18/07/2019 05:26
728 x 90

Paşinyan “Şərq tərəfdaşlığı” zirvəsində də Qarabağa tərəf statusu təxribatını davam etdirdi

“Onun fəaliyyəti və danışıqlar prosesində bəyanatları sülhə xidmət etmir”

img

Məlum olduğu kimi, Ermənistanın Baş naziri Nikol Paşinyan jurnalistlərə bildirib ki, Brüsseldə “Şərq tərəfdaşlığı”nın yubiley tədbirləri çərçivəsində Azərbaycan Prezidenti İlham Əliyevlə qısa söhbət edib, ancaq hələlik növbəti görüşlər üçün konkret planlar yoxdur.

Paşinyan görüşün yenidən baş tutması üçün hələlik proqram olmadığını, lakin danışıqlar prosesinin davam etdiriləcəyinə əmin olduğunu qeyd edib. “Hələlik heç bir plan yoxdur, amma əminəm ki, danışıqlar prosesi davam edəcək", - deyə o, jurnalistlərin “İlham Əliyevlə yenə görüş olacaqmı” sualını cavablandırarkən vurğulayıb.

O bildirib ki, Azərbaycan Prezidenti ilə qısa təmasda olub və "cari vəziyyəti" müzakirə edib.

Qondarma qurumun danışıqlar masasında iştirakı məsələsinə də geniş toxunan Paşinyan bunun baş verməyəcəyi təqdirdə münaqişənin həllinə nail olmağın mümkün olmayacağını bildirib.

Onu da qeyd edək ki, Prezident İlham Əliyev Brüsseldə Avropa Şurası sədri Donald Tuskun adından verilən rəsmi ziyafətdə iştirak edib. Həmin ziyafətdə Nikol Paşinyan da iştirak edib.

O da məlumdur ki, Paşinyan separatçı qurumun danışıqlarda tərəf kimi iştirakını istəyir. Onun bu təşəbbüsü Azərbaycan tərəfindən qəbul edilməyib. Həmçinin, həmsədrlər onun bu istəyini dəstəkləməyiblər. Bütün bunlara baxmayaraq, Ermənistan Baş naziri hər dəfə bu məsələni gündəmə gətirməkdən çəkinmir. Dağlıq Qarabağla bağlı danışıqlar gündəmə gələn kimi, Paşinyan bu sərsəm ideyanı ortaya atır. Bu dəfə də Paşinyan öz “ənənəsinə” sadiq qalaraq, sözügedən məsələni qabardıb.

Ümumən, Paşinyanın bununla bağlı təxribatçı fəaliyyətini davam etdirməsini ekspertlər necə dəyərləndirirlər?

  • Məhəmməd Əsədullazadə: “Paşinyanın separatçıların tərəf kimi danışıqlarda iştirakını irəli sürməsi, birmənalı şəkildə, substantiv danışıqlardan yayınmaq cəhdidir”

Sözügedən məsələni “Bakı-Xəbər”ə şərh edən politoloq Məhəmməd Əsədullazadənin sözlərinə görə, Paşinyanın bu cür yanaşması danışıqlara zərbə vurur: “Ermənistanın Baş naziri Nikol Paşinyan Cənubi Qafqazda artıq qeyri-stabil siyasət aparan, demokrat maskasına girən şəxsdir. Onun Qarabağ münaqişəsinin həlli ilə bağlı mövqeyi birbaşa danışıqlar prosesinə zərbə vurmaqdan ibarətdir. Brüsseldə Prezident İlham Əliyevlə görüşdən sonra Paşinyanın separatçıların tərəf kimi danışıqlarda iştirakını irəli sürməsi, birmənalı şəkildə, substantiv danışıqlardan yayınmaq cəhdidir. Separatçıların danışıqlarda iştirakı, ümumiyyətlə, münaqişənin həllinə zərbədir. Bu, işğal faktorudur və əsas işğalçı tərəf də Ermənistandır. Paşinyan çalışır ki, bu oyunla Ermənistanı işğalçı kimi göstərməsin. Hesab edirəm ki, Paşinyan qeyri-stabil şəxs olduğundan, onunla danışıqlar artıq bir mərhələdə bitməlidir. Onun fəaliyyəti və danışıqlar prosesində bəyanatları sülhə xidmət etmir. Qeyd edim ki, rəsmi Bakı ciddi ölçülər götürməli, işğalçı ilə konkret danışmalıdır. Paşinyan, ümumiyyətlə, Qarabağ məsələsində Moskvaya tabedir. Kremlin göstərişi ilə hərəkət edir. Ona görə də hər dəfə danışıqların pozulmasına yönəlik açıqlamalar verir. Fikrimcə, Paşinyan bundan sonra da destruktiv mövqe sərgiləyəcək”.

Vidadi ORDAHALLI

Son xəbərlər