“Paşinyanın Avrasiya Birliyinin İrəvanda keçirilən tədbirində şou göstərməsi onun belə tədbirdə özünü aparmağı bacarmaması ilə bağlıdır”
Heç bir beynəlxalq tədbir, toplantı keçirmək təcrübəsi olmayan Ermənistan təsadüfən hansısa bir beynəlxalq tədbir keçirməyə cəhd edirsə, hər dəfə gülünc vəziyyətə düşür. Bu hal Avrasiya Birliyinin İrəvanda keçirilən iclasında da yaşanıb.
Baki-xeber.com-un məlumatına görə sözügedən tədbirdə maraqlı insident baş verib. Belə ki, sənədlərin uzunmüddətli razılaşdırılmasının ardından Ermənistan Baş naziri Nikol Paşinyan çoxmənalı şəkildə “İndi də keçirik...” ifadəsini işlədib və bunun cavabında Rusiya Baş naziri Dmitri Medvedyev “Hara keçirik” deyə soruşub. Mükalimə o qədər qəribə səslənib ki, iştirakçıların qəhqəhəli gülüşünə səbəb olub. Yalnız bundan sonra Paşinyan “sənədlərin imzalanmasına” deyərək fikrini tamamlayıb.
Hətta olaya Ermənistan mətbuatının özü də ironiya ilə yanaşıb. Erməni mətbuatı yazır ki, sözügedən insident İlf və Petrovun məşhur “12 stul” filmindəki bir səhnəni xatırladıb və gülüşmə də bu üzdən yaşanıb. Erməni mətbuatı ehtimal edir ki, Medvedyev elə bu səhnəni xatırlayıb və gülüşmə də bu üzdən düşüb. Pərt vəziyyətdə qalan Paşinyan isə sonradan situasiyanı düzəltməyə çalışaraq deyib ki, sənədlər üzərində işlədiklərindən hamı çox yorulmuşdu və kofe istəyirdi...
Ermənistanda keçirilən bu tədbirdən əvvəl Fransa Prezidenti Emmauel Makronun dəstəyilə İrəvanda keçirilən Frankofoniya sammitində bir çox biabırçılıq yaşanmışdı. Frankofoniya sammitinin, ümumiyyətlə, Ermənistanın mahiyyətinə uyğun gəlmədiyi məlumdur. Bu sammitin məqəsədi birgəyaşayışı, tolerantlıq və multikulturalizmi təbliğ idi. Lakin bu göstəricilərin heç biri Ermənistanda yoxdur, o, monoetnik dövlət olduğu üçün, bu məsələ ilə onun heç bir əlaqəsi yoxdur. Qeyd edək ki, Frankofoniya sammitinin gedişində də bir sıra xoşagəlməz hadisələr baş vermişdi. Hətta tədbirə qatılan bəzi dövlətlərin nümayəndələri sammiti yarımçıq tərk etmişdilər. Qeyd edək ki, sözügedən sammitdə bəzi dövlətlərin ərazi bütövlüyünün tanıdılması məsələsi də müzakirə edilib və burada da ciddi fakir ayrılığı yaşanıb.
Frankofoniya adından da göründüyü kimi, əsasən fransız dili amili üzərində qurulub, bu halda isə həmin tədbirin ermənilərlə hər hansı bir əlaqəsinin olması sual altındadır.
Həmin tədbirdə baş verən oyunları şərh edən ekspertlər bildirirdilər ki, ermənilər bu tədbiri keçirməklə özlərini regionda sülhpərvər, tolerant bir xalq kimi göstərmək, Ermənistanı isə multikultural bir dövlət olaraq tanıtmaq məqsədi güdüb, lakin tədbirin uğursuzluğu onların bu niyyətini gözlərində qoyub.
Ermənistandan fərqli olaraq, Azərbaycan isə sıx-sıx müxtəlif profilli beynəlxalq tədbirlər keçirir. Son illər ölkəmizin evsahibliyi ilə ardıcıl olaraq fərqli sahələri əhatə edən tədbirlərin keçirilməsi beynəlxalq aləmdə olduqca müsbət qarşılanır.
