Gürcüstan Prezidenti Salome Zurabişvilinin bu yaxınlarda Azərbaycanla həmsərhəd zonaya səfərindən sonra, ümumilikdə, region üçün yaxşı nəticələr vəd etməyən proseslər başlanıb. Belə ki, Zurabişvili Gürcüstan-Azərbaycan sərhədinin demarkasiyası prosesinin sürətləndirilməsi məsələsini yenidən ictimailəşdirib. Rəsmi açıqlamalara istinad etsək, Gürcüstan və Azərbaycan arasında dövlət sərhədinin 34 faizi mübahisə predmeti olaraq qalır. Delimitasiya üzrə dövlət komissiyaları digər sahələr üzrə razılaşmalar əldə ediblər.
Hamımıza o da məlumdur ki, Gürcüstanın üzərində durduğu əsas məsələ Keşikçidağ (David Qareci) monastır kompleksi ilə bağlıdır. Maraqlıdır ki, Gürcüstanın hazırkı deputatları və sabiq rəsmiləri bu mövzu ilə bağlı əsl təxribat xarakterli fəaliyyətə start veriblər. İki gün əvvəl bölgəyə gələn gürcü deputat Şalva Natelaşvili üzünü sərhədçilərimizə tutaraq azərbaycanlıları təhqir etməkdən belə çəkinməyib. Belə ki, müxalif Liberal Partiyasının sədri Şalva Natelaşvili sərhədçilərimizə səslənərək bunları deyib: "Sizin əcdadlarınız Orta Asiyada yaşayanda bizim əcdadlarımız burada bu mədəniyyəti qurublar. Siz Orta Asiyadan gəlibsiniz. Sizin Qafqazla heç bir əlaqəniz yoxdur".
Sonra üzünü jurnalistlərə tutaraq "bu, Azərbaycanın Gürcüstana açıq-aşkar təcavüzü və işğalıdır. Rusiya bir tərəfdən, Azərbaycan da bir tərəfdən bizə təcavüz edir" kimi fikirlər səsləndirib.
Bunun ardınca, keçmiş prezident Mixeil Saakaşvilinin dönəmində Gürcüstanın müdafiə naziri postunda çalışmış İrakli Okuruaşvilinin açıqlaması da bu qəbildən olub və ancaq ölkələr arasındakı münasibətlərə xələl gətirmək məqsədini güdüb. O, “Gürcü arzusu”nun lideri Bidzina İvanişviliyə Azərbaycanla bağlı “məsləhətlər” verərək bildirib ki, nazır kimi çalışdığı dövrdə Azərbaycanla hansısa bir məsələdə problem yaranıbmış. O vaxt Azərbaycanın daxili işlər naziri ilə sərhəddə görüşdüyünü, ertəsi günü bu problemin gürcülərin xeyrinə qərar verilərək həll olunmayacağı təqdirdə 500 min azərbaycanlını “Qırmızı körpü”də qarşılamalı olacağını xatırladıb.
Bu adamlar belə açıqlamaların nəyə xidmət etdiyini və nələrə yol aça biləcəyini hesablaya bilmirlərmi? Və ya süni canfəşanlığın arxasından kənar siyasi qüvvələrin boylandığı hiss olunmurmu?
