Günü-gündən güclənən Azərbaycan Ordusunda vaxtilə mövcud olan bir sıra neqativ hallar artıq keçmişdə qalıb. Bu gün ordumuz öz vətənpərvər əsgər və zabitləri ilə dövlətçiliyimizin keçiyində dayanır. Hazırda, demək olar ki, ordumuzda fərarilik kimi xoşagəlməz hallara rast gəlinmir.
Respublikanın hərbi prokuroru Xanlar Vəliyev bildirib ki, orduda baş verən, o cümlədən, hərbi xidmət əleyhinə cinayətlərin sayı Hərbi Prokurorluğun səmərəli fəaliyyəti nəticəsində əhəmiyyətli dərəcədə azalıb. O, həmçinin, vurğulayıb ki, ötən il Hərbi Prokurorluq üzrə qeydə alınmış müxtəlif qəbildən olan cinayətlərin digər illərlə müqayisəli təhlili göstərir ki, hərbi xidmət əleyhinə olan cinayətlər 1998-ci illə müqayisədə 7 dəfə, hərbi xidmətdən yayınma cinayətləri 33 dəfə, hərbi hissəni və ya xidmət yerini özbaşına tərk etmə cinayətləri 29 dəfə, fərarilik cinayətləri 371 dəfə, müharibə vaxtı və ya döyüş şəraitində hərbi hissəni və ya xidmət yerini özbaşına tərk etmə cinayətləri 1000 dəfə azalıb: “Tabelik qaydaları əleyhinə olan, eləcə də hərbi qulluqçunu təhqir etmə, döymə və ya işgəncə vermə cinayətləri 2007-ci illə müqayisədə iki dəfə az qeydə alınıb. Həmçinin, tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını pozma cinayətləri 2013-cü illə müqayisədə 41,7 faiz az olub. Eləcə də 1998-ci illə müqayisədə hakimiyyətdən sui-istifadə etmə cinayətləri 36 faiz, qulluğa səhlənkar yanaşma cinayətləri 51,4 faiz, qeyri-hərbi cinayətlər 10,2 faiz, qəsdən adam öldürmə cinayətləri 5 dəfə, özünü öldürmə həddinə çatdırma cinayətləri isə 2 dəfə azalıb”.
Azərbaycanda hərbi xidmətdən yayınma cinayətlərinin 33 faiz azalması nəyin hesabına baş verib?
Şair Ramaldanov: “Azərbaycanda vətənpərvərlik ruhunda böyüyən gələcək əsgərlə Ermənistanda böyüyən cəsarətsiz uşaq arasında fərq böyükdür”
Azərbaycan Ordusunun sabiq korpus komandiri, iki dəfə “Azərbaycan Bayrağı” ordeninə layiq görülmüş Şair Ramaldanov “Bakı-Xəbər”ə bildirdi ki, ordumuzda mütəmadi olaraq həyata keçirilən islahatlar, hərbçilərin sosial və məişət vəziyyətinin yaxşılaşdırılması, xidmətin tam şəkildə nizamnamələrə uyğun şəkildə aparılması, komandirlərlə tabeliyində olan şəxsi heyət arasında düzgün münasibətlərin qurulması və s. amillər fərariliyin, ümumiyyətlə, hərbi cinayətlərin azalmasına səbəb olub. “Bundan başqa, bilirsiniz ki, aprel hadisələrindən sonra bizim gənclərin daxilində böyük bir ruh yüksəkliyi, potensialı sıçrayış verdi. Bizim gənclərin aprel hadisələrindən sonra qulluq etdikləri hərbi hissələrə münasibəti daha yüksək səviyyədə formalaşdı. Bu və digər hallar da, əlbəttə, hərbi cinayətlərin və fərariliyin faizinin azalmasına səbəb oldu. Ümumiyyətlə, orduda fərarilik və digər cinayətləri yaradan səbəb ilk növbədə ordunun nizamnamə ilə deyil, digər qanunlarla idarə olunduğu hallar olur. Bizdə isə ordu sırf nizamnamə əsasında qurulub, burada kənar təsirlər yoxdur. Bu gün Azərbaycan əsgəri hansı postda olmasından asılı olmayaraq, onun məişət təminatı tam şəkildə qurulubsa, bu həmin gəncin hərbi xidməti uğurla davam etdirməsinə müsbət təsir göstərir. Müasir Azərbaycan Ordusunda xidmət edən əsgərlər öz xidməti vəzifələrini yüksək səviyyədə həyata keçirirlər. Çünki onların bütün qayğıları, sosial problemlərinin həlli dövlətin diqqət mərkəzindədir. Sosial-məişət qayğılarından uzaq olan, tək fikri Vətəni, torpağı qorumaq olan Azərbaycan əsgərləri irəliyə baxır, torpaqlarımızı azad edəcəkləri günü gözləyirlər”.
