25/05/2019 13:48
728 x 90

Tunis-Fransa-Liviya xəttində gərginlik... Tripolidəki hökumətə qarşı qanlı üsyanın arxasından da Fransa çıxdı

img

Bir neçə gün əvvəl Liviyadan iki qrup şəkilində Tunisə keçməyə cəhd edən 24 Avropa vətəndaşı tutulub. Diplomatik pasport daşıyan bu səxslərdən 13-ü Fransa vətəndaşı olub.

Baki-xeber.com Türkiyə mediasına istinadən xəbər verir ki, Tunisin müdafiə naziri Abdulkadir Zübeydi, ilk qrupun Liviyadan gələn iki qayıqla Tunis sularına girdiyini, qayıqdakı 11 diplomatik pasport daşıyan Avropa vətəndaşının Cerbe adasına çıxdıqları zaman silahları ilə birlikdə saxlandıqlarını bildirib.

Zübeydi, bənzər şəkildə bazar günü yenə də üzərlərində diplomatik pasaport olan 13 Fransa vətəndaşının qurudan Tunisə girməyə çalışdığını deyib. "Diplomatik pasport daşıyan 13 Fransa vətəndaşı Ras əl-Cedir sərhəd keçid məntəqəsindən ölkəyə daxil olub. Pnların da üzərlərində silah-sursat olub. Müdafiə naziri onların əvvəl təslim olmaq istəmədiklərini, ancaq sonradan silahları yerə qoyub təslim olduqlarını deyib.

Tunis müdafiə nazirinin açıqlamasından sonra Tunis-Fransa-Liviya xəttində gərginlik yaranıb.

  • Səfirin mühafizəçiləri... Fransadan inandırıcı olmayan açıqlama...

Məsələ ilə bağlı Fransadan da açıqlama verilib. Əslində Fransadan Liviyadan Tunisə keçməyə cəhd edən silahlı vətəndaşları barədə izahı o qədər də inandırıcı görünmür və şübhələri biraz da artırır.

Paris rəhbərliyinin 13 vətəndaşının Liviyadakı Fransa səfirini qoruyan personal olduğunda israr etməsinə baxmayaraq, bölgə mətbuatı Fransa hərbi məsləhətçilərinin Garyan şəhərində Liviyanın şərqindəki üsyançı ordunun rəhbəri general Xəlifə Haftara kömək etdiyini yazır.

Mövzu ilə bağlı açıqlama verən Fransanın Tunisdəki səfiri Olivier Poivre d'Arvor da silahlı şəxslərin Liviyadakı Fransa səfirinin mühafizəçiləri olduğunu deyərək, Tunis hüquq-mühafizə orqanlarının bu şəxslərin üzərindən götürdüyü silah-sursatı Fransaya təslim edəcəyini bildirib.

Fransa vətəndaşlarının Fransanın Tripolidəki səfirini qorumaq üçün istifadə etdiyi avadanlıqları sərhədə gətirdiyini iddia edən Arvor, Fransanın Tunis səfirliyindən də bir personalın sərhəddə onları gözlədiyini bildirib. Səfir bununla bağlı Tunis Xarici İşlər Nazırliyi, Müdafiə Nazirliyi və Daxili İşlər Nazirliyinə də məlumat verildiyini deyib.

"Fransa, diplomatik qaydalara və Tunisin suverenliyinə uyğun şəkildə hərəkət edib. Fransa və Tunis, Liviya böhranının həllində birlikdə hərəkət edirlər. Bəzi media orqanları, yalan iddialarla əsası olmayan böhran yaratmağa çalışırlar" – Fransa səfiri deyib

Fransız səfirinin bəyanatı ilə bağlı hələlik Tunisdən heç bir açıqlama verilməyib. Ancaq bu məsələni ilk dəfə gündəmə gətirən Tunisin müdafiə naziri Zübeydi, Fransa rəhbərliyinin onları bununla bağlı məlumatlandırdığını dair heç nə deməmişdi.

  • Tripoli hökuməti Fransaya qarşı hərəkətə keçdi...

Bundan başqa, Tunisin müdafiə nazirinin silahlı Fransa vətəndaşları ilə bağlı açıqlamasından dərhal sonra Tripoli mərkəzli Liviya Milli Həmrəylik Hökuməti, üsyançı general Xəlifə Haftarı dəstəklədiyinə görə, Fransa ilə təhlükəsizlik və təhsil başda olmaqla ilə bir sıra razılaşmaları dayandırıb.

  • Üsyançı generalın arxasından da Fransa çıxdı

Tunisin bir xəbər saytı da Liviyadakı mənbələrə istinadən Fransanın hərbi məsləhətçilərinin, Xəlifə Haftarın Tripolinin ələ keçirmək üçün başlatdığı hərbi əməliyyatı dəstəklədiklərini yazıb. Qeyd edilir ki, Tripolidən 75 kilometr aralıda yerləşən Garyan şəhərində yerləşən Fransa hərbi məsləhətçiləri pilotsuz uçuş aparatları ilə kəşfiyyat apararaq, məlumatları Haftarın rəhbərlik etdiyi qüvvələrə ötürür.

Digər tərəfdən, Tunisdə yayımlanan “Şuruk” qəzeti isə diplomatik mənbələrə istinadən, Fransa vətəndaşlarının Tunis üzərindən Əlcəzirə keçəcəklərini iddia edib.

Qeyd edək ki, Liviyanın şərqindəki hərbi qüvvələrin lideri general Haftar paytaxt Tripolini ələ keçirmək üçün aprelin 4-də hücum göstərişi verib. Buna cavab olaraq Milli Həmrəylik Hökumətinə sadiq qüvvələr də “Burkan əl-Qadab” ad verilən əməliyyata başlayıb. Beynəlxalq Səhiyyə Təşkilatı Liviya Missiyasının açıqlamasına görə, tərəflər arasında qarşıdurmalarda indiyədək 213 nəfər həlak olub, 1009 nəfər isə yaralanıb.

Afrikanın ən böyük neft ehtiyatlarına malik olan Liviya, Müəmmar Qəddafinin devrilməsindən sonra (2011) beynəlxalq və regional qüvvələrin açıq və ya gizli dəstəyini alan siyasi qruplarla silahlı qruplar arasında toqquşmalara səhnə olur.

TAHİR

Son xəbərlər