“Qarabağ məsələsini erməni xalqı həll etməlidir. Hər hansı bir hökumət və ya baş nazir yox”. Məlum olduğu kimi, bu sözləri Ermənistanın baş naziri Nikol Paşinyan İrəvan Dövlət Universitetinin tələbələri ilə görüşü zamanı deyib.
O bildirib ki, erməni xalqı nə vaxt ki, Qarabağ münaqişəsinin həlli yolunu dəqiq tapsa, o zaman digər formullar asanlıqla yerinə yetiriləcək: “Ən qəribəsi isə budur ki, bizim bu barədə ictimai müzakirəmiz olmayıb. Mən baş nazir olanda bəziləri müsahibə verib deyirdi ki, kimsə satqınlıq edib, yaxud edəcək. Ancaq heç kim soruşmurdu ki, mən danışıqlara gedəndə bu söhbətlər niyə edilirdi? Çünki siz hamınız məni Qarabağ məsələsinə görə danışıqlara göndərəndə demədiniz ki, bu problemi bu cür həll edəcəksən. Bu gün erməni xalqı baş nazirinə demədi ki, al, bu sənin kağızın, onu əzbərlə, danışıqlara gir və məsələni bu yolla həll elə. Bu səbəbdən müxtəlif söz-söhbətlər gəzir”.
Paşinyan bildirib ki, onun, əlbəttə, Qarabağ münaqişəsinin həlli ilə bağlı öz görüşləri var, ancaq bu məsələdə erməni xalqının rəyi də vacibdir: “Çünki bu məsələni o həll etməlidir, baş nazir və ya hökumət yox”.
Paşinyan birinci dəfə deyil ki, bu cür açıqlamalar verir. Bundan əvvəl də o, Qarabağ münaqişəsinin həlli ilə bağlı müxtəlif məzmunlu açıqlamalar verib. Bir ara deyirdi ki, onun Dağlıq Qarabağdakı ermənilər adından danışmaq səlahiyyəti yoxdur. Bu səbəbdən, separatçı qurumun danışıqlarda tərəf olması ilə bağlı məntiqsiz fikirlər səsləndirdi. Buna nail ola bilmədi. Çünki onun bu istəyini nə Azərbaycan, nə də beynəlxalq qurumlar qəbul etmədilər. Görünən odur ki, Paşinyan nəticəsiz danışıqlar prosesini uzatmaq üçün müxtəlif uydurmalarla çıxış etməkdə qərarlıdir. Bu baxımdan, Paşinyan “Qarabağ məsələsini mən deyil, erməni xalqı həll etməlidir” söyləməklə nə demək istəyir?
Fikrət Sadıqov: “Düşünürəm ki, Paşinyanın belə açıqlamaları danışıqları uzatmaq məqsədi daşıyır”
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, bu, Paşinyanın növbəti populist açıqlamasıdır: “Eyni zamanda, demaqogiya xarakterli bir yanaşmadır. Dağlıq Qarabağ münaqişəsini xalq həll edirsə, o zaman baş nazir nəyə gərəkdir? Onda Paşinyan öz vəzifəsindən istefa versin və xalq münaqişəni həll etsin. Yəni səsvermə yolu ilə bu məsələyə aydınlıq gətirsin. Əmin deyiləm ki, erməni xalqının əksəriyyəti yoxsul vəziyyətdə yaşamaq istəyir. Münaqişənin həll edilməməsi Ermənistanın iqtisadi inkişafını ləngidir. Ona görə də Paşinyanın səsləndirdiyi fikir baş nazirə yaraşmayan bir hərəkətdir. Seçki yolu ilə seçilən dövlət başçısı məsuliyyətdən qaçmamalıdır. Danışıqlarda konkret mövqeyini bildir və bunun əsasında müzakirələr getsin. İlk növbədə başqa dövlətin ərazilərini işğaldan azad et. Yoxsa demaqogiya ilə məşğul olmaq lazım deyil. Bu cür populist açıqlamalar danışıqlarda müsbət nəticə əldə etməyə imkan vermir. Düşünürəm ki, Paşinyanın belə açıqlamaları danışıqları uzatmaq məqsədi daşıyır. Çünki onun münaqişənin həlli ilə bağlı qəti prinsipial mövqeyi yoxdur. O gah nala vurur, gah da mıxa. Paşinyan küçə dalğasında baş nazir olan bir şəxsdir. Görünür, belə populist açıqlamalarla ya Dağlıq Qarabağ münaqişəsini dondurmaq istəyir, ya da danışıqlar prosesini mürəkkəbləşdirmək istəyir. Ancaq bütün bunlar alınmayacaq. Çünki o, ilk növbədə, məsuliyyət daşıyan bir şəxsdir və tələb ona qarşı olacaq. Məsələ ondadır ki, erməni xalqı ondan müəyyən addımların atılmasını gözləyir. Ermənistan elə bir vəziyyətdədir ki, Dağlıq Qarabağ münaqişəsinin həll edilməməsi bu ölkə üçün yaxşı perspektiv vəd etmir”.
Aydın Quliyev: “Paşinyan bilir ki, irəli yol yoxdur, geriyə mümkün yolların hamısı daha ağır məğlubiyyətdir”
Qarabağ həlli ilə bağlı Paşinyanın hər hansı məsuliyyətin altına girmək istəmədiyi ortadadır. Qəzetimizin baş redaktoru Aydın Quliyev bu versiyaya daha çox üstünlük verir: “Paşinyan yaxşı başa düşür ki, Qarabağ məsələsində bütün yollar dalana çatıb. İrəli yol yoxdur, geriyə mümkün olan yolların hamısı ağır məğlubiyyətdir. Odur ki, Paşinyan dayandığı hazırkı nöqtədən geri çəkilmədən Qarabağ probleminin həllinin Ermənistan üçün ən az məğlubiyyətli variant sayır. Bunu isə erməni xalqının əli və dili ilə etmək istəyir. Bu məntiqlə ki, siz dediniz, mən də siz deyəni etdim. Baş nazir uduşsuz həll variantlarının məsuliyyətini öz üzərindən erməni xalqının üzərinə atmaq istəyir”.
Vidadi ORDAHALLI
