Məlum olduğu kimi, Avropa İttifaqının “Şərq tərəfdaşlığı” təşəbbüsünün 10 illiyinə həsr edilən və Brüsseldə keçirilən yubiley toplantısı ilə bağlı erməni mediası Azərbaycan barədə yalan məlumat yaydı. Guya toplantıda Avropa İttifaqı ölkələrinin və “Şərq tərəfdaşlığı” təşəbbüsünə qoşulan ölkələrin xarici işlər nazirləri tərəfdaşlığın 10 illiyinə həsr edilmiş yekun bəyannamə imzalamalı idilər. Lakin sənəddə tərəfdaş ölkələrin ərazi bütövlüyünə dəstək ifadə olunmayıb və nəticədə Azərbaycan nümayəndə heyəti sənədi imzalamaqdan imtina edib.
Əslində, Brüsseldə nə baş verib? Məsələ ondadır ki, “Şərq tərəfdaşlığı”nın 10 illiyinə həsr olunmuş xarici işlər nazirlərinin görüşü ilə bağlı yekun sənədin qəbul edilməsi, ümumiyyətlə, nəzərdə tutulmyıb. Habelə, “Şərq tərəfdaşlığı”nın və Avropa İttifaqının bütün üzv dövlətləri, eləcə də Avropa institutlarının vahid sənədinin qəbul edilməsi ilə bağlı təklif irəli sürüldüyü zaman aparılmış müzakirələr prosedur xarakteri daşıyıb. Qəbul ediləcək sənədin yığcam, yoxsa əvvəlki sammitlərdə olduğu kimi geniş, əhatəli və bütün məqamlara diqqət yetirən bir sənəd olması ətrafında müzakirələr aparılıb. Azərbaycan yekun sənəd qəbul ediləcəyi təqdirdə sözügedən bəyannamədə Avropa İttifaqının bütün üzv dövlətlərinin və “Şərq tərəfdaşlığı” ölkələrinin prinsipial məsələlərinin tam şəkildə əks etdirilməsinin tərəfdarı olub. Bu xüsusda bütün “Şərq tərəfdaşlığı” ölkələrinin müstəqilliyi, suverenliyi və ərazi bütövlüyü məsələsi Azərbaycan, eləcə də Gürcüstan və Moldova tərəfindən birlikdə təklif edilib. Sadəcə, sənədi müəyyən qədər qısaltmaq məqsədilə “Şərq tərəfdaşlığı” dövlətlərinin Avropa İttifaqının institutları, eləcə də Avropa İttifaqının üzv dövlətləri ilə müzakirələri zamanı əvvəlki sammitlərin sənədlərinə istinadlar olunması və bununla da sözügedən prinsiplərin sənəddə öz əksini tapması barədə razılıq əldə edilib.
Avropa İttifaqının xarici işlər və təhlükəsizlik siyasəti üzrə ali nümayəndəsi xanım Federika Mogerini tərəfindən imzalanmış “sədrin yekun qeydləri” adlı sənəddə bütün əvvəlki sammitlərə istinadlar yer alır. Yəni bütün “Şərq tərəfdaşlığı” sammitlərində Azərbaycanın ərazi bütövlüyü, suverenliyi və müstəqilliyi birmənalı şəkildə tanınır.
Onu da qeyd edək ki, Prezident İlham Əliyev Brüsseldə səfər çıərçivəsində yüksək səviyyəli görüşlər keçirib. Bu da başda ermənilər olmaqla müəyyən bədxahları bərk narahat edir. Ola bilərmi ki, sözügedən yalan informasiyanın yayılmasında məqsəd bütün bunlara kölgə salmaq niyyəti olub? Həmçinin, bu informasiya Azərbaycanla Aİ arasında əlaqələri zəiflətmək məqsədi daşıyıb?
Məhərrəm Zülfüqarlı: “Diplomatiyamızın çevik fəaliyyəti nəticəsində bütün yalanlar ifşa edildi”
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlı bunu istisna etmədi: “Görünən odur ki, müəyyən dairələr Azərbaycanın Avropa İttifaqı ilə əlaqələrinin genişlənməsindən narahatdırlar. Çünki bu gün Avropa İttifaqı Azərbaycanın Cənubi Qafqazda önəminə xüsusi önəm verir. Prezident İlham Əliyevə Brüsseldə göstərilən böyük diqqət, keçirilən yüksək səviyyəli görüşlər deyilənlərə əyani sübutdur. Bütün bunlar müəyyən qüvvələri bərk narahat etdiyi üçün, həmin yalan informasiyanı ortaya atdılar. Ona görə belə yalan informasiya uydurdular ki, Azərbaycanın Avroittifaqla əlaqələrini korlasınlar. Ancaq buna nail ola bilmədilər. Azərbaycan diplomatiyasının çevik fəaliyyəti nəticəsində bütün yalanlar ifşa edildi. Bəzi bədxahlar öz istəklərinə çata bilmədilər. Hansı ki, istəyirdilər Azərbaycanda Avropa İttifaqına yönəlik mənfi münasibət yaransın, amma bu alınmadı. Bu baxımdan belə məqsədlərlə çıxış edənlər Azərbaycanı sevməyən qüvvələrdir”.
Vidadi ORDAHALLI
