26/05/2019 06:00
728 x 90

Elkaponenin yaratdığı Rusiya azərbaycanlılarının yeni təşkilatında ittihamlar qızışır - Mirkazım Seyidov Diaspor Komitəsinə qarşı...

img

Füzuli Məmmədovun (Frenk Elkapone) Rusiyada yaşayan azərbaycanlıları öz ətrafında birləşdirmək kimi iddiası hələ ki, səmərə vermir. Çox maraqlıdır ki, bu təşkilatla bağlı balaca da olsa tənqidi fikir səsləndirən, prosesi təhlil etmək istəyən hər şəxsə F.Məmmədov və onun “Facebook”dakı trolları tərəfindən sərt cavablar verilir. Ən əsası da, nisbətən müxalif mövqe sərgiləyən şəxslərə onlar tərəfindən “ermənipərəst” damğası vurulur.

Hazırda Frenk cəbhəsi Rusiyada yaşayan tanınmış jurnalist Fuad Abbasova qarşı səfərbər olunub. F.Məmmədovun özü jurnalistin ünvanına sərt ittihamlar səsləndirib, onu təxribat törətməkdə, azərbaycanlıların diaspor işinə maneələr yaratmaqda ittiham edib. Bununla bağlı F.Məmmədov özünün “Facebook” hesabında yazıb: “Diaspor fəaliyyətinin nüanslarını bilməyən, diaspor fəaliyyətindən xəbərsiz olan soydaşlarımızı aldatmaq məqsədilə özünü Rusiyadakı azərbaycanlıların qəhrəmanı elan edən Fuad Abbasov “Misra” adlı veb-saytında yenə saxtakarlıqla, provokasiya ilə məşğuldur. Fuad son açıqlamasında bildirir ki, guya “AzərRos” prezidentliyinə mənim namizədliyim irəli sürülüb və “ümumxalq səsverməsi” keçiriləcəyi planlaşdırılır. Mən Məmmədov Füzuli Məmməd oğlu rəsmi olaraq bəyan edirəm ki, “AzərRos”la bağlı heç bir seçkiyə qatılmamışam, bu tamaşa provokasiya xarakteri daşıyır və heç bir hüquqi əsasa söykənmədiyi üçün, hüquqi qüvvəsi ola bilməz. Dünya Azərbaycanlıları Mədəniyyət Fondu və 27 aprel 2019-cü ildə Rusiya Federasiyasının əksər əyalətlərinin dəstəyilə yaradılan Rusiya Azərbaycanlıları İttifaqının prezidenti postunu qürur və şərəflə daşıyan azərbaycanlı kimi AZƏRROS-a ayıracaq nə vaxtım, nə istəyim var. Saxta vətənpərvərlərin hazırladığı bu provokasiyanın əsas məqsədi mövcud vəziyyəti müsbətə doğru dəyişdirmək yox, soydaşlarımızın milli hisslərindən istifadə edərək xal qazanmaq, şəxsi büdcələrini doldurmaqdır.

Ehtiyatlı olun, dələduz var!”

Soydaşlarımız tərəfindən birmənalı qarşılanmayan bu statusa Fuad Abbasov qısa cavab verib: “İtaliyalı biznesmen Frenk Elkaponeye jurnalist Fuad Abbasovdan müraciət: “Düşmənlə mübarizə aparmaq lazımdır, jurnalistlə deyil!!!”

Qeyd edək ki, tanınmış azərbaycanlı jurnalist Fuad Abbasov Azərbaycan və Türkiyənin müxtəlif problemlərinin Rusiyada qabardılması istiqamətində xeyli iş görüb. Buna görə işdən qovulub, hətta ermənilər tərəfindən ölümlə də təhdid olunub. Maraqlıdır ki, onun həyatına təhlükə yarandığı bir vaxtda F.Məmmədov onun müdafiə olunması üçün azərbaycanlılara müraciət etmişdi. Hətta onu qorumaq üçün zirehli avtomobil alacağını da bildirmişdi. Bundan cəmi 2-3 ay sonra həmin adamı təxribatda suçlamaq müəyyən suallara yol açıb.

Diaspor fəaliyyəti ilə məşğul olan bəzi sosial şəbəkə istifadəçilərinin iddialarına görə, tərəflər arasındakı gərginlik heç də milli maraqlara, diaspor fəaliyyətinə görə deyil.

Qeyd edək ki, hazırda F.Məmmədovun yanında yer alan diaspor fəalı Mirkazım Seyidov da jurnalist F.Abbasovla bağlı ciddi əks kampaniya aparır. O, verdiyi müsahibədə jurnalistin ünvanına sərt fikirlər səsləndirib: “Bu gün F.Abbasov kimlərinsə sifarişini yerinə yetirən və azərbaycanlılar arasında çaxnaşma yaradan bir fiqura çevrilib. Deyir ki, guya ermənipərəst qüvvələrə qarşı tək vuruşur. Ancaq onun işi müxtəlif tok-şoularda iştirak etməkdir. Tok-şou da nədir? Hər bir açılan tok-şounun birinci məqsədi pul qazanmaqdır. F.Abbasov da orada müəyyən pul müqabilində iştirak edir. Sualları da, cavabları da əvvəlcədən müəyyənləşdirirlər. Deyirlər ki, belə suallar olacaq, belə cavab ver və oradan pul qazanırlar. Ona görə də tok-şoularda erməni faktorundan bəhrələnib, özünü millətpərəst kimi göstərmək lazım deyil. Vətənini sevən jurnalist vətənpərvər insanları antimilli hərəkətdə günahlandırmaz.

