Azərbaycan diplomatiyası daha bir mühüm uğura imza atıb. Bu dəfə Ermənistanın və erməni lobbisinin Latın Amerikası ölkələrində göstərdiyi fəallığın neytrallaşması istiqamətində ciddi gediş edilib. Məlumdur ki, ermənilərin Latın Amerikası regionunda ən yaxşı əlaqələr qurduğu ölkələrdən biri məhz Uruqvaydır.
Təsadüfi deyil ki, məhz bu əlaqələrin fonunda, Uruqvay hələ 1965-ci ildə qondarma “erməni soyqırımı”nı ilk tanıyan ölkə olub. Bu əlaqələrdən istifadə edərək həmin ölkədəki erməni diasporu indi də “Artsax” adlandırdıqları qondarma bir rejimin “müstəqilliyini” Uruqvayda tanıtmağa nail olmaq istəyirlər. Ancaq ölkəmizin atdığı mühüm diplomatik addımlardan hiss edilir ki, ermənilərin bu istəkləri ürəklərində qala bilər. Çünki xarici işlər naziri Elmar Məmmədyarovun Azərbaycanda rəsmi səfərdə olan Uruqvay Şərq Respublikasının xarici işlər naziri Rodolfo Nin Novoa ilə görüşündə mühüm nəticələrin əldə olunduğu bildirilir. Xarici İşlər Nazirliyindən verilən məlumata görə, nazirlərin təkbətək görüşündən sonra danışıqlar geniş tərkibdə davam etdirilib. Danışıqlar zamanı tərəflər iki ölkə arasında siyasi, iqtisadi və humanitar sahələrdə əməkdaşlığın inkişaf etdirilməsi üçün əlverişli imkanların olduğunu qeyd ediblər. E.Məmmədyarov uruqvaylı həmkarını səmimi salamlayaraq, onun ölkəmizə rəsmi səfər etməsini yüksək dəyərləndirib və hazırda Azərbaycanla Uruqvay arasında münasibətlərin genişlənməsi mərhələsinin müşahidə edildiyini bildirib.
Rodolfo Nin Novoa Prezident İlham Əliyev tərəfindən qəbul olunduğundan və Bakıda keçirilən V Dünya Mədəniyyətlərarası Dialoq Forumunda iştirak edəcəyindən məmnunluğunu ifadə edib. O, ölkələr, xalqlar arasında xoşməramlı təmasların vacibliyini vurğulayıb və Uruqvayın məhz bu mövqedən çıxış edərək artıq 200 il ərzində davamlı şəkildə dünya ölkələrinin suverenliyi və ərazi bütövlüyünə hörmətlə yanaşdığını, bu mövqeyə daim sadiq qaldığını bəyan edib.
Uruqvaylı nazir Azərbaycanı dost ölkə adlandıraraq, ikitərəfli münasibətlərin kifayət qədər geniş iqtisadi gündəmə malik olduğunu söyləyib. Buna misal olaraq o, ötən ilin nəticələrinə dair Azərbaycanın Uruqvaya ən çox neft ixrac edən 5 ölkə sırasında olduğunu yada salıb. Eyni zamanda, onun ölkəsinin Azərbaycanla kənd təsərrüfatı və digər sahələrdə əməkdaşlığın inkişaf etdirilməsində maraqlı olduğunu bildirən R.N.Novoa ikitərəfli münasibətlərin müqavilə-hüquq bazasının genişləndiyini qeyd edib.
E.Məmmədyarov Ermənistan-Azərbaycan Dağlıq Qarabağ münaqişəsinin həlli ilə bağlı Uruqvayın nümayiş etdirdiyi prinsipial mövqeyə görə təşəkkürünü ifadə edib. Münaqişənin beynəlxalq hüququn norma və prinsiplərinə əsasən, BMT Təhlükəsizlik Şurasının qəbul etdiyi məlum 4 qətnaməyə uyğun bir şəkildə həll olunmasının önəmini vurğulayıb və Uruqvay tərəfinin bəyan etdiyi rəsmi mövqeyin bununla eyni olduğunu razılıqla qeyd edib. İkitərəfli əlaqələrin müqavilə-hüquq bazasına toxunan nazir E.Məmmədyarov iqtisadi, ticarət və humanitar əməkdaşlığın təşviqi üçün daha münbit şərait yaradan bir sıra saziş layihələrinin hazırda baxılmaqda olduğunu və R.N.Novoanın hazırkı səfəri çərçivəsində Azərbaycan və Uruqvay hökumətləri arasında "İqtisadi, ticarət və texniki əməkdaşlıq haqqında Saziş"in imzalanacağını məmnuniyyətlə səsləndirib. E.Məmmədyarov Azərbaycan-Uruqvay parlamentlərarası təmaslarının genişləndirilməsinin vacibliyini qeyd edərək, həmin əlaqələrin də qarşılıqlı faydalı əməkdaşlığın mühüm istiqamətlərindən biri olduğunu vurğulayıb.
