Son illər Azərbaycan mötəbər beynəlxalq tədbirlərə, o cümlədən nüfuzlu idman yarışlarına, festivallara, qlobal forumlara, konfranslara yüksək səviyyədə evsahibliyi edir. Belə mühüm tədbirlərə evsahibliyi etmək üçün Azərbaycana etimad göstərilməsi təsadüfi deyil. Əlbəttə, bu, Azərbaycanın qazandığı mövqeyin, ölkəmizin dünyadakı çəkisinin, beynəlxalq ictimaiyyət və təşkilatlar qarşısında nüfuzunun ifadəsidir. Eyni zamanda, belə tədbirlər Azərbaycan dövləti və xalqı üçün də mühüm dividendlər gətirir.
Azərbaycanın evsahibliyi etməyə hazırlaşdığı növbəti mötəbər tədbir mayın 29-da Bakı Olimpiya Stadionunda keçiriləcək UEFA Avropa Liqasının final matçıdır. Təəssüf ki, Avropadakı anti-Azərbaycan qüvvələr ölkəmizdə keçirilən hər belə mötəbər tədbir ərəfəsində olduğu kimi, bu dəfə də qarayaxma kampaniyasına başlayıblar.
Azərbaycanın təşkilatçılıq qabiliyyətinə gəldikdə isə bunu demək kifayətdir ki, ölkəmiz bu sahədə peşəkarlığını dəfələrlə sübut edib. Xüsusilə tarixdə ilk dəfə keçirilən və Avropanın 50 ölkəsindən 6 mindən çox atletin mübarizə apardığı Birinci Avropa Oyunlarına cəmi 30 ay müddətində sürətlə hazırlaşaraq bu mötəbər idman yarışını ən yüksək səviyyədə təşkil edən Azərbaycanın bu sahədəki uğurları nəinki Beynəlxalq və Avropa Olimpiya komitələri, digər mötəbər qurumlar tərəfindən də yüksək qiymətləndirildi. Azərbaycanın son illərdə evsahibliyi etdiyi digər mötəbər idman yarışları – 1600 şahmatçının qatıldığı 42-ci Ümumdünya Şahmat Olimpiadası, qadınlar arasında voleybol üzrə Avropa çempionatı, 800-dək idmançının qatıldığı cüdo, 1500 nəfərin mübarizə apardığı BMX velosipedi üzrə Dünya çempionatlarının, 4 minə yaxın atletin iştirak etdiyi IV İslam Həmrəyliyi Oyunlarının, gimnastikanın müxtəlif növləri üzrə ən mötəbər beynəlxalq turnirlərin iştirakçıları ölkəmizdə idmançılar və komandaların üzvləri üçün ideal şəraitin yaradıldığını bildiriblər. Bütün bunlar Azərbaycan əleyhinə səsləndirilən ittihamların əsassız olduğunu ifadə edən faktlardır.
Azərbaycanda təhlükəsizliyin və sabitliyin tam şəkildə təmin olunduğu Xarici İşlər Nazirliyinin məsələyə münasibətində də qəti şəkildə ifadə edilib: “Azərbaycan çoxsaylı mötəbər beynəlxalq tədbirə, o cümlədən, beynəlxalq miqyaslı idman yarışlarına evsahibliyi edir. Bu sırada Birinci Avropa Oyunlarını, IV İslam Həmrəyliyi Oyunlarını, “Formula-1” üzrə Azərbaycan Qran-Prisini və UEFA Çempionlar Liqası çərçivəsində 2017-ci ildə keçirilmiş “Qarabağ” – “Çelsi” oyununu qeyd etmək olar. Bu idman yarışlarını izləmək məqsədilə respublikamıza gələn çoxsaylı əcnəbi ölkə vətəndaşı Azərbaycanda ictimai asayişin təmin olunmasından, mövcud sabitlik və təhlükəsizlik mühitindən və bu kimi irimiqyaslı idman tədbirlərinin təşkilatçılığından məmnun qalıblar. Azərbaycan, həmçinin, turizm ölkəsidir və hər il ölkəmizə çoxsaylı əcnəbi turist səfər edir. Ölkəmizin malik olduğu digər müsbət xüsusiyyətlərlə bərabər, Azərbaycanda hökm sürən əminamanlıq, sabitlik və təhlükəsizlik əcnəbi turistləri cəlb edən vacib amillər sırasındadır”.
