“Kimlərinsə bu məsələdə təxribat xarakterli fikirlər söyləməsi, faktiki olaraq, Azərbaycanın maraqlarına qarşı olan bir haldır”
Məlum olduğu kimi, Azərbaycanla Avropa İttifaqı arasında yeni sazişin imzalanacağı gözlənir. İmzalanacaq saziş ölkəmiz üçün mühüm əhəmiyyət kəsb edəcək. Aİ Azərbaycanın əsas tərəfdaşlarından biri olsa da, tərəflər arasında münasibətlər hələ də 1996-cı ildə imzalanmış sazişlə təmzimlənir.
O vaxtdan bəri bir çox sahələrdə xeyli ciddi dəyişikliklər olub. O üzdən, sözügedən sənəd artıq köhnəlib və bir çox yeni reallığı əhatə etmir. Yeni sazişin nə qədər ciddi məsələ olması haqda təsəvvür yaratmaq üçün sadəcə deyək ki, onun hazırlanmasının sonuncu mərhələsinin üzərində 3 ildir intensiv iş gedirdi. Məlumata görə, sözügedən işlər artıq yekunlaşmaq üzrədir.
Ancaq bu arada diqqətçəkən məqam odur ki, Aİ ilə imzalanacaq sazişin vaxtı yaxınlaşdıca, ona qara yaxmağa çalışanlar da fəallaşırlar. Məqsədyönlü şəkildə xaricdə yaşayan bəzi “mühacirlər” bunun əleyhinə kampaniya aparırlar. Həmin “mühacirlər” xaricdə müxtəlif internet televiziyalarında və digər elektron mətbuat vasitələrində Azərbaycanın əleyhinə təbliğat kampaniyası aparırlar. Hər vasitə ilə belə bir sazişin imzalanmasının qarşısını almaq istəyirlər. İddia edirlər ki, guya Azərbaycanda insan hüquqları pozulur, demokratiya ilə bağlı ölkədə problemlər var və s.
Bu cür kampaniya aparanların içində keçmiş səfir Arif Məmmədov da var. O da, bəziləri kimi, bu qarayaxma kampaniyasına qoşulub. Görünən odur ki, bununla bağlı Azərbaycana yönəlik həqiqətə uyğun olmayan fikirlər səsləndirilir. Reallıq isə ondan ibarətdir ki, Azərbaycan Aİ ilə saziş imzalamağa layiq bir ölkədir. Çünki bununla bağlı tələb olunan parametrlərə cavab verir.
Belə fikirlər səslənir ki, Azərbaycanın Aİ ilə saziş imzalamasının əleyhinə təbliğat aparan “mühacirlər” özləri də bilmədən Rusiyanın təsir dairəsinə düşürlər. Çünki Rusiya, prinsipcə, postsovet ölkələrinin Avropaya inteqrasiyasını istəmir. Bunu öz maraqları üçün təhlükə hesab edir. Onu da qeyd edək ki, Aİ ilə saziş məsələsində Ermənistan mətbuatı da Azərbaycana qarşı qarayaxma kampaniyası aparır. Bir növ, bu yöndə aparılan anti-Azərbaycan kampaniyasının üst-üstə düşməsi təsadüfə oxşamır.
O baxımdan baş verənləri ekspertlər necə dəyərləndirirlər?
- Qabil Hüseynli: “Rusiyanın Azərbaycanla Aİ arasında imzalanacaq sazişin əleyhinə olması gün kimi aydındır”
Məsələyə münasibət bildirən politoloq Qabil Hüseynlinin sözlərinə görə, xaricdə yaşayanların bu yöndə tənqidləri əsassızdır: “Çünki bununla bağlı səslənən tənqidlər doğru deyil. Ancaq, ümumilikdə, Rusiyanın Azərbaycanla Aİ arasında imzalanacaq sazişin əleyhinə olması gün kimi aydındır. Çünki aydın məsələdir ki, Rusiya Azərbaycanın Qərbə inteqrasiya olunmasını istəmir. Rusiya nəinki Azərbaycanın, digər postsovet ölkələrinin də Avropaya inteqrasiyasını istəmir. Müxtəlif kanallarla Aİ ilə Azərbaycan arasında imzalanacaq sazişi gözdən salmağa çalışır. Bir sıra xaricdə yaşayan şəxslərin sözügedən sazişə qarşı qarayaxma kampaniyası aparması anlaşılan deyil. Ona görə ki, gərək onlar Azərbaycanın Aİ-yə inteqrasiyasının tərəfdarı olsunlar. Çünki belə bir sazişin imzalanması Azərbaycan üçün böyük əhəmiyyət kəsb edir. Bu, Azərbaycanı mədəni dünyaya, sivilizasiyalı dünyaya qovuşdurmağın bir yoludur. Bu həm Azərbaycanın xarici ticarət əlaqələri üçün, həm də ölkə vətəndaşlarının vizasız gediş-gəlişi üçün mühüm əhəmiyyət kəsb edir. Yəni bununla bağlı yaxşı perspektivlər aça bilər. Bu nöqteyi-nəzərdən səslənən tənqidləri qəbul etmirəm. Azərbaycan bütün göstəricilərə görə Aİ ilə saziş imzalamağa layiqdir. Kimlərinsə bu məsələdə təxribat xarakterli fikirlər söyləməsi, faktiki olaraq, Azərbaycanın maraqlarına qarşı olan bir haldır. O üzdən, bununla bağlı səslənən ittihamları qəbul etmirəm”.
Vidadi ORDAHALLI
