Dağlıq Qarabağ mövzusuna yanaşmada, demək olar ki, Azərbaycan iqtidarı ilə müxalifəti arasında prinsipial fikir ayrılığı yoxdur. Ancaq buna baxmayaraq, həssas olan bu mövzu ətrafında bəzi qurumların fərqli məkanlarda daim ciddi müzakirələr apardığının şahidi oluruq.
Bu, əslində, normaldır. Hətta bu adla çağırılan mitinqlərdə də görürsən ki, səslənən şüarlarla hakimiyyətin yürütdüyü Qarabağ siyasətinin bütün istiqamətləri üst-üstə düşür. Təsadüfi deyil ki, cəmiyyətdə tez-tez bu mövzu ilə bağlı müxtəlif təkliflər səslənir. Məsələn, deyilir ki, dünya birliyinə ciddi mesaj vermək üçün iqtidarlı və müxalifətli birlikdə möhtəşəm milyonluq mitinq keçirmək lazımdır. Bu təkliflər sırasında parlamentdə bütün fəal partiyaların və ziyalıların iştirakı ilə Qarabağ müzakirələrinin keçirilməsinin zəruriliyi də vurğulanır. Qeyd edək ki, belə bir müzakirə sonuncu dəfə 2001-ci ilin fevral ayında keçirilib. Parlamentin bu formatda müzakirə keçirməsinə münasibət necədir?
Fəzail Ağamalı: “Onda yığışmalıyıq ki, həqiqətən buna ehtiyac olsun”
Millət vəkili Fəzail Ağamalı “Bakı-Xəbər”ə açıqlamasında bildirdi ki, hələlik belə bir müzakirənin keçirilməsinə zərurət görmür: “Baxaq görək, Paşinyan deyilən diletant hara qədər gəlib çıxa biləcək? Hər gün biri digərini təkzib edən açıqlamalar verir. Bundan əlavə, Azərbaycan Avropa İttifaqı ilə mühüm bir saziş imzalamaq ərəfəsindədir. Paşinyan bundan istifadə edib Azərbaycana qarşı təxribatlarını davam etdirir. Çalışır ki, həmin sazişin imzalanması təxirə salınsın. Təəssüf ki, bu kampaniyaya bəzi antimilli ünsürlər də qoşulublar. Yəni Qarabağla bağlı vəziyyət heç də normal deyil. Çox qaranlıq və kifayət qədər müəammalı vəziyyət var. Tərəfləri gah Rusiya, gah da ABŞ çağırır, məsləhətləşmə aparmaq istəyir. Rusiyadakı görüşdən sonra Kazan formulu, Lavrov planı ətrafında müzakirələr gedir. Baxaq görək, bu məsələlərin axırı necə olur. Bu mürəkkəb situasiyaya aydınlıq gətirmədən iqtidarlı-müxalifətli yığışıb məsələni müzakirə etmək nəyə lazımdır? Onda yığışmalıyıq ki, həqiqətən buna ehtiyac olsun. Bu gün ölkə Prezidenti Dağlıq Qarabağ və digər mövzularda Azərbaycanın dövlət və milli maraqlarını yüksək səviyyədə təmsil edir. Bu yöndə bütün enerjisini, bacarığını ortaya qoyur. Bu baxımdan da hələlik belə formatda bir müzakirəyə zərurət görmürəm. Lazımi situasiya yetişəndə bu reallaşacaq”.
Akif Nağı: “Belə bir müzakirənin keçirilməsinin çox böyük faydası ola bilər”
Qarabağ Azadlıq Təşkilatının sədri Akif Nağı isə hesab edir ki, belə müzakirəyə mütləq mənada ehtiyac var: “Belə bir təkliflə biz də, təşkilat olaraq, Milli Məclisə müraciət etmişik. Ən azından, bunun niyə baş tutmadığı barədə bizə məlumat verilməlidir. 2001-ci ildə məhz bu səpkidə görüş oldu. Bütün ictimaiyyət nümayəndələrinin fikri dinlənildi. Hətta həmin vaxt ölkə rəhbəri təklif etdi ki, kimin nə təklifi varsa versin. Bu belə olmalıdır. Mən bilirəm ki, belə bir müzakirələrin aparılmasını təklif edən millət vəkilləri var. Yəqin ki, hansısa anlaşılmazlıq var. Ən azından, bunun səbəbi bizə izah edilməlidir. Belə bir müzakirənin keçirilməsinin çox böyük faydası ola bilər. Har halda, cəmiyyət məlumatlanar ki, Dağlıq Qarabağla bağlı danışıqların gedişində hansı məsələlər müzakirə edilir. Hazırda bununla bağlı cəmiyyətdə ciddi bir narahatlıq var. Bu qədər vaxt keçib, danışıqlar da nəticə vermir. Buna görə də mövzunun parlamentdə müzakirə edilməsinin tam zamanıdır”.
Məhəmmədəli QƏRİBLİ
