Artıq bir neçə gündür sosial şəbəkələrdə Tural Qarayev adlı şəxsin Azərbaycan Xalq Cəbhəsi Partiyası (AXCP) sədrinin müavini Fuad Qəhrəmanlının qızına qarşı zorakılıq etməsi aktiv müzakirə edilir. Qeyd edək ki, siyasi mövqeyindən asılı olmayaraq, hərb bir şəxs azyaşlıya qarşı edilən hərəkəti pisləyir.
Zorakılığı törədən şəxs barədə polisə şikayət daxil olduqdan sonra məsələ araşdırılıb və Tural Qarayev saxlanıb. O, İnzibati Xətalar Məcəlləsinin 510-cu (xırda xuliqanlıq) maddəsi ilə təqsirli bilinir.
- YAP: “Tural Qarayevin Yeni Azərbaycan Partiyasının üzvü olması barədə sosial şəbəkələrdə yayılan məlumat həqiqətə uyğun deyil”
Göründüyü kimi, ortada siyasi cinayət yoxdur. Ancaq buna baxmayaraq, bəzi şəxslər bütün cəhdlə məsələni siyasiləşdirməyə çalışırlar. Bəzi radikal mövqeli şəxslər cinayəti törədən şəxsin YAP üzvü olduğunu gündəmə gətirdilər və iddia etməyə başladılar ki, bu, birbaşa hakimiyyətin işidir. Hakim Yeni Azərbaycan Partiyası adından yayılan məlumatda isə bildirilir ki, onların Tural Qarayev adlı üzvü yoxdur: “Azərbaycan Xalq Cəbhəsi Partiyası (AXCP) sədrinin müavini Fuad Qəhrəmanlının 14 yaşlı qızına hücum edən Tural Qarayevin Yeni Azərbaycan Partiyasının üzvü olması barədə sosial şəbəkələrdə yayılan məlumat həqiqətə uyğun deyil”.
Bəyanatda qeyd olunur ki, T.Qarayevin YAP-a heç bir aidiyyətı yoxdur. Bu cür yalan məlumat məqsədli şəkildə yayılır və bu yolla partiyanın nüfuzuna xələl gətirməyə çalışırlar.
Ancaq Tural Qarayevə məxsus “Facebook” profilini incələyəndə məlum olur ki, bu adam daha çox müxalif cameəyə yaxınlığı ilə seçilib. Onun, demək olar ki, bütün müxalif liderlərlə fotoları var. Yayılan məlumatlarda onun müxalifətin bütün tədbirlərində yaxından iştirakı görünür.
Bu adamın yazdıqlarına inansaq, siyasi fəaliyyətinə Müsavatdan başlayıb. Sonra “D-18” hərəkatına keçib. Ardınca “ReAl” hərəkatına qoşulub. Burada da sabit əqidə sahibi olmayıb və Ümid Partiyasına üz tutub. Nəhayət, gəlib Yeni Azərbaycan partiyasına üzv olub. Yəni bu şəxsin YAP-çı olduğu iddiasının mənbəyinə əsaslansaq, adamın müxalifət düşərgəsində gəzmədiyi kol dibi qalmayıb. Bu, necə YAP-çıdır görəsən? Ümumiyyətlə, belə şəxsin profilində göstərdiyi məlumatlara inanmağa dəyərmi?
YAP bu məsələyə aydınlıq gətirdi. Bəs Turalla yaxından fotoları olan müxalif qurumlar niyə məsələyə münasibət bildirmək istəmirlər?
- İsgəndər Həmidov: “Azyaşlı qıza hücum edən adamla mənim əqidə birliyimdən söhbət belə gedə bilməz”
Tural Qarayevlə birlikdə fotosu olan sabiq daxili işlər naziri İsgəndər Həmidov “Bakı-Xəbər”ə açıqlamasında bildirdi ki, T.Qarayev adlı adam tanımır: “Fuad Qəhrəmanlı mənim qardaşımdır. Onun balasına edilən hücüm elə bil mənim qardaşım balasına edilib. Bundan böyük əxlaqsızlıq ola bilməz. Ümumiyyətlə, kimin övladı olmasından asılı olmayaraq, azyaşlı qıza hücum edən adamla mənim əqidə birliyimdən söhbət belə gedə bilməz. Mənimlə fotosunun olmasına gəldikdə isə, belə faktın olması mümkündür. Biz tanınmış adamlarıq. Bəzən tədbirlərdə, məclislərdə bizimlə foto çəkdirmək istəyirlər. Çoxlarını heç tanımırıq da. Etiraz etmirik. Yəqin bu adam da elələrindən olub. Həmin fotonu bu məqamda yayanlar, haralarınsa sifarişini həyata keçirirlər. Məqsədləri də məni gözdən salmaqdır. Əminəm ki, F.Qəhrəmanlı belə provokasiyalara inanan deyil”.
- Ruslan İzzətli: “Həmin adam doğrudan da hərəkata üzvlük üçün müraciət edib, amma...”
T.Qarayevlə bir neçə fotosu olan digər şəxs, müxalifyönümlü “D-18” adlı hərəkatın rəhbəri Ruslan İzzətli ilə əlaqə saxladıq. O, “Bakı-Xəbər”ə açıqlamasında bildirdi ki, həmin adam doğrudan da hərəkata üzvlük üçün müraciət edib: “Amma hərəkat onun üzvlüyünü təsdiqləməyib. Çünki biz müraciət edənlərin anketlərini araşdırırıq. Əgər bir adam başqa partiyanın üzvüdürsə, onu qəbul etmirik. T.Qarayevin də ərizəsinə bu səbəbdən rədd cavabı verilib. O ki, qaldı tədbirlərimizdə iştirakla onun bizimlə fotolarına, burda da qəribə nəsə yoxdur. Bizim tədbirlər açıq keçirilir, hər kəs iştirak edə bilər. Həmin adam da bu imkandan istifadə edib bizimlə foto çəkdirib. Onun atdığı addım isə cinayət və əxlaqsızlıqdır. Ən başlıcası isə, cəmiyyətə qarşı hörmətsizlikdir. Onun hərəkəti harada təmsil olunmağından asılı olmayaraq, heç kimə başucalığı gətirməz. Bu adam layiqli cəzasını almalıdır. Onun profilinə baxsanız görərsiniz ki, üzv olmadığı partiya yoxdur. Hətta özünün də partiyası olduğunu yazıb. Həmin məlumatların nə dərəcədə doğru olub-olmadığı barədə isə nəsə deyə bilmərəm. Mən yalnız özümüzə aid hissəyə aydınlıq gətirdim”.
Bu araşdırmadan sonra məlum olur ki, T.Qarayev ya psixikası normal olmayan adamdır, ya da təxribatçı. Hər halda, buna ən dolğun cavabı hüquq-mühafizə orqanları verəcək.
Məhəmmədəli QƏRİBLİ
