26/05/2019 05:46
728 x 90

Qondarma “DQR” hakimiyyətinin aldadıcı “videonəzarət taktikası”- qondarma nazir təzə üsul tapdı…

“Bizim nəinki təmas xəttinə, eləcə də Ermənistanın özünə nəzarət etmək imkanlarımız yüksəkdir”

img

Ermənistan KİV-inin verdiyi məlumata görə, Xankəndidə atəşkəsin əldə olunmasının 25 illiyinə həsr edilmiş mətbuat konfransında qondarma qurumun “xarici işlər naziri” Masis Mailyan özlərini təmizə çıxarmağın yeni yolunu tapmış kimi danışıb. O qeyd edib ki, bütün beynəlxalq qurumlara və həmsədrlərə atəşkəs dövründə olan videonəzarət sistemlərindəki məlumatları təqdim etməyə hazırdırlar.

“Nazir” qeyd edib ki, xüsusilə də aprel döyüşlərindən sonra onlar belə nəzarət mexanizmlərini təmas xətti boyunca çox yerləşdiriblər. Aydındır ki, bununla qondarma qurum “rəsmisi” özlərini sülhə sadiq tərəf kimi göstərməyə can atır və bildirmək istəyir ki, atəşkəsin mütəmadi pozulmasında yeganə günahkar Azərbaycandır. Əlbəttə, bu inandırıcı deyil, çünki Azərbaycan hələ ki, işğal altında olan torpaqları sülh yolu ilə azad etməyə çalışır. Bu mümkün olmadığı təqdirdə, atəşkəsi pozmaqla deyil, müharibə yolu ilə torpaqları işğaldan azad etmək yolunu tutacaq. Ara-sıra atəşkəsi pozmaq isə yalnız işğalçılara sərf edə bilər. Qondarma qurum rəsmilərinin “videonəzarət qeydlərindən istifadə” təklifinin arxasında daha hansı məqsədlər dayana bilər?

  • Daşdəmir Əliyev: “Onlar bu cür videonəzarət oyununu ortaya atmaqla prosesi bir az da uzatmağa çalışırlar”

Hərbi ekspert Daşdəmir Əliyev “Bakı-Xəbər”ə açıqlamasında bildirdi ki, ermənilərin yeni təxribatı səmərə verə bilməz: “Onlar gözəl bilməlidirlər ki, Azərbaycan kosmik dövlətdir. Bizim nəinki təmas xəttinə, eləcə də Ermənistanın özünə nəzarət etmək imkanlarımız yüksəkdir. Bizim hazırda fəzada 3 kosmik peykimiz var. Həmin peyklərdən alınan görüntülərlə biz Ermənistana və istənilən vasitəçilərə faktları təqdim edə bilərik. Hətta erməni əsgərlərinin sinəsində yazılan yazılar və kimin neçə ulduzunun olmasına qədər. Bizim elə geniş imkanlarımız olduğu halda, Ermənistan guya təmas xəttinə quraşdırdığı bir-iki videoqeydiyyat aparan qurğu ilə fəxr edir. Onlar utanmadan atəşkəsin 25 illiyindən fəxrlə danışırlar. Qonşu dövlətin torpaqlarını zəbt edib oturduqları üçün, atəşkəs onlara göydəndüşmə bir vasitədir. Ona görə bu barədə pafosla danışırlar. Ancaq unutmasınlar ki, artıq həmin sevincin onlara qara gətirməsinin zamanı tam yetişib. Onlar bu cür videonəzarət oyununu ortaya atmaqla prosesi bir az da uzatmağa çalışırlar. Lazım gələndə onlar atəşkəsi uzaq məsafədən vuran silahlar və “dronlar” vasitəsilə də poza bilirlər. Bununla kimi aldatmaq istəyirlər? Atəşkəsi hər dəfə onlar pozub, biz cavab atəşilə onları susdurmuşuq. Bu gün Azərbaycan onların hər bir hərəkətinə nəzarət etmək iqtidarındadır. Biz hətta Ermənistandan Dağlıq Qarabağa gedən dəhlizi də müşahidə altında saxlayırıq. Qoy videonəzarətlə öyünənlər bilsinlər ki, biz hətta Ermənistanın hava məkanını belə nəzarətdə saxlayırıq. Bu cür texniki imkana malik olan bir ölkənin qabağına hansısa videokamera ilə çıxmaq çox gülüncdür.

Bizim Prezident dəfələrlə mövqeyini bildirib. Biz ərazi bütövlüyümüzdən zərrə qədər də olsun güzəştə gedən deyilik. Müxtəlif bəhanələrlə bizim başımızı aldatmasınlar. Bizim atəşkəsi pozmağa deyil, müharibə ilə torpaqlarımızı azad etməyə haqqımız var. Artıq beynəlxalq səviyyədə də ermənilərin kim olduqları bilinir. Bütün beynəlxalq dairələr bizim haqq səsimizi dəstəkləyirlər. Mən inanıram ki, yaxın zamanlarda biz ermənilərin layiqli cavabını verəcəyik. Çünki onlar sülh danışıqlarına məhəl qoymurlar. Mövsüm də tam uyğun gəlir. Onlar hər zaman burunları qaşınanda belə edirlər. Paylarını aldıqdan sonra sakitləşəcəklər”.

Məhəmmədəli QƏRİBLİ

Son xəbərlər