Son 7 il ərzində keçirilən böyük mötəbər yarışların xronikasına nəzər saldıqda biz aydın şəkildə görürük ki, ssenari eyni üsulla davam etdirilir.
“Arsenal”ın erməni əsilli futbolçusunun təhlükəsizliyi ilə bağlı yaratdığı əsassız hay-küyə dərindən fikir verdikdə məlum olur ki, bu cür qara piarlar eyni mərkəzlər tərəfindən hazırlanır. 2012-ci ildə Bakıda keçirilən "Avroviziya" beynəlxalq mahnı müsabiqəsində də Ermənistan təmsilçisi iştirakdan imtina etmək qərarına gəldi.
Avropa Yayım İttifaqının səylərinə və müsabiqəni təşkil edən ölkənin təhlükəsizliyə zəmanət verməsinə baxmayaraq, “Ermənistan bizim nəzarətimizdən kənar olan bir qərar qəbul edib", - deyə "Avroviziya" müsabiqəsinin icraçı direktoru Yan Ola Sand "Eurovision.tv"yə müsahibəsində bildirdi. Beləliklə, daha öncə ərizə vermiş 43 ölkədən yalnız 42-si müsabiqəyə qatıldı.
Yəni ermənilər bir qədər düşünərək onlara xas olan ssenari ilə hərəkət etməyə, yəni bütün dünyaya səs-küy salmağa və növbəti dəfə özlərini "əzabkeş" millət kimi təqdim etməyə qərar verdilər.
Analoji halla biz 2015-ci ildə ölkəmizin evsahibliyi etdiyi İlk Avropa Oyunları zamanı da qarşılaşdıq. Onda da idman yarışını siyasətə qatan bəzi dairələr, nəyin bahasına olursa-olsun, bizə qara yaxmağa çalışırdılar. Hətta bəzi ölkələrin nüfuzlu idman qurumlarının rəhbərləri belə həmin prosesdə yer aldılar. İsveç Olimpiya Komitəsinin prezidenti Stefan Lindeberq Azərbaycanla bağlı Avropa Olimpiya Komitəsinə şikayət etmişdi. S.Lindeberq Bakıda keçiriləcək Birinci Avropa Oyunlarının başlanmasına 100 gün qalmış "Amnesty İnternational"ın yaydığı hesabata istinad edərək bildirib ki, guya turnirə evsahibliyi edən Azərbaycanda insan hüquqları və demokratiya ilə bağlı standartlara əməl olunmur. Lakin Bakıya dəfələrlə səfər edən və ölkəmizin inkişafını, əldə etdiyi tərəqqini öz gözləri ilə görən Patrik Hikkinin rəhbərlik etdiyi Avropa Olimpiya Komitəsindən Lindeberqin müraciətinin əsassız olduğu, reallığı əks etdirmədiyi bildirilib.
Sual yaranır ki, niyə hər dəfə hansısa ölkədə mötəbər tədbir, xüsusilə beynəlxalq idman yarışları təşkil olunanda bəzi xarici dairələr tərəfindən standart fikirlər irəli sürülür? İdmanı siyasi alətə çevirmək istəyənlər hər dəfə Dünya çempionatları, Olimpiya oyunları və digər beynəlxalq səviyyəli yarışlar ərəfəsində təşkilatçı ölkələrdə guya insan hüquqlarının pozulduğundan narahat olurlar. Ancaq onların heç birinin istəkləri həyata keçmir. Ölkəmiz çox yüksək ustalıqla, peşəkarlıqla həmin oyunları keçirmiş olur. Bəllidir ki, bu cür əhəmiyyətli hadisələrin öhdəsindən yalnız Azərbaycan kimi siyasi-iqtisadi sabitlik dövrü yaşayan dövlət gələ bilərdi. Hərçənd, ölkəmizin beynəlxalq aləmdə artan nüfuzu, iqtisadi-siyasi qüdrəti bəzi dövlətlərdə qısqanclıqla qarşılanmağa başlayıb.
