Məhəmməd Əsədullazadə: “İki ölkə arasında strateji əməkdaşlıq dəyişən regional şərtlər fonunda Ermənistan və digər dövlətləri narahat edir”
Məlum olduğu kimi, Azadlıq meydanında Bakının 1918-ci il sentyabrın 15-də bolşevik-daşnak qüvvələrinin işğalından azad edilməsinin 100 illiyinə həsr olunmuş hərbi parad keçirilib.
Sözügedən parad həm siyasi, həm də hərbi nöqteyi-nəzərdən yüksək qiymətləndirilir. Bu parad Azərbaycan-Türkiyə münasibətlərinin qardaşlıq səviyyəsində davam etdiyini, iki qardaş ölkənin bir-birinə tam arxalandığını bir daha sübut etdi. Birgə keçirilən hərbi parad Azərbaycan-Türkiyə münasibətlərinin hansı səviyyədə olduğunu bir daha göstərdi. Məsələ ondadır ki, Azərbaycanla Türkiyə eyni dilə, dinə, mədəniyyətə və bir sıra ortaq xüsusiyyətlərə malik ölkələrdir. Qafqaz İslam Ordusunun 100 il əvvəl Bakını eser-menşevik, erməni-daşnak və bolşevik qalıqlarından azad etməyə gəlməsi ölkələr arasındakı qardaşlıq münasibətinin əsrlərə dayandığının bariz nümunəsidir. Nəzərə almaq lazımdır ki, Azərbaycanın müstəqilliyinin ilk olaraq Türkiyə tərəfindən tanınması da tarixi ənənənin göstəricisidir. Bu gün keçirilən birgə parad və hər iki ölkə başçısının paradda iştirakı Türkiyə ilə münasibətlərin ən yüksək səviyyədə olduğunu bir daha sübut edir. Azərbaycanla Türkiyə təkcə siyasi, hərbi sahədə yox, iqtisadi sferada da ən yaxın əməkdaşlığa malik ölkələrdir. Bu iki ölkənin birgə həyata keçirdiyi layihələr təkcə özləri üçün yox, digər dövlətlər və xalqlar üçün də böyük əhəmiyyətə malikdir. Bir sözlə, bu parad da möhtəşəmliyi ilə əvvəlkilər kimi uzun müddət yaddaşlardan silinməyəcək. Hər bir ölkənin müstəqilliyinin qarantı onun güclü ordusudur. Nümayiş olunan texnika və hərbi sursat ordumuzun hansı gücə malik olduğunu açıq-aşkar göstərir.
Bütün bunlarla yanaşı, Azərbaycanla Türkiyənin keçirdiyi birgə parad Ermənistan və onun havadarlarına nə kimi mesajlar verdi?
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin sözlərinə görə, birgə parad son 100 ildə keçirilən möhtəşəm siyasi hadisə olaraq tarixə yazıldı: “Türkiyə-Azərbaycan strateji əlaqələri daim tarix boyu xüsusi əhəmiyyət kəsb edib. Məhz Bakının 100 il əvvəl daşnak-bolşeviklərdən azad olunmasında Türk ordusunun Qafqaz İslam Ordusu ilə birgə hərəkət etməsi öz sözünü deyib. Bu gün Türkiyə ilə Azərbaycan bütün spektrdə problemsiz əməkdaşlıq edirlər. İki ölkə arasında strateji əməkdaşlıq dəyişən regional şərtlər fonunda Ermənistan və digər dövlətləri narahat edir. Bakıda keçirilən möhtəşəm paradda Türkiyə Prezidenti Rəcəb Tayyib Ərdoğanın iştirakı, tribunadan işğalçı Ermənistana verdiyi mesajlar göstərdi ki, bu ölkə bütün məqamlarda Azərbaycanın yanında olacaq. Ermənistan baş nazirinin isterikası, Azərbaycana qarşı mənasız bəyanatları Türkiyənin hazırkı mövqeyinə qısqanclıqdan qaynaqlanır. Bundan sonra Türkiyə-Azərbaycan əlaqələri daha da müttəfiqliq səviyyəsinə qalxacaq. Bu gün iki ölkə hərbi sahədə də əmədaşlıq edir. Birgə təlimlər regionda işğalçı ölkələrə qarşı iki qardaş ölkənin demarşıdır. Bakıdakı hərbi parad Türkiyə ilə Azərbaycanın birgə paradı kimi xarakterizə edilməlidir. Çünki bu parad istənilən vəziyyətdə iki ölkənin birgə ordusunun hərəkətinə gələcək perspektivdə zəmin yaradacaq. Türkiyə və Azərbaycan prezidentlərinin bəyanatları Cənubi Qafqazda iki qardaş ölkənin bir olduğunun göstəricisidir”.
Vidadi ORDAHALLI
