24/07/2019 05:11
728 x 90

Mühüm ərəfələr – bəzi beynəlxalq qurumlar, antimilli qruplar və erməni lobbisi Azərbaycanın üstünə yeriyir...

“Azərbaycanda aparılan bütün islahatların mahiyyətində bilavasitə şəffaflığın təmin edilməsi dayanır”

img

Adətən Azərbaycanda mühüm tədbirlər keçirilən ərəfədə bəzi anti-Azərbaycan mövqeli təşkilatlar, xaricdə yaşayan antimilli təfəkkürə malik ünsürlər və ermənilər fəallaşmağa başlayırlar. Bütün resursları səfərbər edib antitəbliğat aparırlar. Belə ki, “mühacir” pərdəsi altında gizlənib çirkin kampaniya aparırlar. Bəzi təşkilatlar Azərbaycan barəsində qarayaxma xarakterli hesabatlarını dərc edirlər. Bir növ, keçiriləcək tədbirlərdən sui-istifadə edərək Azərbaycanı gözdən salmağa çalışırlar.

Bu il də öz “ənənələrinə” sadiq qalaraq bəzi beynəlxalq təşkilatlar bu yöndə fəaliyyətlərini artırırlar. Bu sıraya “Amnesty International”, “Human Rights Watch”, “Free Press”, “Sərhədsiz reportyorlar” (RSF) təşkilatları və digərləri daxildir. Bu qurumlar daim anti-Azərbaycan mövqeli hesabatları ilə gündəmdə olublar.

Məlum olduğu kimi, bu il də Azərbaycan bir sıra önəmli beynəlxalq tədbirlərə evsahibliyi edəcək. Bir neçə gündən sonar Formula-1 yarışı başlayacaq. Həmçinin, iyun ayında Bakıda Qoşulmama Hərəkatının XVIII zirvə toplantısı keçiriləcək. Tədbirdə Qoşulmama Hərəkatına üzv ölkələrin dövlət və hökumət başçıları iştirak edəcəklər.

Qeyd edək ki, Azərbaycan adıçəkilən hərəkata 2011-ci ildə Balidə keçirilmiş XVI Nazirlər Konfransında qoşulub.

2019-2022-ci illər ərzində isə Azərbaycan Respublikası Qoşulmama Hərəkatına sədrlik edəcək. Bununla yanaşı, Azərbaycan Avropa Gənclər Olimpiya Festivalına evsahibliyi edəcək.

Ən başlıcası, bu il Azərbaycanla Avropa İttifaqı arasında saziş imzalanacağı gözlənir. Hansı ki, sözügedən saziş Azərbaycan üçün çox mühüm əhəmiyyətə malikdir. Belə bir ərəfədə bəzi beynəlxalq insan haqları təşkilatlarının, xaricdə “mühacir” adıyla yaşayan antimilli ünsürlərin və ermənilərin Azərbaycana qarşı fəaliyyəti nə dərəcədə bir-birilə əlaqəli ola bilər? Ekspertlər ümumən bunu necə dəyərləndirirlər?

  • Elçin Mirzəbəyli: “Sözügedən qüvvələrin mühüm tədbirlər ərəfəsində fəallaşması...”

Məsələyə münasibət bildirən politoloq Elçin Mirzəbəylinin sözlərinə görə, sözügedən qüvvələrin mühüm tədbirlər ərəfəsində Azərbaycana qarşı fəallaşması, bir növ, ənənə halını alıb: “Bu dəfə də bənzər tendensiya müşahidə olunur. Azərbaycanda çox ciddi islahatlar həyata keçirilir. Bu siyasətin nəticəsi olaraq vətəndaş məmnunluğu təmin edilir. Belə olan təqdirdə həyata keçirilən təxribat kampaniyalarının hədəfində Azərbaycan dövlətinin imici və ölkə vətəndaşları dayanıb. İstəyirlər ki, aparılan islahatları vətəndaşların gözündən salsınlar. Ölkənin beynəlxalq imicinə zərər vursunlar. Ona görə də sözügedən qüvvələr eyni vaxtda aktivləşiblər. Aparılan qaralama kampaniyası təkcə hakimiyyətə qarşı deyil, həm də Azərbaycana qarşı yönəlib. Digər bir amil də ondan ibarətdir ki, mütəmadi olaraq insan haqları adından danışan sözügedən təşkilatlar nəinki Azərbaycana qarşı, həmçinin, digər ölkələrə qarşı da belə çirkin kampaniya aparırlar. Müəyyən qərəzli hesabatlar hazırlayırlar. Azərbaycanda aparılan bütün islahatların mahiyyətində bilavasitə şəffaflığın təmin edilməsi dayanır. Vergi, gömrük və digər sahələrdə aparılan islahatlar ölkədə şəffaflığın təmin edilməsinə gətirib çıxarır. İnsan hüquqları ilə bağlı böyük işlər görülüb. Cəzaların yüngülləşdirilməsindən tutmuş, məhkəmə-hüquq sistemi ilə bağlı Prezidentin qərarları inqilabi xarakterlidir. Prinsipcə, beynəlxalq təşkilatlar, o cümlədən, “Amnesty International”, “Human Rights Watch” bütün bunları təqdir etməlidirlər. Ancaq, göründüyü kimi, bu onların marağına xidmət etmir. Çünki insan haqları adından danışan təşkilatlar, antimilli qüvvələr və ermənipərəst dairələr Azərbaycanın daha da güclənməsini istəmirlər. Ona görə də aparılan birgə qaralama kampaniyasının kökündə Azərbaycanı zəiflətmək niyyəti dayanır. Hesab edirəm ki, onların bu yöndə fəaliyyəti fiaskoya uğrayacaq”.

Vidadi ORDAHALLI

Son xəbərlər