Görüş əsnasında, həmçinin, ikitərəfli və çoxtərəfli gündəliyə aid digər məsələlər ətrafında fikir mübadiləsi aparılıb. Göründüyü kimi, iki ölkə arasında bir sıra mühüm razılaşmalar əldə olunub. Azərbaycanla Uruqvay arasında əldə olunan razılaşmalar Ermənistanın həmin ölkədə həyata keçirmək istədiyi məkrli işlər istiqamətindəki fəaliyyətinin qarşısını alıb, onun əl-qolunu bağlaya bilərmi?
Qabil Hüseynli: “Bu cür münasibətlərin inkişafı həmin regionda erməni təsirlərini zəiflədə bilər”
Politoloq Qabil Hüseynli qəzetimizə bildirdi ki, Azərbaycan xarici siyasət kursunda çoxvektorlu siyasət yürüdür: “Yəni bizim milli maraqlarımıza cavab verən səviyyədə ölkələrlə əməkdaşlığımızı qurmuşuq. Balanslı siyasət, yaxın qonşularla mehriban münasibətin qorunub saxlanması, münaqişədə olan tərəflər arasında neytral qalmaq kimi kombinasiyalar bu siyasətin tərkib hissəsi olub. Məhz bu yöndə yürüdülən siyasətin uğurlarıdır ki, Azərbaycan belə təhlükəsiz şəraitdə yaşayır və inkişaf edir, özünün təbii ehtiyatlarını şaxələndirilmiş marşrutlarla dünya bazarına çıxarıb sata bilir. Bizim milli maraqlarımızın qorunmasını xarici siyasət kursunda təşkil edən istiqamətdən ən önəmlisi erməni yalanları ilə mübarizə tutur. Biz həmin ölkə ilə müharibə şəraitindəyik. Onlar həm dövlət resursları, həm də geniş diaspor imkanları ilə bizə qarşı yalan dolu təbliğatı bütün dünya ölkələrində aparırlar. Artıq dünya qloballaşdığı üçün, indi ölkələrin məkanca bizə uzaq və ya yaxın olması elə bir prinsipial əhəmiyyət kəsb etmir. Bu baxımdan da ermənilərin yeni yalanlar cücərtmək istədiyi istənilən istiqamətə həmlə etməliyik, ağıllı gedişlərimizlə onların məkrli niyyətlərinin həyata keçməsinə imkan verməməliyik. Cənubi Amerikada güclü erməni lobbisi var. Xüsusən bu regionun Argentina və Uruqvay dövlətlərində erməni lobbisi daha güclüdür. Dünya ölkələri arasında qondarma “erməni soyqırımı”nı ilk Uruqvay tanıyıb. Son vaxtlar hiss edilir ki, Azərbaycan və Türkiyə Latın Amerikasında mövqelərini gücləndirmək istiqamətində addımlar atırlar. Elmar Məmmədyarovun Latın Amerikası ölkələrinin təmsilçiləri ilə sıx-sıx görüşməsi və bu yöndə yürüdülən siyasət artıq öz bəhrəsini verib. Məsələn, ötən il həmin regionun ən önəmli ölkələrindən olan Çilinin Azərbaycanda səfirlik açmasını xüsusi qeyd edə bilərik. Hər halda, bu cür münasibətlərin inkişafı həmin regionda erməni təsirlərini zəiflədə bilər. Hesab edirəm ki, Azərbaycanın Latın Amerikası ölkələrində səfirliyinin sayını bir qədər artırması doğru addım olardı. Bu baxımdan da Uruqvayla əldə olunan razılaşmaları həmin ölkəyə erməni təsirlərini neytrallaşdırmaq baxımından önəmli saymaq olar”.
Məhəmmədəli QƏRİBLİ