Azərbaycan Ordusu ilə müqayisədə Ermənistanda hərbi cinayətlərin və fərarilik hallarının yüksələn xətt üzrə getdiyini deyən Ş.Ramaldanovun sözlərinə görə, bu gün bu ölkənin ordusunda istənilən növ cinayət halları geniş yayılıb: “Ermənistanın özünün təqdim etdiyi statistikaya görə, bu gün onların hərbi hissələrində ölüm halları döyüş itkilərini iki dəfə üstələyib. Bunlar özünəqəsdir, yaxud əsgər yoldaşı tərəfindən öldürülmədir və s. Ermənistan ordusunda nizam-intizamsızlıq hökm sürür. Bilirik ki, bu, birinci növbədə, Ermənistanın hərbi hissələrində xidmət edənlərin sosial-məişət vəziyyətinin acınacaqlı olmasıdır. Digər tərəfdən də bu gün işğal olunmuş Dağlıq Qarabağda Ermənistandan olan əsgər və digər hərbi qulluqçularla separatçı rejimin əsgərləri arasında ziddiyyətlər də mövcuddur. Onların münasibətləri çox gərgindir. Başqa bir tərəfdən, bir respublikanın birinci şəxsi orduda yemək probleminin olduğunu açıq şəkildə etiraf edirsə, yemək probleminin həllinə hələ zaman tələb olunduğunu deyirsə, bu onların vəziyyətini göstərir. Azərbaycanın gələcək əsgəri ilə Ermənistanın gələcək əsgəri arasında böyük fərq var. Bu ondan ibarətdir ki, Azərbaycanın gələcək əsgəri məktəb yaşından başlayaraq böyüyənə qədər Qarabağı azad etmək arzusu ilə yaşayır və o ruhda tərbiyə alır, ona ailədə Azərbaycan torpaqlarının Ermənistan tərəfindən işğal edildiyi təlqin edilir. Bu o deməkdir ki, bizim gələcək əsgərlər torpaqlarımızın işğaldan azad olunması haqqında düşünürlər. Bu gün kiçik bir oğlan uşağından soruşanda ki, böyüyəndə kim olacaqsan, deyir ki, böyüyüb əsgər olacağam və Qarabağı işğaldan azad edəcəyəm. Yəni Azərbaycanda vətənpərvərlik ruhunda böyüyən gələcək əsgərlə Ermənistanda böyüyən cəsarətsiz uşaq arasında fərq böyükdür. Çünki Ermənistanda valideynlər çalışırlar ki, uşaqlarını ölkədən çıxarsınlar. Təşviş içində olan erməni valideynlər qorxurlar ki, uşaqları böyüyəndə onları Ermənistanın işğal etdiyi Azərbaycan torpaqlarında hərbi xidmətə aparacaqlar. Müasir Ermənistan uşaqları və gəncləri bu qorxu ilə yaşayırlar. Erməni gəncləri Azərbaycanın işğal altında olan ərazilərində hərbi xidmət keçməkdən qorxurlar, ona görə ki, onlar burada bir çox problemlərlə üzləşirlər. Orada mövcud olan şərait o gənclərin vəziyyətini psixoloji cəhətdən daha da ağırlaşdırır. Böyük psixoloji gücə, sosial-iqtisadi, mənəvi potensiala, təminata malik olan Azərbaycan əsgəri təbii ki, fərarilik haqqında düşünməyi belə ağlına gətirmir. Ancaq hər gün psixoloji, mənəvi-sosial problemlər içində yaşayan Ermənistan əsgəri hər an cinayət törədir, intihara əl atır, yaxud da bir-birini güllələyir. Bunun nəticəsində də Ermənistan ordusunda cinayət halları artır. Bu gün Azərbaycan Ordusunda əsgərlərin cinayət törətməsi, fərarilik etməsi üçün heç bir səbəb, mühit yoxdur. Çünki Azərbaycan əsgərinin gözləri yalnız irəliyə dikilib. Fikir verin, hərbi xidmətə çağırılanlardan istənilən birini dindirsəniz, deyəcəklər ki, Qarabağın işğaldan azad edilməsi bizim əsgərlik xidməti dövrümüzə düşsün, biz öz torpaqlarımızın işğaldan azad olunmasında iştirak etmək istəyirik. Əsgərlərimizin hamısı “mən Ali Baş Komandanın əmrini gözləyirəm” deyir. Bizim əsgərlər bu mühitdə xidmət edirlər. Erməni əsgərləri isə irəliyə yox, ancaq arxaya baxırlar ki, nə zaman onların canları orduda xidmətdən qurtaracaq və evlərinə qayıdacaqlar. Bu gün Ermənistan cəmiyyəti də hökumətdən onu tələb edir ki, qoy bizim övladlarımız öz respublikamızda xidmət etsin, öz dövlətimizi qorusun, onlar başqasının torpaqlarında xidmət etməsinlər”.
Azərbaycan Ordusunda vətənpərvərlik hisslərinin yüksək səviyyədə olması, eləcə də əsgərlərin sosial-məişət qayğılarının olmaması kimi amillərin bizim orduda fərarilik kimi hərbi cinayətlərin azalmasına səbəb olduğunu deyən Ş.Ramaldanov hesab edir ki, Azərbaycan Ordusu öz gücü, potensialı ilə Ermənistan ordusundan dəfələrlə yüksəkdir.
İradə SARIYEVA
