Ermənistan Kollektiv Təhlükəsizlik Müqaviləsi Təşkilatının (KTMT) nizamnaməsinə dəyişiklik təklif edib. Ermənistan KİV-i məlumat verir ki, təklifə əsasən, KTMT-nin baş katibi postdan vaxtından əvvəl gedəcəyi halda vəzifə onun təmsil etdiyi ölkədə qalmalıdır.
Təklifə KTMT Xarici İşlər Nazirləri Şurasının mayın 22-si Qırğızıstanın paytaxtı Bişkekdə keçiriləcək iclasında baxılmalıdır. Nizamnamə dəyişikliyi razılaşdırılsa, təklif üzv ölkələrin liderlərinin daxil olduğu ali orqana – Kollektiv Təhlükəsizlik Şurasına göndəriləcək. Kollektiv Təhlükəsizlik Şurasının sammiti payızda keçirilməlidir. Hazırda 2020-ci ilədək baş katib səlahiyyətinin müvəqqəti icraçısı Rusiyanın nümayəndəsi Valeri Semerikovdur. Daha sonra bu vəzifə Belarusa təhvil veriləcək.
KTMT-nin nazirlər şurasının gündəliyi və imzalanacaq sənədlər toplusu hazırda formalaşmaqdadır. KTMT-nin əsasnaməsinə ehtimal edilən dəyişikliklər barədə suala cavab verərkən Ruriya Xarici İşlər Nazirliyinin rəsmi nümayəndəsi bildirib ki, daha ətraflı məlumat yaxın günlərdə təqdim ediləcək.
Ermənistan bu dəyişiklik təklifini etməklə hansı məqsədi güdür və istəyinin reallaşacağı nə dərəcədə inandırıcıdır?
Daşdəmir Əliyev: “Düşünmürəm ki, KTMT-nin digər üzvləri buna razılıq versinlər”
Hərbi ekspert Daşdəmir Əliyev qəzetimizə açıqlamasında bildirdi ki, bununla Ermənistan bir müddət əvvəl düçar olduğu KTMT rüsvayçılığının qisasını almağa çalışır: “Bilirsiniz ki, 1992-ci ildə yaradılan hərbi-siyasi birliyə Rusiya, Belarus, Ermənistan, Qazaxıstan, Qırğızıstan və Tacikistan daxildir. Qurumda ali vəzifəli şəxs olan baş katib postunu 2017-ci il mayın 2-dən erməni general-polkovnik Yuri Xaçaturov tutub. Üç il müddətinə seçilən Yuri Xaçaturov 2018-ci il oktyabrın 30-da Ermənistanın təşəbbüsü ilə vəzifədən uzaqlaşdırılıb. Bu da ona görə baş verdi ki, yeni hakimiyyətə gələn Paşinyan həmin generalı korrupsiyada ittiham edib, həbsinə nail oldu. Hazırda baş katib səlahiyyətləri müvəqqəti olaraq rusiyalı müavin Valeri Semerikova verilib. Ermənistan baş katib postuna sabiq müdafiə naziri Vaqarşak Arutyunyanı namizəd göstərdi. Ancaq KTMT-nin digər üzvləri Ermənistan nümayəndəsinin yenidən baş katib olmasını istəməyiblər. Belarus baş katib postuna öz təmsilçisi Stanislav Zası irəli sürüb. Qırğızıstan, Qazaxıstan, Tacikistan və Rusiya razılıq versə də, Ermənistanın müqaviməti üzündən Stanislav Zas baş katib ola bilməyib. Ermənistan istəyir ki, bu məğlubiyyətini təklif etdiyi nizamnamə dəyişikliyi ilə kompensasiya etsin. Ancaq düşünmürəm ki, KTMT-nin digər üzvləri buna razılıq versinlər. Rəsmi İrəvan KTMT-dən Azərbaycana qarşı da təzyiq kimi istifadə etməyə cəhd edir. Onun belə cəhdləri çox olsa da, heç bir fayda verməyib. Çünki həmin qurumun digər üzvlərinin Azərbaycanla olduqca yaxın münasibətləri mövcuddur. Ermənistan baş katib postunu öz səhvliyindən itirməyi ilə barışa bilmir. Bu da Paşinyanın lap naşı vaxtına düşdü. İndi səhv etdiklərini başa düşüblər, amma gecdir. Onların KTMT-də sədrlik etməsinin belə Azərbaycana heç bir mənfi təsiri ola bilməz. Çünki KTMT səviyyəsində bununla bağlı dəfələrlə bəyanat verilib. Məzmunu da bundan ibarətdir ki, Ermənistan KTMT üzvlüyü və ya ora rəhbərlik etməsindən münaqişədə olduğu tərəfə qarşı təzyiq aləti kimi istifadə edə bilməz. Bunları anladıqları üçün, səsi olmayan müğənnilər kimi gündə qışqıraraq bir mahnı oxuyurlar ki, bəlkə diqqəti özlərinə cəlb edə bilsinlər”.
Məhəmmədəli QƏRİBLİ
