20/05/2019 15:13
728 x 90

İlk iki Formulaya qoyulan 100 milyon 277 milyon dollar qazanc gətirdi – radikallar nəyi və niyə hədəfləyir...

“Azərbaycanın uğurlu inkişafı üçün atılan addımların hamısını onlar qara rəngdə görməyə çalışırlar”

img

Azərbaycan Prezidentinin köməkçisi Əli Həsənov “Azərbaycanın “Formula-1” yüksəkliyi, milli qürur hissi və Əli Kərimli kimilərin mədə təfəkkürü” adlı məqalə ilə çıxış edib.

Məqalədə radikal müxalifətin bir neçə gündən sonra Bakıda start götürəcək “Formula-1” yarışları ilə bağlı səsləndirdiyi tənqidlərə sərrast cavab verilib: “...Axı onlar iqtidarı nəyə görə tənqid edirlər? Məsələn, AXCP sədri Əli Kərimli öz “Facebook” səhifəsində iddia edir ki, bu günlərdə Bakıda növbəti dəfə start götürəcək “Formula-1” yarışları “zülmdür”, kimlərinsə pul qazanması, hakimiyyətin təbliği üçün vasitədir. Sən demə, dünyada idman yarışları sırasında populyarlığına görə üçüncü sırada yerləşən “Formula-1” səbəbindən avtomobillərin şəhərin mərkəzində hərəkətinin məhdudlaşdırılması insanların “əsəbini tarıma çəkir”.

Əli Həsənov “Formula-1”in iqtisadi səmərəsizliyi ilə bağlı səslənən fikirlərin də konkret dəlillərlə əsassız olmasını sübut edib: “2016-cı ildə ilk “Formula-1”in şərtləri açıqlananda müxalifət bu yarışmanın təşkilinə 50 milyon dollar sərf olunacağını ciddi tənqid etdi. Dərhal riyazi hesablamalar aparıldı: bu pula neçə qaçqının güzəranını yaxşılaşdırmaq, neçə müəllimin maaşını artırmaq, neçə aztəminatlı ailəyə əlavə yardım vermək olar və s. Təbii ki, istənilən siyasi qüvvə, siyasətçi xalqın güzəranı, ayrı-ayrı təbəqələrin ehtiyaclarının daha yaxşı ödənilməsinin yollarını axtarmalı və bu məsələdə öz mövqeyini bildirməlidir. Lakin öz siyasi maraqlarına uyğun yox, obyektiv, qərəzsiz, olduğu kimi. “PricewaterhouseCoopers” (Pwc) beynəlxalq audit şirkətinin 2017-ci ilin sonlarında apardığı müstəqil araşdırmanın nəticələrinə görə, Bakıda keçirilmiş ilk iki “Formula-1” yarışı ölkə iqtisadiyyatına, ümumilikdə, 277.3 milyon dollar gəlir gətirib. Yəni yarışların iki ilinə yatırılan 100 milyon dollar iki dəfədən çox qazanc verib. O da bəllidir ki, əsas xərcləri - müvafıq avadanlıqlar alınması, bu və ya digər infrastruktur qurğuların quraşdırılması yarışın ilk ili həyata keçirilir, sonrakı illər xərclər get-gedə azalır. Demək, bu və növbəti illərdə qalan qazanc daha da çox olacaq”.

Hörmətli Əli Həsənov tərəfindən təqdim olunan faktlardan görünür ki, ölkəmizin evsahibliyi etdiyi idman yarışı təkcə maliyyə cəhətdən iki dəfədən çox qazanc gətirib. Belə olan təqdirdə radikal müxalif qüvvələr hansı məntiqlə bu yarışların ölkəmizə heç bir faydasının olmamasından danışırlar?

