18/06/2019 13:34
728 x 90

Gürcüstan Prezidenti Azərbaycanla sərhəd məsələsini gündəmdən salmır - münasibətləri gərginləşdirmək cəhdi, yoxsa…

“Azərbaycanın maraqları tapdanacaqsa, biz məcburən dostluq edə bilmərik”

img

Gürcüstan Prezidenti Salome Zurabişvili yenidən Azərbaycanla olan bəzi sərhəd “mübahisələrini” gündəmə gətirib və məsələnin tezliklə həll edilməsinin zəruriliyini vurğulayıb. Gürcüstan Prezidentinin sözçüsü Xatiya Moissrapişvili deyib ki, Prezident ümumi sərhəddə razılaşmanın Gürcüstan və Azərbaycan arasındakı dostluğu möhkəmləndirəcəyinə və mövcud olan bütün problemləri aradan qaldıracağına əminliyini ifadə edib.

O qeyd edib ki, sərhədin və onun delimitasiyasının razılaşdırılması mövzusu bu yaxınlarda olmuş hadisədən - Azərbaycan sərhədçilərinin Udabno monastırına gedən yolu bir neçə günlüyə kəsmələrindən sonra yenidən gündəmə gəlib. Xatırladaq ki, 25 apreldə gürcü tərəfi Azərbaycan sərhədçilərinin Keşikçidağ (David Qareci) kompleksinə yolu kəsdiklərini bildirib. Azərbaycan Xarici İşlər Nazirliyinin mətbuat katibi Leyla Abdullayeva bu məlumatı şərh edərkən bəyan edib ki, Azərbaycan həmişə Azərbaycan-Gürcüstan sərhədinin tezliklə delimitasiyasının tərəfdarı olub: “Azərbaycanla Gürcüstan arasında dövlət sərhədinin delimitasiyası beynəlxalq təcrübədə tətbiq edilən qaydalara uyğun olaraq, qarşılıqlı əlaqələndirmə prosedurları əsasında, mövcud ikitərəfli formatlar çərçivəsində həll olunur.

Azərbaycan həmişə Azərbaycan-Gürcüstan sərhədinin tezliklə delimitasiya olunmasının tərəfdarı olub. Azərbaycan bu prosesi ən qısa müddət ərzində başa çatdırmağa hazırdır”.

Çox maraqlıdır ki, Azərbaycanla bağlı yersiz sərhəd mübahisəsi Gürcüstan Prezidentinin hakimiyyətə gəlməsindən sonra daha da sürətlənib və mütəmadi şəkildə gündəmə gətirilir. Nədənsə, Gürcüstanın yeni Prezidenti həmin ölkənin böyük bir ərazisində separatçılığın hökm sürdüyünü, Abxaziya və Osetiya kimi problemlərin mövcudluğunu, ölkənin ərazi bütövlüyünün bərpası zəruriliyini bu həvəslə dilə gətirmir. O halda, yeni Prezident Azərbaycanla sərhəd məsələsinə niyə belə inadlı yanaşmaq yolunu tutub? Burada Azərbaycanla münasibətləri məqsədli şəkildə gərginləşdirmək kimi maraq ola bilərmi?

  • Fərəc Quliyev: “Yeri gəlsə, öz sərt üzümüzü göstərməliyik”

Millət vəkili Fərəc Quliyev “Bakı-Xəbər”ə açıqlamasında bildirdi ki, bizim həmin ölkə ilə strateji münasibətlərimiz var: “Hər zaman demişik ki, Gürcüstanla olan oxşar taleyimiz də bizə bir qədər mehriban davranmağı diqtə edir. Ermənistan bizim ərazilərimizi işğal edib, işğalçının ağaları Gürcüstanın ərazilərini işğal altında saxlayır. Çox təəssüflər olsun ki, Gürcüstan rəhbərliyi bu cür məsələləri kənara qoyub, əsassız yerə bizim üstümüzə gəlməyi məqbul sayır. Ermənilər Cavaxetiyada yeni separatizm ocağını alovlandırırlar. Bəyəm Gürcüstan Prezidenti üçün bunlar xırda məsələlərdir? Gürcüstanın və Azərbaycanın təhdid olunduğu dairələr eyni və məlum olduğu halda, həmin ölkənin belə ehtiyatsız davranmağı doğru deyil. Onların, demək olar ki, bütün iqtisadiyyatı bizdən asılıdır. Mütəmadi olaraq onlara dəstək vermişik. 500 mindən çox soydaşımız orada yaşayır və ermənilərdən fərqli olaraq, Rusiya-Gürcüstan müharibəsi zamanı həmin ölkənin ərazi bütövlüyünü qoruyublar. Ermənilər isə Baqratyan batalyonu düzəldib  gürcülərə qarşı vuruşurdular. Göründüyü qədər, Gürcüstan rəhbərliyi bunları görmək istəmir. Buna görə də onların qarşısına mütləq siyasi ritorika qoymalıyıq ki, çərçivələri gözləsinlər. Onların iddia etdiyi məbəd Azərbaycan ərazisindədir. Tarixi mübahisələrə qalsa, Azərbaycanın belə iddiaları irəli sürməyə daha çox əsası var. Bizim ərazimizdə kilsə və ya sinaqoq yerləşirsə,  bu o demək deyil ki, həmin ərazi xristianlara və ya yəhudilərə məxsusdur. Eyni paraleli hansısa ölkədə olan məscidlərlə də bağlı aparmaq olar”.

Fərəc Quliyev deyir ki, bütün bu məsələləri sərt şəkildə Gürcüstan rəhbərliyinin diqqətinə çatdırmaq lazımdır: “Biz onlara qazı özümüzdən ucuz satırıq. Kəmərlər məsələsində torpaqların alınması maksimum qiymətlə dəyərləndirildi. Onlara ən aşağı faizlə kreditlər veririk. Nə çatışmazlıqları olursa, yanlarında dururuq. Hər bir dövlətin öz mənafeyi varsa, biz imkan verməməliyik ki, hansısa dövlət öz mənafeyi naminə bizdən sui-istifadə etsin. Azərbaycanın maraqları tapdanacaqsa, biz məcburən dostluq edə bilmərik. Yeri gəlsə, öz sərt üzümüzü göstərməliyik. Hələlik doğru yoldur ki, biz diplomatik davranırıq. Amma hesab edirəm ki, Azərbaycan Xarici İşlər Nazirliyi mən dediyim məsələləri özündə ehtiva edən bir sənədlə Gürcüstan tərəfə müraciət etməlidir. Mövqelərində dəyişiklik olmazsa, onlara yerləri göstərilməlidir”.

Məhəmmədəli QƏRİBLİ

Son xəbərlər