20/05/2019 01:01
728 x 90

Parisin ardınca Nyu York kilsəsi, sonra isə - ... saxta “ümumdünya müsəlman qəsdinə” hazırlıq...

“Müsəlman dünyası bunları nəzərə alıb ehtiyatlı davranmalı, provokasiyalara uymamalıdır”

img

Fransa paytaxtında yerləşən Notr Damm kilsəsinin yanması dünyada böyük rezonans doğurdu. Çünki bu qədim kilsə həm də dünyanın nadir tarixi memarlıq incilərindən sayılır. Kilsənin yanmasına səbəb kimi müxtəlif versiyalar irəli sürülür. Fransanın aparıcı media qurumları iddia edirlər ki, yanğına səbəb qısa qapanma olub.

Təhqiqatçılar ehtimal edirlər ki, yanğın təsadüfən olub, bununla belə, həm kilsə işçiləri, həm də binanın bərpası ilə məşğul olan mütəxəssislər dindirilir. Bununla yanaşı, yanğına səbəb olan fərziyyələr arasında təxribat versiyası da nəzərdən keçirilir. Maraqlıdır ki, xristian aləmində Notr Damm yarasının qaysağı qopmamış, katoliklərə məxsus ABŞ-dakı Müqəddəs Patrik kilsəsinin yandırılmasına cəhd edilib. Həmin kilsəni 15 litr benzinlə yandırmaq istəyən 37 yaşlı Nyu-Cersi sakini polis tərəfindən saxlanıb. Dünya mediasının verdiyi məlumata görə, həmin şəxs əlindəki yanacaqla kilsənin hasarından aşaraq içəri daxil olmaq istəyib. Lakin o öz istəyinə nail ola bilməyib. Saxlanan şəxs polisə ifadəsində benzini avtomobilinin yanacağı bitdiyi üçün aldığını desə də, sonradan əsl niyyətini etiraf etməli olub.

Qeyd edək ki, Müqəddəs Patrik kilsəsi Notr Damm Paris kilsəsindən sonra ən böyük katolik kilsəsi hesab olunur. Hər halda, hadisələrin belə ardıcıllıqla cərəyan etməsi təsadüfə oxşamır. Sanki hansısa mərkəzlər xristianlığın həssas yeri sayılan məkanlara qarşı məqsədli şəkildə təxribat planları həyata keçirirlər ki, sonradan bunu müsəlman dünyasının üzərinə atsınlar. Tarixdə belə faktlar heç də az olmayıb. Məsələn, faşistlərin lideri olan Hitler Reyxstaq binasını yandırmaqla, kommunistlərə divan tutmaq üçün əlinə əsas keçirmiş oldu. Bu baxımdan da maraqlıdır, dünyadakı məşhur xristian məbədlərinə qarşı edilən təxribatları müsəlmanların üstünə atmaq kimi cəhdlərin olması nə dərəcədə mümkün və inandırıcı görünə bilər?

  • Tural İrfan: “Yüz faiz əminəm ki, bununla müsəlmanların üzərinə müasir formada bir səlib yürüşü təşkil etmək üçün əsaslar axtarırlar”

İlahiyyatçı Tural İrfan “Bakı-Xəbər”ə açıqlamasında bildirdi ki, bu hadisələrdə təxribat izinin olması daha inandırıcı görünür: “Xristian dünyası açıq şəkildə etiraf edir ki, İslam dünyasının güclənməsindən narahatlıq keçirir. Xristianlığın hakim olduğu inkişaf etmiş ölkələrdə müsəlmanların sayının sürətlə artması onları ciddi narahat edir. Bu səbəbdən də biz mütəmadi şəkildə belə təxribatlarla tanış oluruq. Mən bu gün tanış oldum, deyirlər ki, Fransadakı kilsənin yanmasına səbəb qısa qapanma olub. Ola bilsin ki, hansısa dairələr elə təxribatı bu üsulla ediblər. Bunun ardınca ABŞ-da kilsənin yandırılmasına cəhdin olması da təsadüfə oxşamır. Yüz faiz  əminəm ki, bununla müsəlmanların üzərinə müasir formada bir səlib yürüşü təşkil etmək üçün əsaslar axtarırlar. Təəssüflər olsun ki, bizim müsəlman dünyasında hələ də cəhalət hökm sürür. Düzdür, biz hansısa kilsənin yanmasına sevinmirik. Çünki dinimiz onların hamısını Allah evi sayır. Ancaq bzim məscidlərə olunan hörmətsizliyə xristian aləmi belə həssas münasibət bəsləmir. Hər halda, bu tolerantlıq nümunəsini bizdən öyrənsələr yaxşı olar. Bu yaxınlarda Suriyanın Hələb şəhərində olan 1000 illik məscid yandırıldı, heç ona belə reaksiya verilmədi. Biz dindəki ikili standartların da əleyhinəyik. Hər halda, müsəlman dünyası bunları nəzərə alıb ehtiyatlı davranmalı, provokasiyalara uymamalıdır”.

Məhəmmədəli QƏRİBLİ

Son xəbərlər