Qabil Hüseynli: “Azərbaycan iqtisadi blokadanı saxlamaqla Paşinyan rejimini daha rəzil günə sala biləcək”
Azərbaycan Prezidentinin mətbuat katibi Azər Qasımov Ermənistanın baş naziri Nikol Paşinyanın Azərbaycan Prezidenti İlham Əliyevin oğlu Heydər Əliyevin Silahlı Qüvvələrdə xidmət keçməsi ilə bağlı cəfəng bəyanatını şərh edərkən deyib ki, Ermənistanın baş nazirinin Azərbaycanın daxili məsələləri ilə bağlı yersiz və cəfəng açıqlamalar verməsi ilk hal deyil:
“Əvvəla bu onu göstərir ki, Paşinyan siyasətdə təsadüfi bir fiqurdur, beynəlxalq münasibətlərdən xəbərsizdir. Paşinyan Azərbaycanın daxili işlərinə müntəzəm olaraq öz burnunu soxur. Bildirmək istəyirik ki, əgər Azərbaycan Ermənistanın daxili işlərinə müdaxilə etsə, Paşinyan hakimiyyətinin ömrü uzun olmayacaq. Sarkisyan diktatura rejiminin çökməsi buna sübutdur. Sadəcə olaraq, indiki şəraitdə Paşinyan rejiminin çökməsi Azərbaycana sərf etmir. Nə qədər çox Ermənistanda Paşinyanın diktaturası davam edərsə, bir o qədər də bu ölkənin problemləri çox olacaq. Paşinyan xarici səfərlərində yaltaqlanmaqla, özünü alçaltmaqla, özünü qul kimi aparmaqla istədiyinə nail ola bilməz. Paşinyanın yeni diktatura rejimi Ermənistanı uçuruma aparır. Məhz buna görə də Azərbaycan tərəfi Paşinyan hakimiyyətinin çökməsi üçün hələlik hər hansı bir addım atmır”.
Göründüyü kimi, dövlət rəsmisi rəsmi İrəvana konkret xəbərdarlıq edərək bildirib ki, Azərbaycan Ermənistanın daxili işlərinə müdaxilə etsə, Paşinyan hakimiyyətinin ömrü uzun olmayacaq. Azərbaycanın bu hədəfə nail olmaq üçün nə kimi imkanları var?
Politoloq Qabil Hüseynli “Bakı-Xəbər”ə bildirdi ki, Azərbaycanın bu istəyinə nail olması üçün əlində yetərli vasitələri var: “Birincisi, belə sərsəm bəyanat verən Paşinyan bilməlidir ki, Azərbaycan hər an öz ərazi bütövlüyünü bərpa etmək yolunu tuta bilər. Təbii ki, bu da Ermənistana və Paşinyan hakimiyyətinə heç də xoş gələcək vəd etmir. Bu həqiqətən də realdır. Çünki Paşinyan çox məsuliyyətsiz bəyanatlar verməklə sülh prosesindən yaxasını tamamilə kənara çəkir. Nizamlanma məsələsində belə sərsəm rol oynayan siyasətçi ilə Azərbaycan hansı danışıqları apara bilər? Biz yaxşı anlayırıq ki, onlar danışıqlar prosesinə hazır deyillər. Belə məsuliyyətsiz adamla hər hansı polemikanın aparılması da yersiz görünə bilər. Buna görə də biz məcbur olub əlimizdə olan digər vasitələrdən, yəni hərbi yoldan istifadə edəcəyik. Bu da mənim zənnimcə uğurla başa çata bilər. İkinci amil isə iqtisadi fiaskodur. Azərbaycan uzun illərdir Ermənistanı təcrid siyasətini həyata keçirir. Həmin ölkə yürütdüyü işğalçı siyasəti səbəbindən regionu əhatə edən bütün layihələrdə iştirakdan kənarda qalıb. Bunun da nəticəsində ölkə səfil vəziyyətinə düşüb. Sarkisyan rejiminin çökməsini şərtləndirən ən vacib amillərdən biri də bu olub. İnsanlar küçələrə çıxıb Sarkisyanı devirdilər ki, yerinə gələn adam onları ağ günə çıxarsın. Biz isə bunun tam əksini görürük. Bu baxımdan da Azərbaycan iqtisadi blokadanı saxlamaqla Paşinyan rejimini daha rəzil günə sala biləcək. Çünki onlar bu səfalətdən qurtarmaq üçün real heç bir addım atmaq marağında deyillər”.
Məhəmmədəli QƏRİBLİ