  • Aydın Mirzəzadə: “Yarışların xeyrini görməmək ancaq qərəzdən irəli gələ bilər”

Millət vəkili Aydın Mirzəzadə “Bakı-Xəbər”ə açıqlamasında bildirdi ki, bu, radikal müxalifətin ənənəvi taktikasından irəli gəlir: “Onlar hesab edirlər ki, Azərbaycanda vəziyyət nə qədər acınacaqlı olarsa, onlar üçün hakimiyyətə gəlmək şansı bir o qədər çox olar. Onların bütün hədəfi hansı yolla olursa-olsun hakimiyyətə gəlməyə hesablanıb. Təbii ki, belə qüvvələrin hakimiyyətə gəlməyi o deməkdir ki, onlara maliyyə dəstəyi verən xaricdəki anti-Azərbaycan qüvvələrinin sifarişlərini yerinə yetirməlidirlər. Azərbaycanın uğurlu inkişafı, uğurlu sosial layihələrinin inkişafı üçün atılan addımların hamısını onlar qara rəngdə görməyə çalışırlar. “Formula-1” yarışlarını keçirmək üçün onlarla ölkə çalışır. İllərdir bu cəhdləri səmərə vermir. Azərbaycandakı infrastruktur hazırlığı və bu sahədə təcrübəsinin olması bizə bu yarışları keçirməyə imkan verir. Bunun ölkəmizin təbliği ilə yanaşı, büdcəmizə də xeyri var. On minlərlə turist gəlib burada dincəlir, valyuta xərcləyir. Bunun nəticəsində otel, xidmət biznesi yaxşı qazanc əldə edir. Bu, iqtisadiyyatımıza böyük investisiyadır. Qeyri-neft sektorunun inkişafıdır. Artıq dəfələrlə verilən hesabatlarda göstərilir ki, hər il o yarışlar Azərbaycana böyük gəlirlər gətirir. Ola bilər ki, birinci il infrastrukturun yaradılması üçün müəyyən xərc çəkildi. Amma sonrakı illərdə mənfəət götürüldü. Bu baxımdan da yarışların xeyrini görməmək ancaq qərəzdən irəli gələ bilər”.

  • Rəfael Becanov: “Avroviziya”, Avropa Oyunları zamanı da xüsusi təşkil edilmiş qaralama kampaniyalarının şahidi olduq”

Razi Nurullayevin rəhbərlik etdiyi müxalifyönümlü AXCP-nin funksioneri Rəfael Becanov “Bakı-Xəbər”ə açıqlamasında bildirdi ki, ölkəmizdə keçirilən bu cür mötəbər beynəlxalq tədbirlərin qərəzli şəkildə qaralanması yolverilməzdir: “Hörmətli Əli Həsənovun  təqdim etdiyi hesablamalardan görünür ki, həmin auditi nüfuzlu beynəlxalq qurumlar aparıb. Yəni daxili hesablama deyil ki, şübhə üçün yer olsun. Çoxumuz məlumatlıyıq ki, bu tip yarışlar ölkəmizə müxtəlif istiqamətlərdən dividendlər gətirmiş olur. Bu, eyni zamanda, ölkənin beynəlxalq imicinin möhkəmlənməsinə xidmət edən aksiyalardan biridir. Biz analoi addımlarla çox rastlaşmışıq. Əsasən də ölkəmizin evsahibliyi etdiyi yarışlar ərəfəsində. “Avroviziya”, Avropa Oyunları zamanı da xüsusi təşkil edilmiş qaralama kampaniyalarının şahidi olduq. Amma əminliklə deyə bilərəm ki, bu, bütünlükdə, ölkənin müxalif kəsiminin düşüncəsi deyil. Müxalifət adını inhisara almaq istəyən həmin radikal qrup nə varsa, hamısını qara rəngə boyamağı özlərinə təlqin ediblər. Məhz bu təlqinin nəticəsidir ki, onların dedikləri cəmiyyət və müxalifətin bütün spektri tərəfindən qəbul edilmir. Həmin dar qrup istər sosial şəbəkələrdə, istərsə də bəzi media orqanlarında Azərbaycanın uğurları ilə bağlı nə qədər antitəbliğat aparsalar da, heç bir nəticəyə nail ola bilməyəcəklər”.

Məhəmmədəli QƏRİBLİ

Son xəbərlər