Siz gördünüz ki, F.Abbasov qurultay keçirilən günün axşamı çıxdı efirə və hamını aldatdı ki, məni ora dəvət etməyiblər. Halbuki, o da, ləğv olunmuş ÜAK-ın sədri Fazil Qurbanov da dəvət edilmişdi. “AzərRos”un rəhbəri Mehriban xanımı da biz ora dəvət etmişdik, gəlmədilər. Ağadadaş Kərimov qatı ermənipərəst olduğuna görə onu dəvət etmədik. Amma bunlar dəvət edilsələr də, gəlmədilər.

Sonradan Azərbaycandan getmiş jurnalistlərin təkidilə F.Abbasovu dəvət elədik ki, gəlsin söhbət edək. Onun haqqımızda iftiralar söyləməsinə baxmayaraq, Füzuli müəllim humanistlik göstərdi, barışıq mövqeyi tutdu. Ancaq həmin görüşdən sonra onun yalançı olduğu bir daha ortaya çıxdı. Orada səmimi şəkildə söhbət apardıq, əlaqəli şəkildə fəaliyyət göstərməklə bağlı razılığa gəldik. Ancaq çox keçmədən yenə başladı bizə iftira atmağa. Bu da göstərir ki, onu kimlərsə idarə edir. Çox qeyri-səmimi bir adamdır”.

F.Məmmədovun hazırda “uzaq vuran toplarından” sayılan Mirkazım Seyidov müsahibəsində  diaspor sahəsindəki geriləmədə Diaspor Komitəsi və xarici ölkələrdəki səfirliklərimizi də günahkar sayıb: “Əvvəla qeyd edim ki, dediyiniz problemin səbəbləri çoxdur. Hətta Dünya azərbaycanlılarının sonuncu qurultayında cənab Prezidentin çıxışında da bu öz əksini tapıb. Cənab Prezident göstərdi ki, diaspor təşkilatları hansısa siyasi qüvvənin deyil, Azərbaycan dövlətinin, xalqının maraqlarına xidmət etməlidirlər. Ancaq çox təəssüf ki, uzun illər ərzində bəzi dövlət orqanları, o cümlədən, Diaspor Komitəsi, xaricdəki səfirlik və konsulluqlarımız öz fəaliyyətlərində bu tezisi rəhbər tutmayıblar. Nəticədə diaspor təşkilatlarına düzgün münasibət göstərilməyib. Diaspor Komitəsi ilə xaricdəki səfirliklərimiz arasındakı ziddiyyətlər də diaspor təşkilatlarının vahid mövqeyinin formalaşmasına inkan verməyib. Təəssüflər olsun ki, bu ziddiyyətlər bu gün də mövcuddur, onun aradan qaldırılması istiqamətində konkret işlər görülməyib. Bu, Azərbaycanın diaspor təşkilatlarının güclü olmamasının ən böyük səbəblərindən biridir”.

Dünya Azərbaycanlıları Konqresi icra aparatının rəhbəri Samir Adıgözəlli “Bakı-Xəbər”ə bildirdi ki, F.Məmmədovun və ətrafının fərqli fikrə qarşı belə aqressiv münasibəti başadüşülən deyil: “Biz bu yolda böyük əmək sərf etmişik. Geniş təcrübəmiz var. Gedən son proseslərlə bağlı fikir bildirəndə təhqirə məruz qalırıq. Şəxsən bu məsələ ilə bağlı, məhz sizin qəzet vasitəsilə bildirdiyim münasibətdən sonra sosial şəbəkələrdə təhqir edildim.  Frenk böyük bir trol ordusu saxlayır. Onların kənara qoyuram. Frenkin ətrafında olan Səftər Rəhimli mənim paylaşımımın altında bir videomaterial yerləşdirdi. Açıq-aşkar bizi ermənipərəstlikdə suçlayırdılar. Bu nə biabırçılıqdır? Nə vaxtdan bəri Frenki və ya onun gördüyü işi tənqid etmək ermənipərəstlik kimi qəbul olunmağa başlayıb? Axı F.Məmmədov bu müqəddəsliyi harda qazanıb ki, onu tənqid etmək az qala milli xəyanətə bərabər tutulur? Yəni demək istəyirəm ki, belə basqıya məruz qalan tək jurnalist F.Abbasov deyil. Xahiş edirəm, o sıraya mənim də adımı əlavə edəsiniz. Bu təşkilat elan olunan gündən intriqa yuvasına çevrilib. Ancaq qalmaqalla gündəmə gəlirlər. Hesab edirəm ki, təməli bu şəkildə qoyulan təşkilatdan ciddi nəsə gözləməyə dəyməz”.

Məhəmmədəli QƏRİBLİ

Son xəbərlər