Ermənistanda artan siyasi gərginlik fonunda ölkədə yeni daxili savaşın başlanması qaçılmaz sayılır. Buna əsas səbəb Nikol Paşinyanın hədəf kimi seçdiyi sabiq məmurların, o cümlədən keçmiş prezident Köçəryanın baş nazirə daha ciddi müqavimət göstərmək üçün ətrafına yeni qüvvələr cəmləşdirməsi, həmçinin Rusiyadan dəstək almasıdır. Paşinyan isə bu durumda Köçəryanı zərəsizləşdirmək üçün onun barəsində mənimsəmə ilə bağlı yeni cinayət işləri açdırıb. Hesab edilir ki, Köçəryan və Paşinyan tərəfdarlarının üz-üzə gəlməsi düşmən ölkədə yeni daxili savaşı qaçılmaz edir.
Düzdür, Paşinyan sabiqlərin onun üçün təhdid yaratmadığını iddia edir. Hətta Ermənistanın baş naziri Robert Köçəryan və Serj Sarkisyanı siyasi meyit adlandırıb. Paşinyan onların ölkənin daxili siyasətinə daha təsir etmək gücünə malik olmadıqlarını bildirib: “Artıq bəyan etmişəm ki, Robert Köçəryan və Serj Sarkisyan daha siyasi faktor deyil. Onlar siyasi meyitdir. Lakin bu o demək deyil ki, siyasi meyit ola-ola qanun qarşısında cavab verməməlidirlər”. Köçəryan isə artıq bundan əvvəl Paşinyanı ona ilişdiyi üçün peşman edəcəyini açıqlayıb. Bundan başqa, məlum olub ki, Köçəryan özünə Rusiya ilə yaxın əlaqələri olan britaniyalı lobbiçilər tutub.
Erməni jurnalist Qriqor Atanesyanın sözlərinə görə, Paşinyanla Makron arasındakı görüşdən əvvəl Avropanın iki nüfuzlu saytında Köçəryanın siyasi təqibə məruz qalması fikrini təlqin edən yazılar dərc olunub. Bunların arxasında isə Köçəryanın özünün pulla tutduğu Maykl Barel dayanıb.
Köçəryan “British lobbyist and former VP of Edelman” və “APCO Worldwide” şirkətlərinin köməyinə müraciət edib. Lobbi fəaliyyətini həyata keçirən bu şirkətlərin eyni zamanda “Qazprom” və rus oliqarx Andrey Melniçenko ilə əlaqələrinin olması maraq doğurub: “Bu lobbiçilər kifayət qədər baha qiymətə və milyarder müştərilərə xidmət göstərirlər. Bu isə Köçəryanın astronomik məbləğlər xərclədiyini və korrupsiya razılaşmalarına batdığını sübut edir. Köçəryan və komandasının lobbiçilər qarşısında hansı tapşırığı qoyduğunu söyləmək çətindir. Hazırda eks-prezidentin ilkin vəzifəsi yenidən həbsxanaya qayıtmamaqdır. Digər tərəfdən isə Köçəryan yaxşı başa düşür ki, yalnız əksinqilabın revanşı nəticəsində məhkumluqdan yaxa qurtara bilər. İstənilən halda, Paşinyanın Rusiya rəhbərliyinin və şəxsən Putinin məsələyə qarışmasına göstərdiyi reaksiya onu göstərir ki, Paşinyan ölkənin daxili-siyasi gündəmində dayanan məsələyə görə xarici müttəfiqlərinə güzəştə getməyəcək. bu durumda Ermənistanda əksinqilab süquta uğrayıb və yalnız yeni 11-ci ordunun köməyinə ümid edə bilər”.
