Məlumat verildiyi kimi, 2019-cu ilin 29-30 aprel tarixlərində Qazax rayonu istiqamətində Ermənistanla dövlət sərhədində Dövlət Sərhəd Xidmətinin sərhəd döyüş məntəqələri Ermənistan Respublikasının silahlı qüvvələrinin bölmələri tərəfindən bir neçə istiqamətdən günün müxtəlif vaxtlarında iriçaplı silahlardan dəfələrlə intensiv atəşə tutulmuşdu. Bütün hallarda, bölmələrimizə qarşı atəşin açıldığı Ermənistan silahlı qüvvələrinin döyüş mövqeləri istiqamətində cavab atəşi açılaraq, onlar susdurulub.
Yaranmış vəziyyətdən sonra Dövlət Sərhəd Xidmətinin rəisi, general-polkovnik Elçin Quliyev Dövlət Sərhəd Xidmətinin Sərhəd Qoşunlarının Ermənistanla dövlət sərhədində "Qazax" sərhəd dəstəsinin hərbi hissə və bölmələrinin xidməti-döyüş fəaliyyətini yoxlayıb, sərhəd döyüş məntəqələrində şəxsi heyətlə görüşüb, xidməti və yaşayış şəraitlərinə baxış keçirib.
Bu barədə DSX-nin mətbuat xidməti məlumat yayıb.
E.Quliyev dövlət sərhədində zəruri müdafiə infrastrukturunun yaradılması məqsədilə görülən işlərlə tanış olub.
Dövlət Sərhəd Xidmətinin Sərhəd Qoşunlarının və "Qazax" sərhəd dəstəsinin rəhbər vəzifəli şəxslərinin iştirakı ilə keçirilmiş xidməti müşavirədə hərbi hissə və bölmələrin döyüş hazırlığının yüksəldilməsi istiqamətində zəruri tapşırıqlar verilib.
Qeyd edək ki, cəbhənin deyilən istiqamətindəki ön xətti qorumaq bir müddət əvvəl məhz Sərhəd Qoşunlarına həvalə edilib. Qazax istiqamətində düşmənin törətdiyi təxribat Sərhəd Qoşunlarımız üçün sınaq kimi qəbul edilə bilərmi və sərhədçilərimiz bu sınaqdan necə çıxdılar?
Daşdəmir Əliyev: “Bu, sərhədçilərimiz üçün alnıaçıq çıxdıqları sınaq, düşmən üçün isə bir xəbərdarlıq oldu”
Hərbi ekspert Daşdəmir Əliyev “Bakı-Xəbər”ə açıqlamasında bildirdi ki, bəlkə də bu, Ermənistanın məhz həmin istiqamətdə həyata keçirmək istədiyi bir nəbz yoxlaması idi: “Çünki onlar bilirdilər ki, cəbhənin məhz həmin istiqamətindəki ön səngərlərdə Vətənin keşiyini çəkmək sərhədçilərimizə tapşırılıb. Qeyd edə bilərik ki, Ermənistan ilə dövlət sərhədinin Qazax və Ağstafa rayonlarının ərazisindən keçən hissəsindəki təmas xəttində xidməti-döyüş fəaliyyətinin təşkili Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev tərəfindən Dövlət Sərhəd Xidmətinə həvalə olunduqdan sonra həmin ərazilərdə dövlət sərhədlərinin müdafiəsi və mühafizəsi infrastrukturunun yaradılması tədbirləri sürətlə davam etdirilir. Sərhədçilər üçün ən müasir tələblərə cavab verən sərhəd döyüş məntəqələri, digər hərbi obyektlər qısa müddət ərzində tikilərək istifadəyə verilir. Biz bütün bu məlumatlarla mütəmadi olaraq KİV-də tanış oluruq. Məhz həmin istiqamətdə hətta yeni hərbi hissələrin açılışı da baş tutub. Dövlət sərhədinin Qazax və Ağstafa rayonları ərazisindən keçən hissəsinin Dövlət Sərhəd Xidməti tərəfindən mühafizəyə götürülməsi dövlət sərhədlərinin bütövlüyünün təmin edilməsi prosesində bir başlanğıc mərhələ kimi də qeyd oluna bilər. Qazaxda baş verən hadisə bir daha göstərdi ki, bizim istənilən növ qoşun hissələrimiz düşmənə layiqli cavab verməyə qadirdir. Onların hər biri nəinki müdafiə olunmağa, istənilən vaxt torpaqlarımızn düşməndən azad edilməsi istiqamətində aparılacaq döyüşlərdə də yüksək göstəricilər nümayiş etdirməyə qadirdir. Hesab edirəm ki, bu, sərhədçilərimiz üçün alnıaçıq çıxdıqları sınaq, düşmən üçün isə bir xəbərdarlıq oldu. Qoy bilsinlər ki, bizim bütün sərhədlərimiz belə ayıq-sayıq qorunur. Sərhəd Qoşunlarının düşmənə qarşı müharibə aparmaqda kifayət qədər təcrübəsi və parlaq ənənəsi var. Məhz bu qoşun növləri müharibənin müəyyən mərhələsində ön cəbhədə rəşadətlə vuruşub, bizim şəhid olan sərhədçilərimiz var. Bu sınaqdan mətinliklə çıxdıqlarına, düşmənə layiqli cavab verdiklərinə görə sərhədçiləri təbrik edirəm”.
Məhəmmədəli QƏRİBLİ
