Ermənistanın Baş naziri Nikol Paşinyan ölkəsində öz nüfuz və etibarını itirib. Baş nazirin əlində qalan yeganə vasitə Qarabağ məsələsidir. Paşinyan münaqişə ilə bağlı danışıqları imitasiya edərək özünə dividendlər qazanmağa çalışır. Bu minvalla Ermənistan ictimaiyyətinin diqqətini Qarabağa çəkməyə çalışır. Çünki özü də artıq fərqindədir ki, cəmiyyətə verdiyi populist vədləri reallaşdırmaq gücündə deyil. Bu isə onun hakimiyyətdə qalmasını sual altında saxlayır. Ona görə də Paşinyan Dağlıq Qarabağ danışıqları ilə bağlı spekulyativ fikirlər səsləndirir.
Elə ona görədir ki, zaman-zaman Ermənistanın Baş naziri sərsəm bəyanatlarla çıxış edir, müəyyən siyasi taktikalar işlədir və ölkə əhalisinin diqqətini öz üzərinə çəkməklə nəbz yoxlamağa çalışır. Ancaq verdiyi bəyanatlarla heç bir müsbət irəliləyişə nail ola bilmir.
Paşinyan bu dəfə də özünün inadkar mövqeyini ortaya qoyub. O, Azərbaycanla Ermənistan arasında atəşkəs haqqında Bişkəkdə imzalanan sazişin 25 illiyi ilə əlaqədar Brüsseldə xüsusi bəyanatla çıxış edib. Paşinyan keçən dövr ərzində atəkəsin sülhə çevrilməməsinə guya təəssüf etdiyini bildirib. O iddia edib ki, guya separatçı qurum indiyə qədər danışıqlarda iştirak etmədiyinə görə münaqişə həll edilməyib. Yəni danışıqlar 3 tərəf arasında aparılmadığına görə problem öz həllini tapmayıb: “Ətraflı danışıqlar və nəticənin əldə edilməsi yalnız o vaxt mümkündür ki, Dağlıq Qarabağ, nəhayət, onun statusunun müəyyənləşdiriləcəyi və orada yaşayan insanların təhlükəsizliyinə zəmanətin təsbit ediləcəyi prosesə cəlb olunacaq”.
Maraqlıdır, əslində münaqişənin indiyə qədər həll edilməməsinin səbəbi nə iə bağlıdır?
Fikrət Sadıqov: “Paşinyanın münaqişənin həlli ilə bağlı səsləndirdiyi fikirlər cəfəngiyyatdır”
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, münaqişənin indiyə qədər həll edilməməsi Paşinyanın irəli sürdüyü danışıqlar formatı ilə yox, Ermənistanın işğalçılıq siyasəti ilə bağlıdır: “Bunun başlıca səbəbi Ermənistan tərəfindən Azərbaycan ərazilərinin işğal edilməsidir. Çünki işğalı təkcə Dağlıq Qarabağdakı separatçılar yox, Ermənistan ordusu da həyata keçirib. Ermənistan silahlı qüvvələri Dağlıq Qarabağdakı azərbaycanlılara qarşı etnik təmizləmə aparıb. Ətraf 7 rayonu Dağlıq Qarabağdakı separatçı dəstələr işğal edə bilərdilər? Təbii ki, yox. Ona görə də Paşinyanın münaqişənin həlli ilə bağlı səsləndirdiyi fikirlər cəfəngiyyatdır. Hətta münaqişənin həlli ilə bağlı “Madrid prinsipləri”ndə də göstərilib ki, torpaqların işğaldan azad edilməsi prosesi başlasın, Dağlıq Qarabağa müvəqqəti status verilsin. Daha sonra yekun status danışıqlar çərçivəsində həll edilsin. Biz bunun tərəfdarıyıq. Yəni nədənsə başlamaq lazımdır. Paşinyan isə separatçı qurumun danışıqlarda tərəf olması məsələsini qabardaraq münaqişənin həllini uzadır. Bu isə alınan iş deyil. Ona görə ki, Azərbaycanla yanaşı, ATƏT-in Minsk Qrupu da danışıqların mövcud format çərçivəsində keçirilməsinin tərəfdarıdır. Paşinyan münaqişənin həllini istəyirsə, o zaman işğala son qoymalıdır. Çünki problemin indiyə qədər həll edilməməsinin kökündə məhz bu amil dayanır”.
Vidadi ORDAHALLI
