Türkiyədə martın 31-də keçirilmiş bələdiyyə seçkilərinin İstanbul üzrə nəticələri ətrafında hakim partiya ilə müxalifət arasında mübahisə davam edir. İqtidardakı AKP-nin də daxil olduğu Cümhur İttifaqı İstanbulda seçkini uduzmuş kimi görünür, amma hakim partiya bunu qəbul etmək niyyətində deyil.
Bu arada AKP-nin tələbi ilə İstanbulda etibarsız hesab edilmiş 330 minə yaxın səsin, o cümlədən 60-dan çox məntəqədə bütün səslərin yenidən sayılması başa çatmaqda ikən Ali Seçki Şurası Maltəpə rayonunda yenidən təkrar sayım qərarı verib.
İstanbulun Maltəpə rayonu səslərin yenidən sayılmasında sonuncu rayon idi və prosesin aprelin 15-də başa çatacağı gözlənilirdi. Yəni səslərin yenidən sayılması başa çatsaydı, CHP-nin namizədi Əkrəm İmamoğlunun bələdiyyə başqanı seçildiyi haqda mandatı almasına maneə qalmayacaqdı.
Lakin AKP və onun müttəfiqi MHP Maltəpədə 400 seçki məntəqəsi üzrə səslərin yenidən (artıq üçüncü dəfə) sayılmasını tələb edib. Beləliklə, sayılmamış qalan qutular da daxil olmaqla Maltəpə rayonunda 576 seçki qutusunda bülletenlər yenidən sayılacaq. Prosesin daha nə qədər davam edəcəyi məlum deyil.
Qeyd edək ki, AKP İstanbulda seçkilərin nəticələrini tanımır və səslərin hesablanmasında, habelə seçici siyahılarının hazırlanmasında “kütləvi pozuntuların olduğunu” bildirir. Baxmayaraq ki, seçici siyahılarının hazırlanmasını hakimiyyət özü həyata keçirib, o cümlədən, bütün seçki məntəqələrində AKP-dən olan komissiya üzvləri və müşahidəçiləri səsvermənin nəticələrinə dair protokolları imzalayıblar.
Bütün bunlar Türkiyədəki bələdiyyə seçkilərinin nəticələri ilə bağlı birmənalı olmayan müzakirələrə yol açır. Cəmiyyətdə müəyyən gərginliyə səbəb olur. O baxımdan maraqlıdır, İstanbulda səslərin 3-cü dəfə sayılması nəyin əlamətidir? Doğrudanmı orada seçkilər mübahisəlidir, yoxsa ortada digər məsələ var?
Məhərrəm Zülfüqarlı: “Hesab edirəm ki, proseslərin bu qədər uzanması arzuedilən deyil”
Məsələyə münasibət bildirən seçki məsələləri üzrə ekspert Məhərrəm Zülfüqarlının sözlərinə görə, budəfəki seçkilər çox gərgin keçsə də, Türkiyədə demokratik seçki sistemi var: “Əvvəla uzun müddətdir Türkiyə demokratik dövlətdir və biz buna sevinirik. Səslərin yenidən sayılması və qarşı tərəfin buna irad bildirməsi demokratiyanın təzahürüdür. Ancaq hesab edirəm ki, proseslərin bu qədər uzanması arzuedilən deyil. Hakim partiya müxalifətin nümayəndəsini təbrik etməlidir. Sevinməlidirlər ki, onların hakimiyyətdə olduğu dövrdə demokratiya öz təntənəsini göstərdi. Hesab edirəm ki, Türkiyənin səlahiyyətli nümayəndələri, qanunverici qurumları buna münasibət bildirə bilərlər. Onu da qeyd edim ki, bir sıra inkişaf etmiş dövlətlərdə belə, seçkinin mübahisəli olması halları baş verir. Elə olur ki, iş məhkəməyə qədər gedib çıxır. Qarşı tərəfin səs üstünlüyü böyükdürsə və bu sübut olunubsa, o zaman iradların bildirilməsi və səslərin yenidən sayılması məqbul deyil. Ancaq qarşı tərəf demokratiyanın verdiyi bütün imkanlardan istifadə edərək səslərin yenidən sayılmasına gedir. Bu da gərgin müzakirələrin davam etməsinə rəvac verir. Ümid edirəm ki, Türkiyədə oturuşmuş demokratik ənənələr ədalətin qalib gəlməsini təmin edəcək. Proseslərin bu cür uzanması Türkiyənin imicinə kölgə salmayacaq. Hər halda, hesab edirəm ki, yaşanan bu mübahisələrə və gərginliyə yaxın günlərdə son qoyulacaq”.
Vidadi ORDAHALLI
