“Qarabağ klanı” ilə mövcud Ermənistan hakimiyyəti arasında çəkişmələrin getdikcə daha da şiddətlənməsi müşahidə olunmaqdadır. Belə görünür ki, baş nazir Nikol Paşinyan özünə əsas təhlükə hesab etdiyi bu klanı tam sıradan çıxarmaqda, onun əsas təmsilçilərini həbsə atmaqla neytrallaşdırmaqda israrlıdır. Bunun üçün isə məlum 1 mart hadisələri indi Paşinyanın əlində “Qarabağ klanı”na qarşı ən güclü silah sayılır.
Məhz belə bir vaxtda bəlli olub ki, “Qarabağ klanı”nın daha bir əsas təmsilçisi yenə 1 mart hadisələri fonunda sıradan çıxarılır. Belə ki, Ermənistanın sabiq daxili işlər naziri, general-polkovnik Vladimir Kasparyan 1 mart terroru ilə bağlı xüsusi istintaq komitəsinə çağırılıb. Ona ölkəni tərk etməmək barədə bildiriş verilib və əmlakına müsadirə qoyulub. Kasparyan istintaqa ifadəsində verilən göstərişi yerinə yetirdiyini deyib. Bununla yanaşı, Kasparyan, həmçinin iş adamından 900 milyon dram rüşvət almaqda şübhəli bilinir. Onun həyat yoldaşının adı isə fırıldaqçılıqda hallanır. Artıq Kasparyanın həbsi qaçılmaz sayılır. Erməni mediası yazır ki, həbsə atılan “Qarabağ klanı”nın təmsilçilərinin buradan çıxmaq şansı yoxdur və misal olaraq “qəssab” ləqəbli general-leytenant Manvel Qriqoryanın aqibəti göstərilir. Ermənistanın müdafiə nazirinin sabiq müavini olan Qriqoryanın məhkəməsi davam edir. Məhkəmə 10 milyon dollar girov qoyularaq generalın müvəqqəti azadlığa çıxmasını rədd edib. Bildirilir ki, bu göstəriş əslində hakimiyyət rəhbərliyindən gəldyindən, belə bir addım atılıb.
Xatırladaq ki, Ermənistanın 3-cü prezidenti Serj Sarkisyanın silahdaşı və ən yaxın dostu olan keçmiş nazir müavini qanunvericiliyin bir neçə maddəsi ilə qanunsuz silah-sursat saxlamaqda, dövlət əmlakını mənimsəmədə, vergidən yayınmada, çirkli pulların yuyulmasında təqsirkar bilinir. “Qəssab” ləqəbli generalın Ermənistan ordusuna məxsus ərzaq məhsullarını talayaraq daxili və xarici bazarlarda satdığı müəyyənləşib. Bu faktlar sübuta yetirilərsə o, ömürlük azadlıqdan məhrum oluna bilər.
“Qarabağ klanı”nın əsas təmsilçilərindən biri olan Ermənistanın ikinci prezidenti Robert Köçəryanı da ömürlük həbs gözləyir. Qeyd edək ki, onun qalmaqallı rüşvət cinayəti üzrə növbəti məhkəmə prosesi 6 aydan sonra keçiriləcək. Məlumata görə, İrəvan şəhərinin Şenqavit rayon məhkəməsində iş adamı Silva Ambarçumyanın Robert Köçəryana qarşı 2 milyon dollar rüşvətalma iddiasının detalları ilə bağlı hazırlıq iclası keçirilib. Məhkəmədə Köçəryanın vəkillər komandasının üzvü Artyom Orbelyan bildirib ki, Silva Ambarçumyanın verdiyi ifadələr şər-böhtan xarakteri daşıyır. Onun şəxsən Köçəryanla heç bir əlaqəsi olmayıb və onlar heç vaxt görüşməyiblər: “ Paşinyan keçmiş rəqiblərindən qisas alırsa, o zaman nə üçün ölkənin digər rəhbər şəxslərinə qarşı ittihamlar irəli sürülmür?