Milli Məclisin üzvü, Azərbaycan-Gürcüstan parlamentlərarası dostluq qrupunun rəhbəri Əflatun Amaşov bildirdi ki, Azərbaycanla Gürcüstan arasındakı münasibətlər kifayət qədər yüksək səviyyədədir: “İstər iqtisadi, istər siyasi, istərsə də mədəni əlaqələrə dair mütəmadi şəkildə görüşlər keçirilir, fikir mübadiləsi aparılır. Biz regionda strateji tərəfdaşıq. Lakin zaman-zaman bəzi qüvvələr ortaya hansısa problemlər çıxarmağa çalışırlar. Məsələn, Rusiya ilə Ermənistan arasında Abxaziyadan keçməklə dəmir yolunun çəkilməsi, yaxud Cənubi Osetiyadan avtomobil yolunun çəkilməsi kimi məsələlər, istər-istəməz, narahatlıq doğurur. Həmçinin, Gürcüstanda günahsız azərbaycanlıların qanını tökmüş erməni terrorçusuna abidə qoyulması kimi məsələlərlə Gürcüstan-Azərbaycan dostluğu sanki sınağa çəkilib. Bu sayaq sınaqlardan, imtahanlardan hər iki tərəf uğurla çıxıb. Birmənalı şəkildə demək olar ki, bizə düşmən olan Ermənistan və bəzi digər dövlətlər bu münasibətlərə hər zaman xələl gətirməyə, ”parçalayıb hökm sürməyə" bir daha cəhd edirlər. Son zamanlar Keşikçidağ monastır kompleksi ilə bağlı gündəmə gələn məsələ də eyni qəbildəndir. Hazırda Gürcüstan və Azərbaycan arasında sərhədlərin delimitasiya olunması 66 faiz həyata keçirilib, 34 faiz isə həllini tapmamış qalıb. Keşikçidağ kompleksi də həmin ərazilərdə yerləşir. Bununla bağlı müvafiq qurumlar mütəmadi olaraq görüşür. Gürcüstan və Azərbaycan sərhədlərinin müəyyənləşdirilməsi üçün yaradılan komissiya bir neçə dəfə bu məsələləri müzakirə edib. Mən əminəm ki, həm Azərbaycan, həm Gürcüstan tərəfi bu məsələyə də aydınlıq gətirəcək və hər iki ölkə arasındakı dostluq və əməkdaşlıq pozulmayacaq".
Azərbaycan XİN-in də bu məsələyə münasibətini açıqlayıb. Bildirilib ki, Azərbaycan daim Gürcüstanla sərhədin tezliklə delimitasiyasının tərəfdarı olub. “Azərbaycanla Gürcüstan arasında dövlət sərhədinin delimitasiyası beynəlxalq təcrübədə tətbiq edilən qaydalara uyğun olaraq, qarşılıqlı əlaqələndirmə prosedurları əsasında, mövcud ikitərəfli formatlar çərçivəsində həll olunur. Azərbaycan həmişə Azərbaycan-Gürcüstan sərhədinin tezliklə delimitasiya olunmasının tərəfdarı olub. Azərbaycan bu prosesi ən qısa müddət ərzində başa çatdırmağa hazırdır”.
Qeyd edək ki, gürcü siyasətçilərinin avantürist davranışlarına həmin ölkənin parlamentində təmsil olunan əslən azərbaycanlı millət vəkillərinin də sərt münasibəti olub. Gürcüstan parlamentində təmsil olunan deputat Savalan Mirzəyev öz “Facebook” səhifəsində yazdığı fikirlərdə təxribata cəhd edənləri sərt tənqid edib: “İrakli Okruaşvilini xatırlayırsınızmı? Keçmiş daxili işlər, müdafiə və iqtisadiyyat naziri (bir həftəlik). Okruaşvili birbaşa qeyd etdi ki, Gürcüstanda yaşayan azərbaycanlıları bir gündə vətəndən alıb sərhədə qoyacağam. Həqiqətən vətəndən, cünki azərbaycanlılar əsrlərdir Gürcüstanda yaşayır və Gürcüstan öz vətənidir. Azərbaycanlılar gürcü torpağında yad deyillər və ölkəni gürcülərdən az sevmirlər. Azərbaycanlılar Gürcüstanın inkişaf etməsinə gürcülərdən daha çox öz töhfəsini verməyə çalışırlar. Azərbaycan kəndlərində mövcud olan qədim qəbir daşları əsrlərdir mövcuddur, bizim əcdadlarımız Gürcüstanda doğulurdular, Gürcüstan üçün yaşayırdılar və Gürcüstan üçün ölürdülər. Okruaşvilinin bəyanatı isə separatizmin birbaşa ifadəsidir ... Şalva Natelaşvili olmayan qığılcımdan atəş çıxarmağa cəhd etdi və hakimiyyətdən BMT-nin Təhlükəsizlik Şurasını dəvət etməyi tələb etdi. Natelaşvili və hər kəs bilməlidir ki Azərbaycan heç bir zaman Gürcüstana qarşı aqressiya (təcavüz) həyata keçirməyəcək və heç bir zaman onun ərazisini işğal etməyəcək. Necə ki, Gürcüstan heç bir zaman Azərbaycana qarşı aqressiv olmayacaq və heç bir zaman ərazisini işğal etməyəcək. Niyə? Çünki bu iki qonşu dövlət arasında qardaşlıq əsrlər boyu var və bir çox əsr olacaq. Bəli, hər bir azərbaycanlı fəxr edir ki, Gürcüstan öz vətənidir, burada yaşayan hər bir azərbaycanlını Gürcüstanın kədərinə üzülür və Gürcüstanın uğuruna sevinir. Bunu heç kim silə bilməz və dəyişə bilməz. Biz Gürcüstanda yaşayan azərbaycanlılar bu qürurlu ölkənin qürurlu övladlarıyıq”.
