“Bu amil əsas şərtdirsə, onda niyə 30 ildir uğur qazana bilmirlər?”
Keçmiş səhiyyə naziri 14 illik həbsdən sonra danışıb. O, yeni müxalif siyasi partiya yaradacağını deyib və əvvəllər təmsil olunduğu hazırkı iqtidarın daxili və xarici siyasətini tənqid edib. Əli İnsanov müxbirin suallarına cavab olaraq deyib ki, yaradacağı siyasi qurum müxalifyönlü, qərbyönlü olacaq.
Sitat: “Mən siyasətdən uzaqlaşmamışam və yeni bir siyasi qurum yaratmaq fikrindəyəm. Çünki bu saat, Azərbaycanın bugünkü mövcud durumu bunu çox ciddi tələb edir”.
Əli İnsanov deyib ki, yaxın zamanlarda istədiyi siyasi qurumu yaratmağı və mübarizəyə başlamağı düşünür: “Ən böyük arzularımızdan biri Azərbaycan xalqına firavan həyat bəxş etməkdir. Azərbaycan sərvətləri ilə hər bir vətəndaşı varlı bir insan çevirə bilər. Marqaret Tetçer deyirdi ki, “varlı ingilis vətəndaşı varlı İngiltərə deməkdir”. Mən güman edirəm ki, biz buna nail ola bilərik. Bizim yaradacağımız siyasi qurum müxalifyönlü, qərbyönlü olacaq. Güman edirəm ki, yaxın aylarda biz hazırlıq prosesini başa çatdırıb, yaradacağımız qurumu elan edəcəyik”.
Çox maraqlıdır ki, Ə.İnsanov müsahibəsində bir neçə dəfə yeni yaradacağı qurumun qərbyönümlü olacağını xüsusi pafosla vurğulayır.
Hələ nazir olduğu dövrlərdən cəmiyyətdə əsasən neqativ imici olan Əli İnsanovun 2005-ci ildə həbsindən sonra barəsində korrupsioner imici daha da dərinləşdi. Yaşı 70-i ötmüş Əli İnsanovun bu gün yenidən siyasətə vəd etdiyi siyasi məqsədlər üçün yox, qisasçılıq niyyəti ilə gəldiyinə də indi Azərbaycanda əksəriyyət şübhə etmir. Belə taktika isə cəmiyyətə daha çox fəlakət vəd edir. Beləliklə korrupsioner, ardınca qisasçı imici qazanmış şəxsin, üstəlik, qərbyönümlü, ya şərqyönümlü siyasət barədə fikir yürütməsi də onun öz əleyhinə işləyən fakta çevrilir. Hər halda, Azərbaycan cəmiyyəti üçün çox qıcıqlandırıcı bir şeydir ki, siyasətə gələn adam “mən Azərbaycanyönümlü” olacağam yox, “Amerikayönümlü və sair yönümlü olacağam” deyir.
Azərbaycan siyasi arenasının mövcud şərtləri partiya yaradıb üzünü Şərqə, Cənuba, Qərbə və ya Şimala tutmaq şərtlərini necə qəbul edir? Hansısa xarici istiqaməti seçib, o yolun müqəddəsliyinə inanan Azərbaycanda müxalif qurumun uğur qazanması mümkündürmü?
Əsasən xarici qüvvələrlə işləməyə meylli olduğunu tez-tez büruzə verən, xalqın nə düşündüyünə əhəmiyyət verməyən qoca bir siyasət iddiaçısına cəmiyyətimiz necə baxır?
“Azərbaycan siyasi elitasının özünün də Qərblə daha sıx əlaqələri var”
Politoloq Yeganə Hacıyeva “Bakı-Xəbər”ə açıqlamasında bildirdi ki, hər hansı siyasi qüvvənin üzünü hansı xarici səmtə tutması onun uğur qazanacağını şərtləndiə bilməz: “İstər müxalifətlər, istərsə də hakimiyyətlər xalqyönümlü olanda böyük uğur qazanırlar. Xüsusilə də yeni və qurulmaqda olan təsisatlara bu amil daha çox aiddir. Hesab edirəm ki, bu addımı atan şəxslərin bəlli məqsədləri var. Analoji hadisəni biz ölkəmizdə də hiss edirik. Yeni partiya yardacağını bəyan edən şəxs ideologiyasından əvvəl haralarla işləyəcəyini bəyan edir. Daha doğrusu, bu addım həmin ölkələr və fondlardan maliyyə və siyasi dəstək almağa hesablanıb. Bir fakta diqqət edək. Azərbaycanın əsas müxalif partiyaları sağ və sağ mərkəzçidir. Onların yönümünü araşdırsanız, hamısı bəyan edir ki, Avroatlantik məkana inteqrasiyanın tərəfdarıdırlar. Özü də bu kursu onlar müstəqillikdən sonra götürüblər. Bu amil əsas şərtdirsə, onda niyə 30 ildir uğur qazana bilmirlər? Biz bu amili daha çox postsovet məkanında olan respublikalarda görürük. Ən maraqlısı isə budur ki, bu gedişləri həmin ölkələrdə də sabiq məmurlar edirlər. Yəni öz komandası ilə yollarını ayıran məmurlardan bu gedişi daha çox görürük. Zamanında biz bunları Qırğızıstan, Gürcüstan və başqa ölkələrdə görmüşük. Bəzən isə müşahidələr göstərir ki, bu faktordan yayındırıcı amil kimi istifadə edirlər. Yəni əsl simpatiyası və əlaqələrini gizlətmək üçün bu siyasi gedişə əl atırlar. Mən bunu çox da uğurlu ideya saymıram. Çünki müasir dönəmdə belə amillərlə manipulyasiya edib uğur əldə etmək mümkün deyil. Azərbaycan cəmiyyətində isə vəziyyət tam fərqlidir. Çünki Azərbaycan siyasi elitasının özünün də Qərblə daha sıx əlaqələri var. Yəni heç kim deyə bilməz ki, Azərbaycan hakimiyyəti anti-Qərb mövqeyindədir və bu arqumentlə onu üstələmək olar, kimdənsə bu istiqamətdə dəstəyin qazanılması mümkündür. Azərbaycan hakimiyyəti bu yaxınlarda Qərblə çox ciddi bir sazişin imzalanması ərəfəsindədirsə, deməli, kiminsə bu cür amillərlə manevr etməsi mümkünsüzdür. Biz hətta elə ölkələrə rast gəlirik ki, onların hakimiyyətləri sırf qərbpərəst mövqe tutsalar da, sonradan ölkələrində yaşanan ciddi problemlərlə bağlı məhz həmin dairələrdən lazımi dəstəyi ala bilməyiblər. Bura Ukraynanı, Suriyanı, İraqı və s. aid edə bilərik. Bundan əlavə, daxildə xalqla Azərbaycan hakimiyyətinin sıx birliyi mövcuddur. Bu olduqca önəmlidir və onu deməyə əsas verir ki, hansısa yönümlü qüvvə asanlıqla bu birliyi sarsıtmaq gücünə sahib deyil”.
Məhəmmədəli QƏRİBLİ
