24/07/2019 05:11
728 x 90

Ermənilərin Paşinyanın bir ilinə baxışı – “Sarkisyan getdi, Paşinyan gəldi, problemlər qaldı...”

“Əvvəl ölkədə mövcud olan problemlər, demək olar, yerindən tərpənməyib”

img

Ermənistanda “məxməri inqilab”ın 1 ili tamam oldu. Düz bir il əvvəl, aprelin 23-də Ermənistanın baş naziri Serj Sarkisyan xalq etirazları nəticəsində vəzifəsindən istefa verib. Onun yerinə Ermənistan “məxməri inqilabı”nın lideri Nikol Paşinyan baş nazir vəzifəsinə gətirilib.

Ermənistanda 2018-ci il dekabrın 9-da keçirilən növbədənkənar parlament seçkilərində Nikol Paşinyanın rəhbərlik etdiyi “Mənim addımım” bloku qələbə qazanıb. S.Sarkisyanın rəhbərlik etdiyi sabiq hakim Ermənistan Respublikaçı Partiyası isə, ümumiyyətlə, yeni parlamentdə təmsil olunmayıb.

Ötən bir ildə Ermənistanda hansı dəyişikliklərin baş verdiyi barədə erməni cəmiyyətində müzakirələr gedir. Sosial şəbəkələrdə, müxtəlif internet resurslarında bununla bağlı müzakirələrdə yaranan rəy ondan ibarətdir ki, hakimiyyət dəyişsə də, ölkənin üzləşdiyi sosial-iqtisadi problemlər dəyişməyib. Konkret belə yazılar və deyilir: “Sarkisyan getdi, Paşinyan gəldi, problemlər yerində qaldı”. Yəni bu sahədə mövcud problemlər necə var, elə də qalıb. Faktiki olaraq, sözügedən problemlər həll edilməyib. Ölkədə iqtisadi inkişaf dinamikası yoxdur. Əhalinin miqriyasıyası bir il əvvəl də var idi, bu gün də var. Paşinyana qədər də ölkədə doğumun səviyyəsi aşağı idi, ondan sonra da demoqrafik sahədə eyni vəziyyət hökm sürür. Əhali sürətlə yaşlaşır. Korrupsiya əsas problem olaraq qalmaqdadır. Ölkə hakimiyyət tərəfindən vəd edilən xarici sərmayələri gözləyə-gözləyə qaldı. Bunsuz isə erməni iqtisadiyyatında köklü şəkildə islahatlar etmək, onu irəli aparmaq mümkün deyil. Dövlət büdcəsinin optimallaşdırılmasına və xərclərin azaldılmasına yönəlmiş islahatlar nəticəsində minlərlə yeni işsiz ordusu yaranıb. Dövlət borcu artmaqda davam edir. Artıq erməni cəmiyyətində belə bir rəy yaranıb ki, Paşinyan korrupsiyanın, miqrasiyanın qarşısının alınması, yoxsulluğun, işsizliyin aradan qaldırılması üçün sehirli çubuq tapmalıdır. Bir növ, Paşinyanın fəaliyyətinə bu cür kinayə və ikrahla yanaşırlar.

Göründüyü kimi, Ermənistanda hakimiyyətlər dəyişilsə də, ümumi heç bir müsbət nəticə əldə olunmayıb. Ölkə əvvəlki problemləri ilə baş-başa qalıb. Bütün bunlarla yanaşı, Paşinyanın 1 illik hakimiyyəti ilə bağlı yaranan bədbin rəy nə ilə bağlıdır?

  • Ramil Hüseynov: “Bu səbəbdən Ermənistan cəmiyyətində Paşinyanla bağlı yaranan bədbin rəy hər keçən gün daha da böyüyür”

Məsələyə münasibət bildirən VİP-in sədr müavini Ramil Hüseynov bunu bir sıra faktorlarla əlaqələndirdi: “Problem ondadır ki, 1 il əvvəl Ermənistanda 20 il hakimiyyətdə olan bir klan devrilsə də, bütövlükdə, bu, ölkənin iqtisadi-sosial həyatında müsbətə doğru nəsə dəyişməyib. Erməni cəmiyyəti də bütün bunların fərqindədir. Küçə dalğasında hakimiyyətə gələn Paşinyan ilk əvvəl inanılmaz vədlər verirdi. O müəyyən mənada yeni fiqur olduğuna görə bir çoxlarının ondan gözləntiləri böyük idi. Bəziləri hesab edirdilər ki, Saakaşvilinin Gürcüstan üçün gördüyü işləri Paşinyan Ermənistan üçün edəcək. Ancaq çox keçmədi ki, Paşinyanın dövlət idarəçiliyində təcrübəsizliyi üzə çıxdı. Paşinyan əvvəl tərəfdarlarını inandırmışdı ki, Qərbdən böyük həcmdə maliyyə vəsaiti cəlb edəcək. Bununla bağlı bir sıra Avropa ölkələrinə səfərlər etdi, müxtəlif beynəlxalq tədbirlər çərçivəsində iri biznes dairələri ilə görüşlər keçirdi. Ancaq heç bir tərəf əlverişsiz mövqedə olan Ermənistana istədikəri vəsaiti vermədi. O ölkədə islahatlar hansısa müsbət effekt verir ki, həmin ölkənin maliyyə ehtiyatları var. Ermənistanda bu olmadığı üçün, Paşinyanın bəzi islahatları ciddi sosial narazılıqlara səbəb oldu. Bu gün Ermənistanda nə xarici sərmayə, nə də digər iqtisadi faktorlar özünü göstərir. Bu səbəbdən əvvəl mövcud olan problemlər, demək olar, yerindən tərpənməyib. Ona görə də Ermənistan cəmiyyətində Paşinyanla bağlı yaranan bədbin rəy hər keçən gün daha da böyüyür”.

Cəmilə QARAYEVA

Son xəbərlər