Aprelin 25-də Moskvada metronun “Novıye Çeryomuşki” stansiyası yaxınlığında qanlı insident baş verib. Kimliyi məlum olmayan bir nəfər naməlum silahdan atəş açaraq başqa bir nəfəri, daha sonra özünü öldürüb.
Rusiya mətbuatı ölənlərin azərbaycanlı olduğunu yazıb. Məlumata görə, insident yeraltı keçidin yaxınlığında olub. Hadisə şahidlərinin dediyinə görə, iki nəfər yüksək səslə mübahisə edib, sonra onlardan biri “Naqan” markalı tapançadan atəş açaraq öncə qarşısındakını, daha sonra özünü öldürüb. Hadisəni törədənin Rəsul Abdullayev olduğu bildirilir. Öldürülən şəxsin cibindən isə jurnalist vəsiqəsi tapılıb. Qətlin kriminal mübahisə zəminində baş verdiyi məlum olub. Maraqlıdır ki, öldürülən şəxsin vəsiqəsi istiqamətində aparılan araşdırmalardan məlum olub ki, vəsiqənin verildiyi iddia edilən KİV belə bir əməkdaşının olmadığını bəyan edib. Bu, azərbaycanlılarla bağlı xarici ölkələrdə baş verən ilk hadisə deyil ki, kriminal zəmində öldürülən şəxsin cibindən jurnalist vəsiqəsi çıxır. Bənzər bir hal bir müddət əvvəl Fransada baş vermişdi. Həmin vaxt bəzi xarici və yerli kütləvi informasiya vasitələrində Rahim Şəkinski olaraq göstərilən Rahim Namazov adlı şəxsin Fransada güllələndiyinə dair məlumatlar yayılıb və öldürülənin jurnalist olduğu bildirilib. Yayılmış informasiyalarda, həmçinin, Fransa telekanalının da məsələni məhz azərbaycanlı jurnalistin güllələndiyi kimi təqdim etməsi önə çəkilib. O vaxt məsələyə hətta Azərbaycan Mətbuat Şurasının sədri səviyyəsində də münasibət bildirildi. Əflatun Amaşov demişdi ki, media sahəsində uzun müddət fəaliyyət göstərmiş biri olaraq Rahim Namazov adlı jurnalisti tanımır.
Hər halda, maraqlıdır ki, bu cür kriminal elementlər jurnalist vəsiqəsini necə əldə edir və bununla hansı məqsədi güdürlər? Bəzi ekspertlər hesab edirlər ki, burada müxtəlif maraqlar ola bilər. Biri bundan ibarətdir ki, xaricdə sığınacaq almaq məqsədilə müxtəlif yollarla jurnalist vəsiqəsi əldə etməkdə maraqlı olurlar. Digər versiya isə həmin elementlərin daim hüquq-mühafizə orqanları əməkdaşlarının diqqətinə düşə biləcəyi ilə bağlıdır. Belə olan təqdirdə, jurnalist vəsiqəsini təqdim edib, bütün şübhələri üzərlərindən ata bilirlər. Bəs görəsən yerli ekspertlər kriminal aləmin nümayəndələrinin jurnalist vəsiqəsinə göstərdikləri marağı nə ilə izah edirlər?
Yadigar Məmmədli: “Hətta bir vaxtlar bizim yaxından əməkdaşlıq etdiyimiz beynəlxalq qurumlar da buna təəccüblənirdilər”
Media eksperti Yadigar Məmmədli qəzetimizə açıqlamasında bildirdi ki, belə halların daha çox Azərbaycanda və azərbaycanlılarla bağlı baş verdiyinə təəssüf edir: “Bəlkə də biz yeganə ölkəyik ki, başqa peşə sahibləri jurnalist vəsiqəsi daşımağa belə meyl edirlər. Görünür, jurnalist adından sui-istifadə halları hələ tam bitmədiyi üçün, belə vasitələrə əl atılır. Sanki hərə öz adı ilə çağırılmaq istəmir. Neçə illərdir bu tip şəxslərlə “reket” jurnalistikası çərçivəsində mübarizə aparırıq. Bu mübarizə kontekstində görürük ki, reketçiliklə, başqalarının şəxsi həyatına müdaxilə etməklə maddi qazanc əldə etmək istəyənlər az deyil. Bütün bunlar da jurnalist adı ilə edilir. Bunun da başlıca səbəbi ölkəmizdə söz azadlığından bəzi elementlərin sui-istifadə etmələri ilə bağlıdır. Bilirsiniz ki, bizdə kiminsə KİV təsis etməklə bağlı heç bir problemi yoxdur. Bunu asanlıqla edənlər kimə istəyirlərsə vəsiqələr verir, bəzən isə satırlar. Bu baxımdan da hər hansı azərbaycanlının cibində KİV vəsiqəsi gəzdirməsi mümkündür. Amma onların başına gələn hadisədə həmin elementləri jurnalist kimi təqdim etmək doğru deyil. Hətta bir vaxtlar bizim yaxından əməkdaşlıq etdiyimiz beynəlxalq qurumlar da buna təəccüblənirdilər. Mitinqlərdə saxlananların çoxunun cibindən jurnalist vəsiqələri çıxırdı. Araşdırıldıqda məlum olurdu ki, həmin adamların jurnalistika ilə heç bir əlaqəsi olmayıb. Bundan əlavə, xaricdə sığınacaq almaq məqsədilə də belə üsuldan istifadə edənlər az olmur. Yəqin ki, zaman keçdikcə, bu problem də yoluna qoyulacaq”.
Məhəmmədəli QƏRİBLİ
