliyi rəsmiləri ilə söhbətim oldu, çox təəssüf ki, şəxsi söhbətlərdə direktorun uyğun rəftar sərgiləmədiyini dedilər, amma rəsmi mövqe bildirmədilər. Mən direktorun şəxsi həyatı haqda yazı yazmamışdım, onu nəinki təhqir, heç tənqid də etməmişdim o yazıda, amma təhqirlə cavab verdi. Əliqulu Quliyev haqda da daxil olan şikayət məktubunu özünün rəyini almaqla işıqlandırmışam, 1 ildən də çox müddət keçdikdən sonra zəng edib ağır sözlərlə məni təhqir edib, yazını çıxarmayacağım təqdirdə "başıma oyun açacağı" ilə hədələyib. Özü də GDU-nun Etika komissiyasının sədridir. Bütün bunlarla bağlı daxili işlər naziri Ramil Usubova və baş prokuror Zakir Qaralova da açıq məktub ünvanlamışam. Ümid edirəm ki, bu qurumlar tərəfindən mənə qarşı baş verənlər ətraflı şəkildə araşdırılacaq və məsələyə hüquqi qiymət veriləcək” - deyə H.Abdulla qeyd etdi.

İradə SARIYEVA 

Son xəbərlər