Politoloq Yeganə Hacıyeva qəzetimizə açıqlamasında bildirdi ki, bu əməlləri törədənlər birbaşa təxribatla məşğul olurlar. Müsahibimiz hesab edir ki, belə tendensiyanın meydana çıxmasında Gürcüstanın yeni seçilmiş Prezidentinin də “xidmətləri” az deyil: “Bu ilin fevral ayında Gürcüstan Prezidentinin Azərbaycana səfərindən sonra qonşu, dost ölkədə Azərbaycan-Gürcüstan sərhədlərinin delimitasiya və demarkasiyası mövzusu ətrafinda yüksələn tendensiya ilə “maraqlı” bir təbliğat gedir. Gürcüstanda keçirilən son seçkilərlə konstitusiyaya edilən dəyişikliklərdən sonra ölkəsində sadəcə nominal prezident olan S.Zurabişvili qanunvericiliyə görə, ölkə sərhədlərinin delimitasiya və demarkasiyası istiqamətində istər təşəbbüsçü kimi, istərsə də icraçı kimi heç bir səlahiyyəti olmasa da, Azərbaycan-Gürcüstan sərhədlərinin delimitasiya və demarkasiyası mövzusunu sanki ölkəsinin xarici siyasətinin prioritet mövzusu qədər aktual saxlayır. Belə ki, ölkə qanunvericiliyinə görə, bu məsələ ətrafında qərarvermə və icra səlahiyyəti Gürcüstanın baş naziri və dövlət sərhədinin delimitasiyası üzrə komissiyaya aidiyyəti olan bir məsələdir.
Belə olan halda, Gürcüstanın yeni, keçmişdə xarici siyasət xidmətində görkəmli postlara yiyələnmiş nominal prezidentinin ölkəsinin strateji tərəfdaşı Azərbaycana ilk səfərində qonşu, dost ölkə ilə sərhədlərin delimitasiya və demarkasiyası mövzusu ətrafinda başlatdığı müzakirə və bunun ardınca ölkəsində yüksələn tendensiya ilə davam etdirdiyi bu məsələnin S.Zurabişvili və onu dəstəkləyən siyasi qrup tərəfindən ölkədaxili təbliğatda alət kimi istifadə edilməsi heç bir şübhə doğurmur.
Xanım Zurabişvilinin ölkəsinin sərhədlərinin təhlükəsizliyi mövzusunda narahatlığı varsa, məntiqlə bunu digər daha “həssas qonşularla sərhəd” mövzusunda, ölkəsinin pozulmuş ərazi bütövlüyü istiqamətində ifadə və nümayiş etdirmək yerinə düşərdi.
Çünki Gürcüstanın 4 qonşu dövlətlə sərhədindən elə ən təhlükəsizi strateji tərəfdaşı olan Azərbaycanladır.
Əlbəttə, bu mövzu ətrafında, iki dost ölkə arasında sərhəd məsələləri ətrafında gərginliyin artmasına yönəlik fəaliyyətlər həmişə mövcud olub və fikrimcə, bu yolverilməzdir. İstər Gürcüstanda, istərsə də Azərbaycanda cəmiyyət bu tip fəaliyyətləri həmişə narahatlıqla izləyib və bu məsələdə xoşməramlı və konstruktiv bir məcrada müzakirələr aparılması tərəflərin prioritet seçimi olub. Fikir versəniz görərsiniz ki, bu vəziyyətə daha çox sevinən Ermənistandır. Onların təbliğat maşını gərginliyin daha da qızışması istiqamətində fəaliyyət göstərir”.
Məhəmmədəli QƏRİBLİ