Lakin qeyd edilənlərə rəğmən, o da aydın görünür ki, Köçəryana dəstək verən və Paşinyana qarşı çıxan siyasi qüvvələrin sayı da artır. Paşinyan hökumətinə qarşı ən sərt tənqidi “Tsarukyan Bloku“nun nümayəndələri dilə gətirib. Blok bununla hökumətlə uzun müddətdir apardığı “səssiz və gizli savaşı” açıq müstəviyə keçirmiş olub. Hökumətə qarşı ilk sərt tənqidi isə “Çiçəklənən Ermənistan“ Partiyasının İrəvan meri vəzifəsinə namizədi Naira Zöhrabyan səsləndirib. Zöhrabyan hökumətin mer vəzifəsinə əsas namizədi olan Ayk Marutyanın İrəvana biznes layihə kimi yanaşdığını bildirib: “Paytaxt onlar üçün “İrəvan prodakşn” adlı biznes layihədən başqa bir şey deyil. Onlar Ermənistanı vətən kimi qəbul edirlərsə, Avropada 6-7 ev almaq əvəzinə burada məskunlaşardılar”. O, daha sonra Marutyanı siyasi debata səsləyib: “Hər dəfə imkan düşən kimi biz hansısa siyasi qüvvəni Köçəryanın dəstəkləməsi barədə ittihamlar eşidirik. Lakin onlar bilmirlər ki, özləri Köçəryanın piar kampaniyasını aparırlar. Maraqlıdır ki, “Mənim addımım” (Marutyanın bloku) blokunun üzvlərinin əksəriyyəti Serj Sakisyanın yaxın adamlarıdır”.
Zöhrabyan buna əsas sübut kimi blokun namizədləri sırasında Serj Sakisyanın kürəkəni Mikayıl Minasyanın və yazıçı Zori Balayanın qohumunun olmasını göstərib. Zöhrabyanın ittihamları “Tsarukyan Bloku“nun deputatı İveta Tonoyan tərəfindən davam etdirilib. O, “Çiçəklənən Ermənistan“ın qara piar başlatmadığını, sadəcə, informasiya reketliyinə reaksiya verdiyini deyib. O, bəzi dövlət strukturlarının partiyanın namizədlərinə qarşı təhqirlərə və təhdidlərə yol verdiyini bildirib. Hökumətin adından ittihamlara “Yelk Bloku“nun parlament fraksiyasının rəhbəri Lena Nazaryan cavab verib. O, məhz Zöhrabyanın qara piar kampaniyası apardığını bildirib:“Zöhrabyan 2008-ci ilin martında ölkədə fövqəladə rejimin tətbiq edilməsinin lehinə səs verən şəxsdir. Bütün bunlardan sonra onlar bizi Respublika Partiyası ilə əlaqədə necə ittiham edə bilərlər?”. Nazaryan, həmçinin, seçki öncəsi seçicilərə rüşvət təklif edilməsi hallarına rast gəlindiyi haqda məlumatlara malik olduqlarını bildirib. O, bununla bağlı hüquq-mühafizə orqanlarına müraciət etdiklərini deyib.
Ermənistanın Demokratik Partiyasının sədri Aram Sakisyan isə baş verənlər fonunda Paşinyanın ölkə daxilində qarşıdurmaları qızışdırdığını bildirib. O, birbaşa Paşinyana xitabən deyib: “Baş nazir postunu kimə görə tutduğunuzu unutmayın. Sizi parlamentdə “Çiçəklənən Ermənistan“, hətta “Daşnaksütyun“ da dəstəkləyib. Siz yalnız öz nöqteyi-nəzərinizi diqqətə alırsınız. Mənim sizə daha deyəcək sözüm yoxdur. Adını çəkdiyim qüvvələr sizin yanınızda idi və artıq hərəkətlərinizlə onları uzaqlaşdırdınız. Əsas səbəb isə hakimiyyəti heç kimlə bölüşmək istəməməyinizdən qaynaqlanır. Bu da Ermənistanı yeni qarşıdurmaya sürükləyir”.
Tahir TAĞIYEV