Ölkəmizin evsahibliyi etdiyi İslam Həmrəyliyi Oyunları zamanı da biz analoji təxribatlarla üz-üzə qaldıq. Onda da guya ölkəmizdə insan haqlarının pozulduğunu iddia edən bəzi yerli və beynəlxalq dairələr xarici ölkələrdəki səfirliklərimiz önündə aksiyalar keçirdilər. Xüsusilə də mühacirlərdən ibarət söyüşcül dəstənin fəallaşması nəzərə çarpdı.
Azərbaycan Güləş Federasiyasının vitse-prezidenti, tanınmış idman ustası Firdovsi Umudov hesab edir ki, Azərbaycanda beynəlxalq yarış və tədbirlərin yüksək səviyyədə keçirilməsi, həmin tədbirlərin bütün dünyada müsbət əks-səda verməsi bəzi xarici qüvvələri narahat edir.
Onun sözlərinə görə, həmin qüvvələr Azərbaycanda bu cür tədbirlərin yüksək səviyyədə keçirilməsindən, ölkənin sürətlə inkişafından narahat olduğundan, belə üsullara əl atmaqla ölkəmizə qarşı qarayaxma kampaniyası aparırlar: "Mən həmin insanları xəstə adlandırıram. Çünki onlar həqiqətən Azərbaycanı istəmirlər. Bəzi "sapı özümüzdən olan baltalar" da həmin qüvvələrə qoşulmaqla Azərbaycanın imicinə zərbə vurmağa cəhd edirlər. Bu, birinci dəfə deyil. Bu cür hallar 2012-ci ildə “Eurovision” müsabiqəsi, 2015-ci ildə Avropa Oyunları, 2017-ci ildə İslam Həmrəyliyi Oyunları, bundan sonra keçirilən “Formula-1” Azərbaycan Qran-Pri yarışı zamanı da olub.
İndi də Böyük Britaniyanın Xarici İşlər Nazirliyi də daxil olmaqla, bir sıra instansiyalar idmana heç bir aidiyyəti olmayan, qərəzli və reallıqdan uzaq subyektiv mülahizələr irəli sürür və beynəlxalq ictimaiyyətdə bu mühüm idman tədbirinin Azərbaycanda keçirilməsinin məqsədəuyğun olmadığı barədə rəy formalaşdırmağa çalışırlar. Çünki həmin qurumların Azərbaycanı gözü götürmür".
Millət vəkili Azər Badamov da hesab edir ki, Azərbaycan inkişaf edən ölkədir və bir çox uğura imza atıb: “Azərbaycan bir çox beynəlxalq idman yarışına evsahibliyi edib. Bildiyiniz kimi, Birinci Avropa Oyunları, İslam Həmrəyliyi Oyunları, “Formula-1” və s. ayrı-ayrı idman növləri üzrə beynəlxalq yarışmalar Azərbaycanda keçirilib. Hər bir böyük beynəlxalq yarışma ərəfəsində Azərbaycanı ləkələmək, ölkəmizdə təhlükələrin mövcud olması barədə müəyyən təbliğat kampaniyası işləyir. Bu təbliğat kampaniyası ölkəmizə qarşı olan qarayaxma kampaniyasının tərkib hissəsidir və müəyyən sifarişlərin icrasıdır. Yəni ölkəmizə qarşı çevrilmiş antimilli ünsürlərin məqsədi Azərbaycanı beynəlxalq miqyasda nüfuzdan salmaq, Azərbaycanı təhlükəli bir məkan kimi təqdim etməkdir və Bakıda keçiriləcək UEFA finalının baş tutmaması istiqamətində müəyyən işlər görməkdir. Düşünürəm ki, onların apardığı hər bir qarayaxma kampaniyası, antimilli siyasət ancaq özlərinin boş-boş danışmaları ilə yadda qalacaq. Çünki Azərbaycanda beynəlxalq yarışların keçirilməsi üçün kifayət qədər təcrübə formalaşıb. Azərbaycan ictimaiyyəti müəyyən xarici anti-Azərbaycan dairələrin mühüm tədbirlər ərəfəsində ölkəmizə qarşı belə qərəzli kampaniyalar təşkil etməsinin dəfələrlə şahidi olub”.
Məhəmmədəli QƏRİBLİ
