“Mən belə müğənnilərin deputat olmasının tərəfdarı deyiləm”
Son illər Azərbaycanda bəzi şou müğənnilərinin deputatlıq kürsüsünə yiyələnməklə bağlı iddiaları bitib-tükənmək bilmir. Sənətdə heç bir uğur qazana bilməyən və ucuz yollarla populyarlıq qazanan şou-biznes nümayəndələri öz qəribə istəkləri ilə diqqəti çəkməkdədirlər. Bu gün bir çox şou müğənnisi açıqlama verərək deputat olmaq istəyində bulunur. İddia edirlər ki, xalq onları sevir və onlar parlamentdə xalqın səsinə (?) çevrilə bilərlər.
Bildiyimiz kimi, müğənni Elza Seyidcahan bir neçə dəfə parlament seçkilərində iştirak etsə də, seçicilərin dəstəyini qazana bilməyib. Xalq artisti Flora Kərimovanın da parlament seçkilərində iştirak etdiyi məlumdur. Bundan başqa, bəzi tanınmış xalq artistləri, sənət adamları deputatlıq uğrunda mübarizə aparıblar, lakin bir-iki nəfəri çıxmaq şərtilə, şou-biznesçilərə böyük tərkibdə parlamentdə təmsil olunmaq nəsib olmayıb.
Şou-biznes müğənnilərinin öz əsas işlərini buraxıb siyasətə qoşulması və anlayışları olmayan bir sahəyə meyl göstərməsi, sözsüz ki, anormal haldır. Müğənni kimi heç bir uğur qazanmayanların parlament kürsüsündə əyləşmək iddiası normal qarşılanmır.
Elza Seyidcahan, Faiq Ağayev, Samiraldo, Elitstar Cəmilə kimi şou adamlarının deputat mandatı əldə etmək istəyi ekspertlər tərəfindən birmənalı olaraq mənfi qəbul edilir. Onlar hesab edirlər ki, parlament şou-biznes meydanı deyil ki, bəziləri oranı özlərinin dedi-qodu, qalmaqal poliqonuna çevirsinlər. Bu gün bəzi şou-biznesçilər müxtəlif sosial şəbəkələrdə, teleradio proqramlarında etdikləri çıxışlarda hazırda parlamentdə təmsil olunan deputatları yarıtmaz fəaliyyətdə ittiham edirlər, bildirirlər ki, şou müğənniləri xalqı daha yaxşı təmsil edə, onların problemlərini gündəmə gətirə bilərlər.
- Vüqar Rəhimzadə: “Şou müğənnilərinin parlamentdə oturmasının hər hansı bir fayda verə biləcəyini düşünmürəm”
Bəzi şou müğənnilərinin deputat olmaq istəyini şərh edən “İki sahil” qəzetinin baş redaktoru, tanınmış ictimai-siyasi xadim Vüqar Rəhimzadə bildirdi ki, hər kəs öz işi ilə məşğul olsa, daha yaxşı olar. “Hesab edirəm ki, parlament, müəyyən mənada, siyasi döyüş meydanıdır. Orada daha çox yüksək səviyyəli mütəxəssislərin təmsil olunması daha faydalıdır. Burada daha çox hüquqşünasların, iqtisadçıların, siyasətçilərin olması vacibdir. Düşünürəm ki, hər kəs gedib öz işi ilə məşğul olsa, daha yaxşı olar. Siyasi proseslərdə, ictimai həyatda iştirakı olmayan hər hansı bir müğənninin deputat olması nə dərəcədə düzgün olar? Mən belə müğənnilərin deputat olmasının tərəfdarı deyiləm. Deputat olmaq istəyən adamın qanunvericilik bazasının formalaşmasına töhfə vermək imkanları olmalıdır. Müğənni öz sahəsində daha effektiv fəaliyyət göstərər və xalqa xidmət nümunəsini ortaya qoyar. Ancaq gəlib şou müğənnilərinin parlamentdə oturmasının hər hansı bir fayda verə biləcəyini düşünmürəm” - deyə V.Rəhimzadə bildirdi.
İradə SARIYEVA
