Ermənistan Xarici İşlər Nazirliyi Azərbaycan Milli Məclisinin spikeri Oqtay Əsədovun ölkəmizlə Avropa İttifaqı arasında imzalanması nəzərdə tutulan sazişlə bağlı səsləndirdiyi fikirlərə münasibət açıqlayıb.
Xüsusilə də spikerin məlum sazişdə Azərbaycanın ərazi bütövlüyü ilə bağlı müddəanın olmasını bildirməsi Ermənistan diplomatiyasını bu məsələyə şərh verməyə vadar edib. Əslində isə Ermənistan diplomatiyasının bu vurnuxmasının kökündə Avropa Birliyini şantaj etmək məqsədləri dayanır. Bunu qurum adından açıqlama verən Anna Naqdalyanın fikirlərindən sezmək mümkündür. Naqdalyan bəyan edir ki, bu məsələdə Avropa Birliyinin mövqeyi bəllidir və Ermənistanla imzalanan “çərçivə sazişi”ndə öz əksini tapıb: “Həmin sənəddə Dağlıq Qarabağ probleminin nizama salınması səyləri arasında xalqların öz müqəddəratını təyin etmə hüququ xüsusilə vurğulanır. Bu mövqe dəfələrlə ən yüksək çinli Avropa rəhbərlərinin fikirlərində də qeyd edilib”.
Çox maraqlıdır ki, Naqdalyan sonra açıq şantaj tonuna keçərək bildirir ki, Ermənistan bu məsələdə heç bir ikili standartlı yanaşmanı qəbul etmir. Burdan açıq görünür ki, bütün bu səylər Avropanı Azərbaycanla imzalanacaq sazişə ərazi bütövlüyü müddəasını salmamağa vadar etməyə hesablanıb. Hətta Ermənistan XİN-i dolayısı ilə nəzərə çatdırır ki, sənəddə Azərbaycanın ərazi bütövlüyü məsələsinə vurğu olarsa, Aİ-nin mövqeyi ikili standart kimi yozulacaq.
Ermənistanın bu şantajları Avropa İttifaqının Azərbaycanla bağlı mövqeyini dəyişməyə qadirdirmi?
Elşən Mustafayev: “Azərbaycanın sərhəd toxunulmazlığı və ərazi bütövlüyü prinsiplərinin bir daha vurğulanması Avropa İttifaqının strateji prinsiplərinə cavab verir”
Azərbaycan Milli İstiqlal Partiyasının funksioneri Elşən Mustafayev “Bakı-Xəbər”ə bildirdi ki, sözügedən sazişlə bağlı əsas məsələlər həll edilib: “Azərbaycan rəsmisi Elmar Məmədyarov da dedi ki, cəmi 10 faiz məsələ ətrafında müzakirələr gedir. Bununla o qənaətə gəlmək olar ki, hazırda ikitərəfli saziş üzrə danışıqların yekun, həlledici mərhələsinə qədəm qoyulub. Rəsmi açıqlanmasa da, məlumdur ki, sazişdə Avropa İttifaqının və Azərbaycanın maraqlarını əks etdirən müddəalar çoxdur.
Rəsmi Bakı sazişdə Azərbaycanın ərazi bütövlüyünün və sərhəd toxunulmazlığının mütləq şəkildə əks olunmasını istəyir. Avropa İttifaqı da indiyədək qəbul etdiyi sənədlərdə, verdiyi açıqlamalarda, imzaladığı bütün sazişlərdə bu şərtlərə şəksiz əməl edib”.
Partiya funksionerinin sözlərinə görə, məqsəd sazişdə qarşılıqlı anlaşmanın şübhə doğurmadığı bu məqamın əks olunmasıdır: "Avropa İttifaqı Dağlıq Qarabağ münaqişəsinin Azərbaycanın ərazi bütövlüyü və sərhəd toxunulmazlığı prinsipləri əsasında nizamlanmasının tərəfdarıdır".
Elşən Mustafeyev deyir ki, Avropa İttifaqı bu məqamı çoxdan qəbul edib və rəsmi Bakını dəstəkləyir: “Sazişdə həmin müddəanın əks olunmasına etiraz edəcək yeganə ölkə Ermənistandır. Rəsmi İrəvanın bəhs etdiyimiz müddəaya qarşı çıxır, yenə də absurd "millətin öz müqəddəratını təyin etmə hüququ" tezisi ilə çıxış edərək, Dağlıq Qarabağdakı separatçı rejimin, daha doğrusu, terrorçu xuntanın "müstəqilliyinin tanınması"nı istəyir. Bunu biz əvvəlcədən bilirdik. Düşünmürəm ki, Ermənistanın belə aqressiv və irrasional mövqeyi, xüsusilə də isterik tələbləri Avropa İttifaqına təsir etsin, Brüsseli öz taktikasından çəkindirə biləcək gücə malik olsun. Bundan başqa, Azərbaycanın sərhəd toxunulmazlığı və ərazi bütövlüyü prinsiplərinin bir daha vurğulanması Avropa İttifaqının strateji prinsiplərinə cavab verir.
Avropada hazırda bir neçə ölkədə separatizmin alovlandığını, rəsmi Brüsselin analoji sazişlərdə Gürcüstan və Ukraynanın ərazi bütövlüyünü tanıdığını xatırlasaq, prosedur çətin olmayacaq”.
Məhəmmədəli QƏRİBLİ