İndiyə qədər ölkəmizdə müxtəlif beynəlxalq turnirlər keçirilib. Bunlardan bədii gimnastika, qılıncoynatma, taekvondo, güləş, boks, karate, avarçəkmə, FİFA U-17 Qadınlararası Dünya çempionatı, “Baku World Challenge” avtomobil yarışı və olimpiya növlərinə daxil olan digər beynəlxalq idman tədbirlərinin, o cümlədən də Dünya və Avropa çempionatlarının, İslam Oyunlarının, I Avropa Oyunlarının adlarını çəkə bilərik. Ölkəmiz böyük uğurla “Formula-1” yarışlarına evsahibliyi edir. Ölkəmizin evsahibliyi ilə “Avroviziya” musiqi yarışması da uğurla keçirildi. Ölkəmizdə ənənəvi olaraq keçirilən Bakı Humanitar Forumu, Qlobal Forum, Ümumdünya Mədəniyyətlərarası Dialoq Forumu və s. tədbirlərdə kiçik bir insident yaşanmayıb. Bu da onu göstərir ki, Ermənistanla müqayisədə Azərbaycan belə tədbirlərin keçirilməsində çox böyük təcrübəyə malikdir.
“Onların məqsədi tədbir keçirmək yox, bu tədbirləri təşkil etməklə şou düzəltməkdir”
Tanınmış tarixçi-alim, professor, siyasi icmalçı Məhərrəm Zülfüqarlı “Bakı-Xəbər”ə bildirdi ki, beynəlxalq tədbirlərin təşkilində Ermənistanla Azərbaycan müqayisə edilə bilməz. M.Zülfüqarlı hesab edir ki, Azərbaycanın bütün istiqamətlərdə beynəlxalq tədbirlər keçirmək təcrübəsi var, Ermənistan isə bu sahədə olduqca təcrübəsiz və naşıdır. “Qafqazda lider dövlət olan Azərbaycanın evsahibliyi ilə keçirilən bütün tədbirlər uğurla başa çatıb. Çünki beynəlxalq tədbirləri keçirməkdə ölkəmiz böyük təcrübəyə, iqtisadi, mədəni, sosial, siyasi resurslara malikdir. İstər Bakı Humanitar Forumu, istər mayın 2-3-də keçirilən Ümumdünya Mədəniyyətlərarası Dialoq Forumu, istərsə də digər tədbirlər uğurla başa çatıb. Beynəlxalq tədbirlərə uğurla evsahibliyi etmək təcrübəsinə malik Azərbaycandan fərqli olaraq, Ermənistanın beynəlxalq tədbirlər keçirmək səriştəsi sıfırdır. Onlar beynəlxalq tədbirlər keçirməkdə təcrübəsiz olsalar da, saxtakarlıqda, uydurma işlərdə böyük təcrübəyə sahibdirlər. Ermənistanda, ümumiyyətlə, beynəlxalq tədbirlər çox nadir hallarda keçirilir və hər dəfə bu tədbirlərdə insidentlər baş verir. Ona görə ki, onların məqsədi tədbir keçirmək yox, bu tədbirləri təşkil etməklə şou düzəltməkdir. Ermənilər hər dəfə tədbirlərdə şou düzəldirlər. Avrasiya Birliyinin tədbirində baş verənlər də Nikol Paşinyanın və ermənilərin qeyri-sabit, rabitəsiz fəaliyyətlərinin göstəricisidir. Paşinyanın Avrasiya Birliyinin İrəvanda keçirilən tədbirində şou göstərməsi onun belə tədbirdə özünü aparmağı bacarmaması ilə bağlıdır. Ermənistan heç vaxt beynəlxalq səviyyədə tədbir keçirə bilməz, çünki buna onun heç bir potensialı yoxdur. Belə tədbirləri keçirməyə cəhd göstərdikdə isə biabır olurlar” - deyə M.Zülfüqarlı qeyd etdi.
İradə SARIYEVA
