Ukraynada seçkilərin nəticəsi artıq tam bəllidir. Hazırda prezident səlahiyyətlərini icra edən Poroşenko böyük fərqlə rəqibi Zelenskiyə uduzub. Komediya aktyoru olan Zelenski qələbəsini ikinci tur seçkilərində rəsmiləşdirə bildi.
Maraqlıdır ki, Ukraynadakı seçkilərin gedişi zamanı həmin ölkədə olan bir çox diaspor fəalımızın Zelenskiyə rəğbətinin olduğunu müəyyən etdik. Ən azı, onların sosial şəbəkələrdəki mövqelərindən bunu aydın sezmək mümkün idi. Diaspor fəallarımızın seçkilərdə hansı mövqedə olduqlarını daha dəqiq müəyyənləşdirmək və Zelenskiyə rəğbətin niyə artıq olduğunu dəqiqləşdirmək üçün bu yöndə araşdırma aparmaq qərarına gəldik. Qeyd edək ki, Azərbaycanın özündəki Ukrayna vətəndaşları da seçkilərdə daha çox Zelenskiyə səs veriblər. Seçki komitəsinin sədri İlqar Həsənov bülletenlərin 100%-nin hesablanması nəticəsində seçicilərin 51,50%-nin səsini Vladimir Zelenskiyə verdiyini deyib. Ukraynanın Azərbaycandakı səfirliyində açılmış seçki məntəqəsində səsverməyə, ümumilikdə, 233 nəfər qatılıb.
Xatırladaq ki, seçkilərin ilk turunda Azərbaycanda yaşayan Ukrayna vətəndaşları Petro Poroşenkoya daha çox səs vermişdilər.
Eldar Tağıyev: “Çünki diasporumuzun bir qolu Saakaşvili tərəfdarı idi”
30 ildən artıqdır Ukraynada Azərbaycan diasporunu təmsil edən və fəal üzvlərdən olan Eldar Tağıyev “Bakı-Xəbər”ə açıqlamasında bildirdi ki, hazırda Ukraynada yaşayan azərbaycanlıların böyük əksəriyyəti, fəaliyyətdə olan diaspor təşkilatlarımız bir araya gələrək "Ukrayna Azərbaycanlıları Şurası" adı altında birləşib fəaliyyət göstərirlər. Mənim özüm də həmin qurumda təmsil olunuram. Bilirsiniz ki, bizim diaspor nümayəndələrimizin böyük əksəriyyəti Ukrayna vətəndaşıdır. Bu da onlara imkan verir ki, müxtəlif partiyalara üzv olsunlar, eyni zamanda, seçkilərdə iştirak edib, istədikləri namizədə səslərini versinlər. Əslində, bu fəallıq bizi də çox sevindirir. Mən deməzdim ki, bu seçkilərdə azərbaycanlılar ucdantutma Zelenskiyə səs verdilər. Amma bu nisbətdə üstünlüyün Zelenskinin tərəfində olduğunu deyə bilərəm. Bunun da səbəbləri çoxdur. Çünki diasporumuzun bir qolu Saakaşvili tərəfdarı idi. Zelenskiyə olan məhəbbət oradan qaynaqlanır. Saakaşvilinin partiyası, birmənalı olaraq, Zelenskini dəstəklədiyi üçün, bizim soydaşlarımız arasında da bu seçim üstünlük təşkil etdi”.
Eldar Tağıyevin sözlərinə görə, Zelenskinin qələbəsini şərtləndirən faktorlar heç də bizim diasporun verdiyi səslə bağlı deyil: “Rusiya ilə iqtisadi əlaqələrin kəsilməsindən əziyyət çəkən əhalinin mövcud hakimiyyətə qarşı qəzəbindən məharətlə istifadə edildi. Mən Ukraynanın Rusiya ilə yaxınlaşmasını istəmirəm. Səbəbləri aydındır. Amma proseslərə demokratiyanın qələbəsi kimi baxanları düşünməyə dəvət edirəm. Yadınızdadırmı, sovetlərin dağıldığı ilk illərdə bütün seçkilərdə kommunistlər qalib gəlmək şansını saxlayırdılar. Onları hansı yollarla (Rusiyada Jirinovski kimi təlxəklər belə peyda oldu!) zəiflədib heçə çıxardılar? Bu gün Rusiyaya qarşı barışmaz kimi görünən prezidentin belə bir komiklə əvəz edilməsi əhali üçün düşünülmüş yeni oyundur, hələlik bütün narazı qüvvələri qane edən. Hədəf Ukrayna və Rusiyanın yollarının kəsişməsi ehtimalını yox etməkdir, demokratiya pərdəsi altında”.
Paşa İlisuyski: “O, gücünü öz xalqının dəstəyindən aldı və 90-cı illərin oğru oliqarxlarını yaxınına buraxmadı”
Nisbətən gənc nəslin nümayəndəsi olan diaspor nümayəndələrimiz isə Zelenskiyə dəstək verirlər. Tanınmış diaspor nümayəndəsi Paşa İlisuyskinin sözlərinə görə, bu dəstəyi Zelenskiyə yalnız onlar verməyib: “Ukrayna parlamenti, hökuməti, ordusu və bütün siyasi partiyaları ağız dolusu Zelenskiyə dəstəyini bildirir. Bundan əlavə, Avropa liderləri, ABŞ, Kanada, beynəlxalq təşkilatlar, MDB ölkələri və hətta Ukraynaya düşməncə yanaşan Putin və Medvedyev belə öz rəğbətlərini dilə qətirirlər. Bilirsiniz niyə hamı birdən-birə Zelenskiyə bu qədər önəm verir? Ona görə ki, o, demokratik şəkildə öz xalqının dəstəyini qazandı! O, gücünü öz xalqının dəstəyindən aldı və 90-cı illərin oğru oliqarxlarını yaxınına buraxmadı”.
Hikmət Cavadov: “Mən bu günü çoxdan gözləyirdim”
Digər diaspor fəalı Hikmət Cavadovun da Zelenskini dəstəklədiyi məlumdur. Onunla əlaqə saxlasaq da, danışmaq imkanının olmadığını bildirdi. Ancaq sözügedən diaspor fəalı Zelenskinin qələbəsinə münasibətini açıq formada ifadə edib. O, sosial şəbəkədəki hesabında qalib gələn namizədin fotosunu paylaşaraq “Mən bu günü çoxdan gözləyirdim” sözlərini yazıb.
Adının çəkilməsini istəməyən bir diaspor nümayəndəmiz bizə bildirdi ki, Ukraynadakı azərbaycanlıların Zelenskiyə böyük rəğbət bəsləməsinin kökündə duran faktorlardan biri də Poroşenkonun yanlış kadr siyasətidir. Ən başlıcası isə, Ukraynanın erməni əsilli daxili işlər naziri Avakovun azərbaycanlılara bəslədiyi qərəzli münasibətdir: “Araşdırsanız görərsiniz ki, bir çox diaspor fəalımıza müəyyən adamların sifarişi ilə məhz Avakovun təhriki ilə cinayət işləri qaldırılıb. Bu səbəbdən də Ukrayna azərbaycanlılarının böyük əksəriyyəti bu qərəzdən yaxa qurtarmaq üçün Poroşenkoya yox, Zelenskiyə səs verdi”.
Məhəmmədəli QƏRİBLİ
