Türkiyədəki son bələdiyyə seçkiləri həmin ölkəni, demək olar ki, silkələyib. Seçkinin nəticələrininn ləğvi hətta bir vaxtlar Ərdoğanla eyni iqtidarda təmsil olunan yüksək ranqlı sabiq məmurları da hərəkətə gətirib. Artıq Ərdoğanın sabiq silahdaşlarının yeni partiya təsis edəcəyi ilə bağlı fikirlər dolaşır. Hətta bildirilir ki, bu amal Abdullah Gül ilə Əhməd Davudoğlu arasında bir müddətdir davam edən soyuqluğu aradan qaldıra bilib.
Türkiyə KİV-ində Abdullah Gül ilə Əhməd Davudoğlunun vahid partiya yaradacağı bildirilir. Məlumata görə, sabiq iqtisadiyyat naziri Əli Babacan yeni yaradılacaq partiyanın sədri olmaq istəmir, amma yeni partiyada vəzifə alacağını təsdiqləyir.
Ə.Davudoğlunun A.Gülə "əgər yeni partiyanın sədri olmaq istəyirsinizsə, bizə də sizin rəhbərliyiniz altında işləmək yaraşar" - dediyi vurğulanır. A.Gül isə partiya sədri olmaq istəmədiyini açıq şəkildə söyləyib. Ən geci 1 ay sonra partiyanın rəsmiləşdirilməsi gözlənir.
Qeyd edək ki, daha əvvəl Türkiyə KİV-ində Ə.Davudoğlunun rəhbərliyi ilə yeni partiya yaradılacağı bildirilirdi.
Xatırladaq ki, Ə.Davudoğlu 2014-cü ilin avqustundan 2016-cı ilin mayına qədər Türkiyənin baş naziri olub. 2014-cü ilin avqustundan 2016-cı ilin mayına qədər o, həmçinin, Ədalət və İnkişaf Partiyasına rəhbərlik edib.
Ərdoğanın sabiq silahdaşlarının yarada biləcəyi partiya Türkiyənin yaxın gələcəyi üçün nə vəd edir?
Qabil Hüseynli: “Yeni partiya qurulsa, hazırda AKP-ni parlamentdə təmsil edən 40-a yaxın millət vəkilinin onlar tərəfə keçəcəyi gözlənir”
Politoloq Qabil Hüseynli “Bakı-Xəbər”ə açıqlamasında bildirdi ki, sözügedən adamlar çox ciddi təsir imkanlarına malikdirlər: “Partiya ilk yarananda Ərdoğan 6 aylığına həbsə məhkum edilmişdi. Həmin vaxt bu adamlar A.Gülün başçılığı ilə həmin partiyanı qurdular. Güllə yanaşı, Ə.Babacan, Davudoğlu da partiyanın ilkin rüşeymini qoyanların sırasındadırlar. Hesab edirəm ki, ən ağır “top”lardan biri də Bülənt Arıncdır. O nə Ərdoğana qoşulur, nə də bunlara. Amma yeni yaranacaq partiyaya gəlmə ehtimalı böyükdür. Deyilənə görə, artıq bu adamlar partiya quruculuğu işlərini tam başa çatdırıblar. Lazım olan bütün quruculuq işlərini yerinə yetiriblər. Bizim hələ adını çəkmədiyimiz digər məhşur adamlar da bu komandada var. Hesab edirəm ki, partiyanın sədri Davudoğlu olacaq. Hələlik partiyanın adı ilə bağlı hər hansı bir məlumat verilmir. Görünən budur ki, onların əsas hədəfləri Ərdoğan olacaq. Onlar hesab edirlər ki, Ərdoğan ölkəni iflasa doğru aparır. Buna görə də yeni partiyanın müxalif platformada qərar tutacağı gözlənir. Bir proqnoz da bundan ibarətdir ki, yeni partiya qurulsa, hazırda AKP-ni parlamentdə təmsil edən 40-a yaxın millət vəkilinin onlar tərəfə keçəcəyi gözlənir. Belə olan təqdirdə, AKP-nin parlamentdəki dayaqları da ciddi zəifləyəcək. Yaxın 15 gündə yeni partiya elan edilə bilər. Bundan sonra Türkiyənin siyasi həyatında ciddi dəyişikliklər başlayacaq. Yeni partiyanın yaranması Ərdoğan üçün ciddi problemlər yaşada biləcək və onun hakimiyyətinin sonunu yaxınlaşdıracaq”.
Məhəmmədəli QƏRİBLİ
