Rusiyanın “İl-20” təyyarəsi Aralıq dənizində Suriyanın Hava Hücumundan Müdafiə Qüvvələri tərəfindən vurulub. Baki-xeber.com xarici mediaya istinadən xəbər verir ki, bunu Rusiya Müdafiə Nazirliyinin general-mayoru İqor Konaşenkov deyib.
15 prsonalın olduğu Rusiya təyyarəsinin Əsəd rejiminə aid S-200 raketdən müdafiə sistemi tərəfindən vurulduğunu deyən Konaşenkov hadisəyə görə İsraili günahlandırıb.
Onun sözlərinə görə, İsrail qırıcıları Rusiya təyyarəsini rejimin raketdən müdafiə sistemlərinin olduğu bölgəyə çəkərək ondan qalxan kimi istifadə edib. Konaşenkov deyib ki, İsrail qırıcıları Rusiyanın “İl-20” təyyarəsinin arxasında gizlənərək onu Suriya Hava Hücumundan Müdafiə Qüvvələrinin zərbəsi qarşısında qoyublar.
“İsrail hərbçilərinin məsuliyyətsiz hərəkətləri nəticəsində Rusiyanın 15 hərbi qulluqçusu həlak olub. Bu, Rusiya-İsrail tərəfdaşlığının ruhuna əsla uyğun deyil”, - deyə Konaşenkov qeyd edib.
General, hadisədən bir dəqiqə öncə onları xəbərdar etdiyini, ancaq Rusiya hərbi təyyarəsini təhlükəsiz bölgəyə çəkməyə vaxt olmadığını deyib.
Konaşenkovun sözlərinə görə, İsrail pilotları "İl-20" təyyarəsinin yaxınlığında manevr edərək ona Suriya Hava Hücumundan Müdafiə Komplekslərinin atəş açmasına səbəb olub. Bundan əlavə vurğulanıb ki, Rusiya təyyarəsi enişə hazırlaşdığından İsrailə məxsus aviasiyanın idarə olunması sistemləri onu mütləq şəkildə görməli idi: "İsrail komandanlığı Suriyada planlaşdırılan əməliyyat barədə Rusiya komandanlığına xəbərdarlıq etməyib. "Qaynar xətt" üzrə bildiriş zərbələrə bir dəqiqədən də az qalmış müddətdə əldə olunub ki, bu da Rusiya təyyarəsini təhlükəsiz zonaya çıxarmağa imkan verməyib".
O, ölkəsinin İsrail hərbçilərinin Lazkiyə rayonundakı fəaliyyətini düşmənçilik kimi qiymətləndirdiyini və Müdafiə Nazirliyinin adekvat fəaliyyət hüququnu özündə saxladığını vurğulayıb.
Rusiya müdafiə naziri Sergey Şoyqu israilli həmkarı Aviqdor Libermanla telefon danışığı zamanı bəyan edib ki, Suriyada Rusiya təyyarəsinin vurulması və ekipajın ölümünə görə günah, tamamilə İsrail tərəfindədir. Şoygu bildirib ki, təhlükəli vəziyyətlərin qarşısının alınması ilə bağlı mövcud razılaşmalara baxmayaraq, İsrail, Suriyaya hücumdan, yalnız bir dəqiqə əvvəl Rusiya tərəfinə xəbər verib.
"Sergey Şoyqu bildirib ki, Suriyada Rusiya təyyarəsinin vurulması və ekipajın ölümünə görə günah, tamamilə İsrail tərəfindədir", — deyə Müdafiə Nazirliyinin yaydığı məlumatda bildirilir.
Şoyqu, həmçinin vurğulayıb ki, Rusiya Müdafiə Nazirliyi dəfələrlə müxtəlif kanallar vasitəsilə İsrail tərəfini Suriyaya zərbələr endirməkdən çəkinməyə çağırıb.
İsrailin Moskvadakı səfiri isə Suriyada Rusiyaya məxsus "İl-20" hərbi təyyarəsi ilə bağlı insidentlə əlaqədar Rusiya Xarici İşlər Nazirliyinə çağırılıb.
Moskvanın Rusiya təyyarəsini təhlükəli bölgəyə çəkib, Suriya hava müdafiə sistemləri tərəfindən vurulmasına şərait yaratmaqda günahlandırdığı İsrail ordusu da açıqlama yayıb. Hadisəyə görə təəssüfləndiklərini deyən İsrail tərəfi Rusiya təyyarəsinin vurulmasına görə Əsəd rejimi, İran və Hisbullahı günahlandırıb.
O da bildirlib ki, Suriya raketləri Rusiya təyyarəsini vurduğu zaman İsrail təyyarələri o bölgədə olmayıb, İsrail hava sahəsində olublar.
Qeyd edək ki, Rusiyanın Suriyanın Xmeymim əyalətində yerləşən hərbi bazasının komandanlığı sentyabrın 18-i 00:00 radələrində Hava-Kosmik Qüvvələrinin "İl-20" təyyarəsi ilə əlaqəni itirib. Ekipajla əlaqə Aralıq dənizində, Suriya sahillərindən 35 kilometr aralıda itib.
Rusiya hərbi bazasının komandanlığı axtarış-xilasetmə işlərinə başlayıb. "MarineTraffic" portalının məlumatına görə, hazırda Tartus limanı yaxınlığında Rusiya Hərbi Dəniz Qüvvələrinə məxsus "Professor Nikolay Murov" xilasetmə yedək gəmisi yer alıb.
Rusiya Müdafiə Nazirliyi qeyd edib ki, "İl-20" təyyarəsi İsrailə məxsus 4 ədəd "F-16" qırıcısının Suriyanın Latakiya bölgəsində uçuşlar həyata keçirdiyi zaman yoxa çıxıb.
