Məlum olduğu kimi, Silahlı Qüvvələrin Ali Baş Komandanı İlham Əliyevin təsdiq etdiyi plana əsasən, mayın 20-dən 24-dək Azərbaycan Ordusunun müxtəlif qoşun növlərinin, birlik və birləşmələrin cəlb edilməsi ilə genişmiqyaslı əməliyyat-taktiki təlimləri keçiriləcək.
Təlimin əsas mövzusu düşmənin gecə vaxtı hücumunun dəf edilməsi, müxtəlif istiqamətlərdə ona əks zərbələrin endirilməsi və qoşunlarımızın hücuma keçməsidir. Təlimlərə 10 minədək şəxsi heyət, 150 tank və digər zirehli texnika, 200-dək müxtəlif çaplı raket və artilleriya qurğusu, yaylım atəşli reaktiv sistemləri və minaatan, 35 təyyarə və helikopter cəlb olunacaq.
Çətin relyef, gecə vaxtı və mürəkkəb radioelektron şəraitdə müxtəlif poliqonlarda keçirilən döyüş atışlı təlimlərdə tank, aviasiya, raket və artilleriya hissələri, eləcə də digər döyüş elementləri arasında uzlaşmanın təşkili, düşmənin müdafiəsinin dərinliyində desant və xüsusi manevr qüvvələrinin tətbiqi, idarəetmə orqanlarının bacarıqlarının təkmilləşdirilməsi, o cümlədən, şəxsi heyətin mənəvi-psixoloji təminatı məsələləri üzrə tapşırıqlar yerinə yetiriləcək. Bütün fəaliyyətlər təlimlərdə iştirak edən qoşunların gecə və çətin iqlim şəraitində dəqiq qarşılıqlı əlaqəsinin təmin edilməsi ilə icra olunacaq.
O da məlumdur ki, Ermənistanın Baş naziri Nikol Paşinyan Dağlıq Qarabağ danışıqları ilə bağlı sərsəm açıqlamalar verməkdə davam edir. O, Azərbaycanla Ermənistan arasında atəşkəsin imzalanmasının 25 illiyi ilə əlaqədar verdiyi bəyanatda qeyd edib ki, guya separatçı qurum indiyə qədər danışıqlarda iştirak etmədiyinə görə münaqişə həll edilməyib. Paşinyan yenə əvvəlki ritorikadan çıxış edərək separatçı qurumun danışıqlara qatılmasını qabardıb. Bu isə Dağlıq Qarabağ danışıqlarının ruhuna zidd bir yanaşmadır. O baxımdan, Azərbaycan Ordusunun genişmiqyaslı hərbi təlimlərə hazırlaşması Paşinyanın Qarabağla bağlı məlum bəyanatına cavab tədbiri sayıla bilərmi?
Aydın Mirzəzadə: “Ehtiyat edirlər ki, keçirilən hərbi təlimlər sonrakı mərhələdə hərbi əməliyyatlara keçə bilər”
Məsələyə münasibət bildirən millət vəkili Aydın Mirzəzadənin sözlərinə görə, Azərbaycan hər dəfə hərbi təlimlər keçirəndə Ermənistan bundan narahat olur: “Azərbaycanın siyasətində vaxtaşırı daha çox hərbi şəxsi heyət və texnikanın cəlb edilməsi ilə hərbi təlimlərin keçirilməsi nəzərdə tutulub. Keçirilən hər bir hərbi təlim Ermənistanda çox böyük narahatlığa səbəb olur. Ehtiyat edirlər ki, keçirilən hərbi təlimlər sonrakı mərhələdə hərbi əməliyyatlara keçə bilər. Eyni zamanda, bütün bunlar Ermənistan cəmiyyətində hakimiyyətə böyük bir inamsızlıq yaradacaq. Çünki Ermənistanın bu gün Azərbaycana əks qoya biləcək hərbi potensialı yoxdur. Ona görə də Paşinyan nə qədər pozucu xarakterli bəyanatlar versə də, Ermənistanın narahat olmasına kifayət qədər əsaslar var. Çünki Azərbaycan hərbi qüdrətini artırmaqla, işğal altında olan torpaqların azad edilməsi üçün ciddi hazırlıq aparır. Ona görə də Ermənistan hər an bu hərbi əməliyyatların aparılmasına hazır olmalıdır. Azərbaycan isə bir müstəqil dövlət olaraq suveren hüquqlarından istifadə edərək hərbi qüdrətini artırır, yeni silahlar əldə edərək ordunun gücünü artırır. Ermənistan bilməlidir ki, Azərbaycan heç vaxt torpaqların işğal altında qalması ilə razılaşmayacaq. Paşinyan anlamalıdır ki, separatçı qurum danışıqlarda tərəf olmayacaq. Onun bununla bağlı səsləndirdiyi fikirlərin heç bir əsası yoxdur”.
Vidadi ORDAHALLI
