23/07/2019 22:29
728 x 90

Moskvadan sonra Vaşinqtonda Qarabağ görüş təşəbbüsü – prosesə təkan, ya Rusiyanın fəallaşmasına əks gediş...

“ABŞ baxdı ki, Rusiya fəallığı fonunda müəyyən imtiyaz əldə edir, buna görə o da fəallaşdı”

img

ABŞ tərəfi Azərbaycan və Ermənistan xarici işlər nazirlərinə Dağlıq Qarabağ münaqişəsinin həlli ilə bağlı müzakirələri davam etdirmək üçün Vaşinqtonda görüşməyi təklif edib. Bu barədə Azərbaycanın xarici işlər naziri Elmar Məmmədyarov Varşavada keçirilən mətbuat konfransında bildirib.

Dağlıq Qarabağ münaqişəsi ilə bağlı danışıqlara münasibət bildirən XİN başçısı aprelin 15-də Moskvada keçirilmiş görüşü xatırladıb: "Bizə danışıqlarda irəliləyiş lazımdır. Deyə bilərəm ki, bu baxımdan elə də nikbin deyiləm, amma real danışsaq, səyləri ikiqat artırmaq lazımdır. Rusiya bunu edir, son görüşdə Rusiyanın xarici işlər naziri Sergey Lavrov da iştirak etdi. ABŞ-dan da təklif aldıq. ABŞ dövlət katibi də danışıqlarda irəliləyişə nail olunmasına töhfə vermək niyyətindədir".

Qeyd edək ki, həmsədr ölkə kimi ABŞ tərəflərin fərdi görüşünü təşkil etmək məsələsində Rusiyaya uduzur. Adətən belə təşəbbüslər Rusiya tərəfdən çox edilib. Politoloqlar Rusiyanın bu fəallığını münaqişənin onun təsir dairəsinə daha yaxın olması ilə izah ediblər. ABŞ-ın belə bir təşəbbüslə çıxış etməsi Rusiyanın aktivləşməsinə qısqanclıqdan irəli gəlir, yoxsa həqiqətən danışıqlar prosesini sürətləndirmək məqsədini güdür?

  • Zərdüşt Əlizadə: “Görərsiniz, Vaşinqtondan sonra Paris fəallaşacaq”

Politoloq Zərdüşt Əlizadə “Bakı-Xəbər”ə açıqlamasında bildirdi ki, burada qeyri-adi nəsə görmür: “Tərəflərin razılığa gəlməsi üçün ciddi təkanlar lazımdır. Bu təkanlar yoxdursa,  görüşün məkan baxımından harada keçirilməsi elə də böyük önəm daşımayacaq. Münaqişə boyunca biz  hər bir həmsədrdən belə cəhdləri görmüşük. Düzdür, Rusiya regiona yaxın olduğu üçün onun fəallığı daha çox nəzərə çarpır. Hesab edirəm ki, bu cür səylər həmin ölkələrin özü üçün üstünlük və imtiyazlar gətirir. Onlar da öz mənafeləri xatirinə bu imtiyazlardan istifadə etməyə çalışırlar. ABŞ baxdı ki, Rusiya fəallığı fonunda müəyyən imtiyaz əldə edir, buna görə də o da fəallaşdı. Görərsiniz, Vaşinqtondan sonra Paris fəallaşacaq. O da belə bir görüş təşəbbüsü irəli sürəcək. Hesab edirəm ki, bu, problemin həllini sürətləndirmək məqsədilə olunur. Burada hərə öz mənafeyini güdür”.

“Tərəflər bununla nə imtiyazlar qazana bilərlər” sualına politoloqun cavabı belə oldu: “Rusiya istəyir ki, münaqişənin tənzimlənməsi onun əlində olsun və bundan maksimum mənfəət əldə etsin. Ermənistana silahı kreditlə verir, bununla da Azərbaycanı vadar edir ki, nağd pula ondan silah alsın. Bu alverdən milyardlarla pul qazanır. Gördünüz ki, Bolton da regiona səfər edəndə Paşinyana açıq dedi ki, silahı ABŞ-da alsın. 90-cı illərdə münaqişə başlayanda ABŞ-ın bölgəyə təsiri 0 faiz idi. Bu münaqişə sayəsində ABŞ həm Ermənistana, həm də Azərbaycana təsir imkanlarını artıra bildi. Fransa da bulanıq suda balıq tutmaqda pərgərdir. O da bütün dünyaya sübut etməyə çalışır ki, “əzabkeş” erməni xalqının hamisidir. Münaqişə boyunca da bu işlə məşğul olub. Bu baxımdan da Vaşinqtonun təşəbbüsündə yeni nəsə görmürəm”.

Məhəmmədəli QƏRİBLİ

Son xəbərlər