Ermənistanın Baş naziri Nikol Paşinyan işə velosipedlə gedib. Erməni mətbuatının yaydığı məlumata görə, bu barədə Ermənistan hökumətinin “Facebook” səhifəsində məlumat verilib.
Paşinyan özü isə səhifəsində əlavə sübut kimi artıq video yükləyib.
“Keçən dəfə inqilabi bir velosiped idi, bu dəfə isə əksinqilabçıdır” - deyə Baş nazir zarafatla yazıb. Kadrlardan göründüyü kimi, Paşinyanı onun mətbuat katibi Vladimir Karapetyan müşayiət edir.
Sosial şəbəkə istifadəçiləri isə Paşinyanın işə velosipedlə getməsinə müxtəlif şərhlər yazıblar: "Doğru variantdır, benzin 480 dram artırılıb", "Yazıq mühafizəçilər, çətinlik çəkən onlardır".
Bu arada erməni mətbuatı Paşinyanın nüfuzunun düşdüyünü yazıb. Bunu ölkədə Milli Təhlükəsizlik Xidmətinin keçirdiyi sorğu da təsdiqləyib. Bundan çıxış edərək Paşinyanın velosipedlə işə getməsini onun növbəti piar addımı kimi qəbul edənlər də var.
Onu da qeyd edək ki, Paşinyan ilk dəfə deyil velosipedlə şəhərin küçələrinə çıxır. Bundan əvvəl o, erməni bayrağının rənglərinə boyanan, “məxməri inqilab”ın simvolunu özündə əks etdirən velosipedlə şəhərə gəzintiyə çıxmışdı. O zaman telefonu yerə düşən Paşinyan uğursuz vəziyyətlə üzləşmişdi.
O da məlumdur ki, Paşinyan ötən bir ildə hansısa ciddi uğurlara nail ola bilmədi. Çoxsaylı populist vəd versə də, faktiki olaraq, onları həyata keçirmədi. Nəticədə Ermənistan Baş nazirinin cəmiyyətdə həm populyarlığı, həm də nüfuzu aşağı düşməyə başladı. İndi də, görünür, bu variantla diqqət mərkəzində qalmaq istəyir və özü barədə müsbət rəy yaratmağa cəhd edir.
Bütün bunların fonunda, Paşinyanın işə velosipedlə getməsi hansı məqsədlərə hesablana bilər? Onun bunda hədəfi nədir?
Məhəmməd Əsədullazadə: “Ancaq bu, bütün mənalarda, uğursuzdur”
Sözügedən məsələni “Bakı-Xəbər”ə şərh edən politoloq Məhəmməd Əsədullazada buna bir neçə rakursdan yanaşdı: “Ermənistanda ötən il baş verən etiraz aksiyaları nəticəsində populist vədlərlə hakimiyyətə gələn Nikol Paşinyan bir il ərzində yalnız ölkədə “Qarabağ klanı”nı təqib etmək və öz hakimiyyətini möhkəmlətməklə məşğul olub. Bir il ərzində, demək olar ki, ölkə heç bir iqtisadi sıçrayışa nail olmayıb. Ola da bilməzdi. Çünki ölkə iqtisadiyyatının 90 faizi Rusiyanın inhisarındadır və bununla Ermənistan iqtisadi müstəqillikdən məhrum olub. Paşinyan bir il ərzində iqtisadi konsepsiyalar qəbul etsə də, bu sənəd kağız parçası olaraq qalıb. Hazırda Ermənistan əhalisi Paşinyandan artıq iqtisadi möcüzə gözləmir. Blokada şəraitində olan və bütün iqtisadi layihələrdən kənarda qalan ölkənin iqtisadi inkişaf perspektivləri görsənmir. Bunu Paşinyan da gözəl anlayır və onun bundan sonra da iqtisadi islahatları yalnız imitasiya xarakteri daşıyacaq. Hesab edirəm ki, Paşinyan ölkənin iqtisadi inkişafına onda nail ola biləcək ki, Azərbaycan və Türkiyəyə qarşı ərazi iddialarından geri çəkilib işğala son qoysun. Paşinyanın velosipedlə işə gəlməsi özü barədə islahatçı obrazı yaratmaq cəhdidir. Ancaq bu, bütün mənalarda, uğursuzdur. Artıq ermənilər Paşinyanın bu kimi jestlərinin yalnız onların başını qatmağa xidmət etdiyini anlayırlar. Çünki Paşinyanın sosial və iqtisadi cəhətdən real islahatlara nail ola bilməməsi ortadadır. O yalnız belə ucuz şoularla erməniləri guya Avropa standartlarına doğru apardığını göstərmək istəyir. Ona görə də Paşinyanın velosipedlə işə gəlməsi simvolikdir. Bu, ölkənin çiçəklənməsi və demokratiyaya gedən yol deyil, aclığa, səfalətə yürüyən yoldur. Fikir versək, bir il ərzində erməni əhalisi inqilabın onlara müsbət sosial həyat vermədiyini, Sarkisyan iqtidarının davamı olduğunu görür. Paşinyanın iqtisadi siyasəti getdikcə iflasa uğrayır”.
Vidadi ORDAHALLI