“ Qeyd edək ki, ərəb ölkələrində biznesi olan Silva Ambarçumyan keçən ilin noyabrında Ermənistana dəvət olunaraq xüsusi istintaq komitəsində dindirilib. Sonra onun Robert Köçəryanla üzləşməsi prosesi təşkil edilib. Silva Ambarçumyan bir daha bildirib ki, Köçəryan sabiq xarici işlər naziri Vardan Oskanyının vasitəçiliyilə 1 mart hadisələrindən əvvəl ondan 2 milyon dollar alıb. Robert Köçəryanın cinayət materialına bu maddə də əlavə edilərsə, o zaman onu ömürlük həbs gözləyir. Burada onu da xatırladaq ki, 1 mart olaylarına görə artıq Robert Köçəryan, eləcə də sabiq müdafiə naziri Seyran Ohanyan, keçmiş baş nazirin müavini Armen Qevorkyan və KTMT-nin sabiq baş katibi Yuri Xaçaturova qarşı açılan cinayət işi üzrə aparılan ilkin istintaq prosesi başa çatıb. Ermənistanın Xüsusi İstintaq Xidməti bildirir ki, istintaq nəticəsində əldə olunan dəlillər adıçəkilən şəxslərə qarşı iddianamənin hazırlanması və cinayət işinin məhkəməyə ötürülməsi üçün kifayət edir. Xatırladaq ki, Köçəryan, Ohanyan və Xaçaturov 2008-ci ilin martın 1-də ölkədə keçirilən etiraz aksiyalarının dağıdılması zamanı 10 nəfərin ölümü və Ermənistanın konstitusiya quruluşunu devirmək cəhdi ilə əlaqədar açılan cinayət işi çərçivəsində ittiham olunur. Armen Qevorkyan isə küllü miqdarda rüşvət almaqda, çirkli pulların yuyulmasında, konstitusiya quruluşunu devirmək cəhdində iştirakda və 1 mart hadisələrilə bağlı ədalət mühakiməsinə əngəl törətməkdə ittiham edilir.
Erməni mediası yazır ki, növbə tezliklə Serj Sarkisyana da çatacaq. Artıq bunun üçün ilkin zəmin də hazırlanır. Məsələn, sosial şəbəkələrdə hakimiyyətə yaxın şəxslər indi bu məqamı aktiv şəkildə gündəmə gətirirlər ki, Serj Sarkisyan indiyədək hər hansı cinayəti törətməkdə ittiham edilmirsə, cinayətkar deyilsə, o zaman inqilab nə üçün baş verib. Bu suala cavab verərkən Paşinyan artıq keçmiş iqtidarın yüksək vəzifəli şəxslərinə qarşı açılan onlarla cinayət işinin olduğunu xatırladıb: “Bu gün Manvel Qriqoryan, Robert Köçəryan həbs edilib, Miqran Poğosyan və digər sabiq vəzifəlilərə qarşı axtarış elan olunub. Mənim üçün prinsip birdir, heç kim himayəli olmayacaq, hamı qanun qarşısında birdir. Ancaq mənə verilən bu sualda Serj Sarkisyanın hər hansı iş üzrə itiham edilib-ediməyəcəyindən asılı olmayaraq, başqa bir kontekst də var. Mən bu sualın sətir altında aşağıdakı məqamı başa düşürəm: Serj Sarkisyanla gizli razılaşmanızın olması mümkündürmü? Dəqiq deyirəm, mən bu cür oyunlara cəlb edilə bilmərəm, gəlin bunu birmənalı vurğulayaq. Deyə bilmərəm ki, Serj Sarkisyan hər hansı bir işdə ittiham ediləcək, ya yox. Ancaq zəmanət verə bilərəm ki, ittiham edilməsi üçün əsaslar olarsa, hər hansı siyasi maneə olmayacaq”.
Ermənistan parlamentinin sabiq vitse-spikeri Eduard Şarmazanov bütün bunların qisas məqsədilə atlıan addımlar olduğunu bildirib. Onun sözlərinə görə, Nikol Paşinyan hələ də “inqilab şinelini çıxarmayıb” və özünü baş nazir kimi aparmır: “Ermənistanda ötən ilin aprelində şantaj və təhdid yolu ilə dövlət çevrilişi baş verib. Artıq bir ildir fəaliyyət göstərən yeni hökumətin başçısı isə adekvat davranış nümayiş etdirmir. İndi ölkədə hökumət deyil, Nikol Paşinyanın rəhbərlik etdiyi inqilab komitəsi mövcuddur”. Şarmazanovun sözlərinə görə, həqiqi hökumət başçısı əvvəlki hakimiyyətin nailiyyətlərindən istifadə edərək Ermənistanda quruculuq işləri aparmalı idi. Lakin yeni hökumət əldə olunmuş uğurların məhv edilməsi yolunu tutub.
Nahid SALAYEV
