Azərbaycan Xalq Hərəkatı deyilən qurumda baş verən çaxnaşma, dava-dalaş indi də başqa bir müxalif partiyaya sirayət edib. Bu dəfə Müsavat Partiyasının tanınmış funksionerləri bir-birilə açıq formada dalaşmaq yolunu tutublar. Görünən budur ki, artıq partiyanın daxilində olan intriqalar sosial şəbəkələrə transfer olunub.
Müsavatın Divan üzvü Yadigar Sadıqlı özünün “Facebook” səhifəsində belə bir statusu yazıb: "Müsavat Partiyası üzvlərinin qapalı qrupunda başqan Arif Hacılının xeyir-duası ilə məni satqın, öyrədilmiş, Müsavatı parçalayan elan etmək uğrunda yarış gedir. Kimlərin etdiyini soruşmayın, əksəriyyətini heç tanımazsınız, profillərində hakimiyyət əleyhinə söz tapmazsınız".
Bu iddiadan sonra Müsavat başqanının müavini Səxavət Soltanlı Yadigar Sadıqlıya aşağıdakı cavabı verib: "Əlbəttə, ürək ağrısı ilə bu statusu yazıram. Söhbət Müsavat Partiyasına və yüzlərlə ləyaqətli və vicdanlı müsavatçıya atılan böhtandan gedirsə, cavab verməmək mənim kitabımda yoxdur.
Deməli belə, Yadigar Sadıqlının bütünlüklə Müsavat Məclisini təhqir etdikdən, provokativ hərəkətlər etdikdən sonra növbəti dəfə müsavatçılar haqqında böhtan və yalan yayması, guya müsavatçılar kiminsə göstərişi ilə ona “satqın” deyiblər... (Belə bir fakt yoxdur, mümkün deyil) Bu, müsavatçıları təhqir etməkdir.
Məsələnin mahiyyəti odur ki, Məclisdə etdiyi dözülməz davranışdan sonra hər kəs onun bu davranışını qınadı, ondan səhv etdiyini etiraf edib, üzr istəməsini tələb etdilər. O da müsavatçılardan dəstək görmədiyi üçün əsasən antimüsavatçılar və bu söhbətlərin detallarını bilməyən səmimi insanları çaşdırmaqla onların dəstəyini qazanmaq, Müsavat Partiyasına zərər vurmaq bahasına yalan və böhtan dolu status yazdı. Statusa və mövzuya əlavə olaraq. Siz siz olun, həyatda yaşadığı halda, fəaliyyət göstərdiyi müddətdə heç kim haqqında yüksək fikirlər yazıb özünüzü yazdıqlarınızın girovuna çevirməyin.
Siz siz olun, yalan-böhtan danışmayın. Bir dəfə yalan-böhtan danışdınızsa, məcbursunuz ki, növbətilərini uydurasınız".
Göründüyü kimi, Müsavat funksionerləri arasındakı qalmaqal hamının gözü qarşısında ictimailəşmiş formada aparılır. Bəs buna partiyanın rəhbər strukturlarının münasibəti necədir?
Bir neçə Müsavat funksioneri ilə əlaqə saxlasaq da, onlar bu barədə nəsə danışmaq istəmədilər.
Səxavət Soltanlı: “Buna zərurət görünmür”
Səxavət Soltanlının özü isə “Bakı-Xəbər”ə bildirdi ki, bu məsələdə qeyri-adi nəsə görmür: “Müsavat kifayət qədər demokratik bir partiyadır. Burda fikir müxtəlifliyinin, açıq polemikaların olması təbiidir. Yadigar bəy fikirlərini yazıb, mən də ona cavab vermişəm. Bunu partiyadaxili demokratiyanın yüksək olması ilə əlaqələndirirəm. Düşünmürəm ki, bu məsələ Müsavatın rəhbər strukturlarında müzakirə olunacaq. Buna zərurət görünmür”.
Mustafa Hacıbəyli: “Partiyanın rəsmi mövqeyi olacaq”
Partiyanın mətbuat xidmətinin rəhbəri Mustafa Hacıbəyli isə “Bakı-Xəbər”ə açıqlamasında bildirdi ki, belə vəziyyətin yaranmasına partiyanın mövqeyi mütləq olacaq: “Bununla bağlı partiyanın konkret rəsmi mövqeyi olacaq. Həmin mövqe açıqlanmayana kimi bu barədə nəsə açıqlama vermək istəmirəm”.
Müsavatda baş qaldıran qalmaqalla bağlı partiyanın mövqeyinin nə zaman açıqlanacağı ilə bağlı sualımıza isə Mustafa Hacıbəyli “ya bu gün, ya da sabah” cavabını verdi.
Məhəmmədəli QƏRİBLİ
