Dünya mədəniyyətinin incilərindən biri olan Parisin məşhur Notr-Dam kilsəsində baş verən yanğın hadisəsi bütün dünyada kədərlə, təəssüflə qarşılandı. Bu acı olaya ölkəmiz də biganə qalmadı.
Azərbaycan Prezidenti İlham Əliyev rəsmi "Twitter" hesabında Fransanın paytaxtı Parisdə məşhur Notr-Dam kilsəsində baş verən yanğınla bağlı paylaşım edib. “Fransanın və dünyanın mədəni irs incilərindən biri olan Paris Notr-Dam kilsəsində baş verən yanğınla bağlı dərindən kədərləndim. Ümid edirəm ki, abidə qısa müddət ərzində bərpa olunaraq yenidən bəşəriyyətə qaytarılacaq” – deyə Prezident İlham Əliyev vurğulayıb.
Xatırladaq ki, Paris Notr-Dam kilsəsindəki yanğın zamanı kilsə üzərindəki uzun qüllənin bir hissəsi aşıb, həmçinin, məbədin saatı yanaraq məhv olub. Fransa Daxili İşlər Nazirliyi yanğından sonra kilsənin bərpasının çətin olacağını açıqlayıb. Bunun ardınca isə Fransa Prezidenti Emmanuel Makron kilsəni bərpa edərək yenidən əvvəlki vəziyyətinə qaytaracaqlarına söz verib. O qeyd edib ki, kilsə 5 il müddətində bərpa ediləcək. Ekspertlər isə kilsənin bərpasına 10-15 il tələb olunduğunu vurğulayırlar.
Xaricdə bir sıra tarixi abidələrin, eləcə də kilsələrin bərpasında böyük işlər görən və bu sahədə böyük təcrübəyə malik olan Heydər Əliyev Fondu Paris Notr-Dam kilsəsinin bərpasına nə kimi töhfələr verə bilər?
Mütəxəssislər bildirirlər ki, Heydər Əliyev Fondu həm ölkəmizdə, həm də bir sıra xarici ölkələrdə dünya mədəniyyətinin incisi olan bir sıra abidələrin, tarixi-dini məkanların bərpasında müstəsna rol oynayıb.
Ekspertlərin bildirdiyinə görə, fond tərəfindən xaricdə həyata keçirilən mədəniyyət layihələri bu qurumun mədəni müxtəlifliyə və ümumbəşəri dəyərlərə hörmətini mədəniyyətlərarası və sivilizasiyalararası dialoqun möhkəmləndirilməsinə töhfələrini verməklə əyani şəkildə nümayiş etdirir. Heydər Əliyev Fondu Parisdə Versal Sarayının parkındakı abidələrin, Luvr Muzeyinin, İkinci Dünya Müharibəsi zamanı yanmış və dağıdılmış Berlin qəsrinin, Vatikan arxivlərində qorunan orta əsr əlyazmalarının, Vatikanda Roma katakombalarının və Romanın Kapitolini Muzeyinin “Filosoflar zalı”nın bərpasını və təmirini həyata keçirib.
Bundan başqa, Heydər Əliyev Fondunun dəstəyilə Müqəddəs Marçellinio və Pietro katakombalarının bərpa edilməsi də dünyaya məlumdur.
Ekspertlərin bildirdiyinə görə, fondun bu sahədə gördüyü işlər, qazandığı təcrübə onun Notr-Dam kilsəsinin də bərpasına töhfə verməsinə imkanlar açır.
Vaqif Abışov: “Buna fondun uzun illərdən bəri qazandığı təcrübə də imkan verir”
Azərbaycan Milli Elmlər Akademiyasının (AMEA) A.Bakıxanov adına Tarix İnstitutunun əməkdaşı, tarix üzrə fəlsəfə doktoru Vaqif Abışov “Bakı-Xəbər”ə bildirdi ki, bu sahədə Heydər Əliyev Fondunun çox böyük təcrübəsi var və bunu fondun indiyə qədər həyata keçirdiyi layihələr də təsdiqləyir. “Bilirsiniz ki, Heydər Əliyev Fondu tərəfindən Roma kitabxanasında qədim əlyazmaların bərpası ilə bağlı çox böyük işlər görülüb. Eyni zamanda da Parisin məşhur Luvr Muzeyinin təmir və bərpasına da fond öz töhfələrini verib. Fond bərpa işləri ilə bağlı böyük təcrübəyə malikdir. Azərbaycan UNESCO-nun üzvüdür və üzv dövlət kimi bəşər mədəniyyətinin qorunması, mədəniyyət incilərinin bərpasına öz töhfəsini verib. Düşünürəm ki, Paris Notr-Dam kilsəsinin bərpasına da Heydər Əliyev Fondu öz töhfəsini verə bilər, buna fondun uzun illərdən bəri qazandığı təcrübə də imkan verir. Fond indiyə qədər bu sahədə çox böyük layihələr həyata keçirib və bu layihələr dünya mədəniyyətinin inkişafında, dinlər, millətlərarası əlaqələrin daha da möhkəmlənməsində mühüm rol oynayıb. Fond, həmçinin, Azərbaycanda da bir sıra tarixi, mədəni və dini abidələrin bərpa edilməsində yaxından iştirak edib” - deyə V.Abışov qeyd etdi.
Vüqar Rəhimzadə: “Təbii ki, Heydər Əliyev Fondu Paris Notr-Dam kilsəsinin bərpasına öz töhfəsini verə bilər”
“İki sahil” qəzetinin baş redaktoru Vüqar Rəhimzadə də hesab edir ki, ehtiyac olarsa, Heydər Əliyev Fondu Paris Notr-Dam kilsəsinin bərpasında yaxından iştirak edə bilər. O bildirdi ki, buna fondun illərdən bəri qazandığı təcrübə də imkan verir. “Heydər Əliyev Fondunun həyata keçirdiyi xeyirxah işlər sırasında hər zaman bəşəriyyətin qiymətli inciləri olan abidələrin bərpası da mühüm yer tutur. Fondun həm bərpa işlərinin, həm də humanitar tədbirlərin həyata keçirilməsində kifayət qədər təcrübəsi var. Təbii ki, Heydər Əliyev Fondu Paris Notr-Dam kilsəsinin bərpasına öz töhfəsini verə bilər. Bu çox normal haldır və fondun missiyasına daxildir. Əlbəttə, fond gördüyü uğurlu işlərlə dinlərarası əlaqələrin daha da möhkəmlənməsinə böyük töhfələr verir” - deyə V.Rəhimzadə bildirdi.
İradə SARIYEVA
