Fransada polislərin və jandarmların intihar etməsi ilə bağlı xəbərlər yayılır. Son bir neçə aydır narahat günlər yaşayan və tez-tez polis zorakılığı ilə üzləşən Fransa cəmiyyəti bu ölkədə polislərin intihara əl atmasından da ciddi şəkildə əndişələnir.
Fransa Daxili İşlər Nazirliyinin rəsmi məlumatlarına əsasən, bu il ölkədə polis və jandarmlar arasında intihar halları artıb. Belə ki, ilin əvvəlindən Fransada 35 polis və 33 jandarm intihara cəhd edib. Onlardan 28 nəfəri ölüb.
Fransa DİN-dən bildirilir ki son bir neçə gündə Fransada intihar edən insanlar arasında polis də var. Bu ölkənin daxili işlər naziri Krisrof Kastaner hadisədən sonra hüquq-mühafizə orqanlarında özünəqəsd hallarının qarşısının alınması məqsədilə təcili və təxirəsalınmaz tədbirlərə başlandığını bildirib.
Fransada son bir neçə ay ərzində 60-dan artıq polis və jandarmın intihara cəhd göstərməsi Fransa hökumətinin öz haqqlarını tələb edən və bunun üçün meydanlara çıxan fransızlara qarşı polisin əli ilə həyata keçirdiyi zorakılıq hallarına etiraz motivi ola bilərmi?
Ekspertlər qeyd edirlər ki, Fransa hökumətinin etirazçılarla sərt davranması və bu işə polisi, güc orqanlarını təhrik etməsi polislərin özləri tərəfindən narazılıqla qarşılanır. Onlar hesab edirlər ki, polislərin intihara cəhd etməsində bu motivləri axtarmaq daha düzgündür. Bu onu göstərir ki, Fransa polisi günahsız insanlara əl qaldırmaq istəmir və bu səbəbdən də çıxış yolunu intihara cəhddə görür. Fransa hökumətinin xalqla, cəmiyyətlə bağlı həyata keçirdiyi siyasətlə barışmayan polis işçilərinin, jandarmların intiharı seçdiyi təhlilçilərin diqqətini cəlb edir.
Əliməmməd Nuriyev: “Ola bilsin, polislərin bu şəkildə intihara cəhd etməsinin motivlərindən biri də polisin Fransa əhalisinə zorakılıq etməyə təhrik edilməsidir”
Tanınmış hüquqşünas Əliməmməd Nuriyev bildirdi ki, bu ilin əvvəlindən başlayaraq Fransada 60-dan atrıq polis və jandarmın özünə qəsd etməsi olduqca ciddi məsələdir və bu, geniş araşdırma və təhlil tələb edir. Ə.Nuriyev hesab edir ki, polislərin bu yolu seçməsi müxtəlif səbəblərdən ola bilər, bunun bir motivinin də onların Fransa hökumətinin xalqa qarşı törətdiyi cinayətlərlə barışmaq istəməməsi ilə bağlı olduğu şübhə doğurmur. “Bu elə bir məsələdir ki, onunla bağlı araşdırma, təhlil aparmadan münasibət bildirmək çətindir. Əvvəlcə bunun motovlərinin nədən ibarət olduğu aydınlaşmalıdır. Polislərin intihar etməsində həm ailədaxili məsələlər, həm sosial problemlər, həm ətraf mühitin təsirləri, həm iş yoldaşları ilə münaqişələr rol oynaya bilər. Əlbəttə, bu qədər polisin, jandarmın intihar etməsi yetərli qədər böyük rəqəmdir və Fransa hökumətinə düşünməyə əsas verir. Səbəb nə ola bilər ki, bir neçə ay ərzində bu qədər polis işçisi intihara cəhd edir, hətta bəzilərinin sonu ölümlə nəticələnir.
Hesab edirəm ki, ola bilsin, polislərin bu şəkildə intihara cəhd etməsinin motivlərindən biri də polisin Fransa əhalisinə zorakılıq etməyə təhrik edilməsidir. Çünki Fransada, bir qayda olaraq, əvvəllər insanlara qarşı belə genişmiqyaslı zorakılıq halları baş vermirdi. Bundan başqa, həmin ölkədə genişmiqyaslı, davamlı etiraz aksiyaları olmurdu. Bu da polisə, onun psixikasına sözsüz ki, təsir göstərib. Yəqin indi Fransa hökuməti bu halları araşdıracaq və gerçək səbəbləri üzə çıxaracaq” - deyə Ə.Nuriyev qeyd etdi.
İradə SARIYEVA
